Read Zeme Naga JOSHUA 24 Bible Online

JOSHUA 24 - Zeme Naga bible

JOSHUA 24

¹Chidadege â Israelme zat leine je Joshuabe ne Shekem ’mbe nguawang’ndui gai de lei, zai gechîngme kanguame besuitewme, samramme, zai Israelme gu saibe ramme je kû gai de lei; zai penui Hera je saplia gai de lei.

²Zai Joshuabe ne baudime ’nteumena je, “Aigum ze Tingwang Israelme Rapeu ne rang lei, ‘Ningnui peume Abrahambe benai Nahorbe peu Terabe Euphrates gene katlam ’mbia tingtie ge bam de lei; zai penui ne kêdabe hera ramme guâ ’nggua ze bam lei.

³Chidadege â ’nggeuki gene katlam ’mbia I ne ningnui peu Abrahambe je ngua lu Kanaanram pelane ge pechu nguapelatat ze pe cha pe name misongga bam ra tew gai bei de lei. Isaakbe je lungkeu ra I ne pechu pei bei de lei;

⁴zai Jakobbe benai Esaube je lungkeu ra I ne pechu pei gai bei de lei. Zai Seir ge peloaram ze Esaube ne ’nram ra I ne pei gai bei de lei, kane Jakobbe benai pe chaname â Ijip ’mbe tikeu di de lei.

⁵Zai I ne Mosabe benai Aaronbe je lang gai de lei, zai penui ruage I tewgaibe zene Ijipme je tewkahereu de lei; zai chipau chângge I ne ningnui je nguapat kai bei de lei.

⁶Chidadege â I ne ning peume je Ijip gene nguapat te lei, zai ningnui sungkling ge wangchang de lei; zai Kegiebe Sungkling riâ Ijipme ne hekun-timriang ramme benai hekun chingchuame je ngua lu Ijipme ne ningnui peume je guaka’nsa de lei.

⁷Zai penui ne Tingwang je kû gai bei dadege pa ne ningnui benai Ijipme kakge kemuîbe kai bei de lei, zai sungkling dui ne nupwang ze penui je naî ’nde ra tew gai bei de lei; zai Ijipme dage I ne ’ndaikau tew gai mei be ningnui mik ne ngau de lei, zai ningnui beting misongga ze hênamkang ge bam di de lei.

⁸Chidadege â Jordan gene kêda ’mbia bamme Amorme ram ge I ne ningnui je nguawang gai de lei; penui ne ningnui je ka’nggi de lei, zai I ne penui je ningnui ba ge pei gai bei de lei, dadege ningnui ne penui ram lu ’ndi de lei, ningnui suage penui je I ne tew’ngga ’ndi de lei.

⁹Chidadege â Moab gu heguang Zipporbe na Balakbe zuachu ze Israelme je ka’nggi de lei; zai ningnui je deset kai ra hang Beorbe na Balaambe je pa ne kû ra lang gai ze ’nnâ gai de lei,

¹⁰kane Balaambe kuâ I ne ’ngkinggailak tai de lei; chipauziegene pa ne ningnui je ’nnam gai bei de lei, chigum ze I ne ningnui je pe ba gene ’nripat kai bei de lei.

¹¹Zai ningnui Jordan ka ze Jeriko ge wangchang de lei, dadege Jerikome ne ningnui je ka’nggi de lei, zai Amorme, Perizme, Kanaanme, Hethme, Girgashme, Hibme, zai Jebusme ne du ningnui je ka’nggi de lei; zai penui je ningnui ba ge I ne pei gai bei de lei.

¹²Zai ningnui suage mi kehingbe I ne lang gai bei ze chize ne ningnui ruagene penui je kumtua ’ndi de lei, Amorme gu heguang kena jeu; ningnui gu hiazutkie ne du mak, zai hetu bai’mpi ne du mak lei.

¹³Ningnui ne tâtewhereugaimakbe heram ze, zai ningnui ne tewgaimakbe namdi ramme ze I ne ningnui je pei bei de lei, zai chige ningnui lung de lei; ningnui linggaimakbe grepchî merie ramme benai olib merie ramme rachî ningnui raiteu de lei,’ ze acheu zeu.

¹⁴“Chidaze chunage Tingwang je hingchi le lau, zai lungsang benai peling ne pe guâ ’nggua zu lau; Ijip ge benai ’Nggeuki gene katlam ’mbia ningnui peume ne ka’ngguabe hera ramme tuâpat ’ndu lau, zai Tingwang guâ ’nggua du lau.

¹⁵Zai ningnui ne Tingwang guâ ’nggua nei mak tizai â, châu guâ ’nggua ra mei be nemai ge kelâng le lau, ’nggeuki ’nzû ze katlam-giamram ge ningnui peume ne ka’ngguabe hera ramme je mei nune ningnui lungbe Amorme ram gu hera ramme guâ ’nggua ra mei be zeu; kane I benai a kiduîme â Tingwang guâ ’nggua gu lei,” ze kacheu de lei.

¹⁶Chidadege baudime ne kak ze, “Kêdabe hera ramme guâ ’ngguarabe ziegene Tingwang je sâugainerabe ze mâdau de peize chang se lau;

¹⁷anui paume benai anui kebangtewbe bâm Ijipram gene nguahanggaipeu, zai anui mikngau gene mâ-ningdaulakbe kedibe tewgaipeu zai anui tatbe ’mpuî leine ge benai anui tathedaugaime leine ruagene anui je reheikahekapeu â Tingwang anui Rapeu de lei;

¹⁸zai Amorme heram ge bamme ziemmename leine je Tingwang ne anui masua gene guatua ’ndi de lei; chipauziegene anui du Tingwang guâ ’nggua gu lei, pa â anui Rapeu daseu,” ze kacheu de lei.

¹⁹Kane Joshuabe ne baudime je, “Tingwang guâ ningnui ’ngguachi lak lei; pa â ka’nchibe Hera daseu; pa â ngauteube Rapeu lei; ningnui gu hedieka’ngkabe ramme benai hemui ramme pa ne lun ra mak lei.

²⁰Ningnui ne Tingwang je sâu ze hesangme gu hera ramme guâ ’nggua dizai â ningnui hangge keyibe tewgailube chângge du pa ’nreiwang ze ningnui je tewhereu gai gu, zai tew’ngga kam gai gu lei,” ze kacheu de lei.

²¹Zai baudime ne Joshuabe je, “Mak lei; kane Tingwang guâ anui ’nggua gu lei,” kacheu de lei.

²²Chidadege Joshuabe ne baudime je, “Pe guâ ’nggua ra hangge Tingwang je ningnui ne kelâng lu de lei be ningnui karai ge ningnui ne sakki ramme de lei,” kacheu de lei. Zai penui ne, “Anui ze sakki ramme de lei,” kacheu de lei.

²³Pa ne, “Acheuzaine â ningnui ruage bambe hesangme gu hera ramme ze tuâ ne lau, zai Tingwang Israelme Rapeu je ningnui lung pei gai lau,” kacheu de lei.

²⁴Zai baudime ne Joshuabe je, “Tingwang anui Rapeu je anui ’nggua gu lei, zai pe kuâ anui pheu gu lei,” kacheu de lei.

²⁵Chidadege chipau mai ge baudime dage Joshuabe ne samhatbe tew gai de lei, zai Shekem ge penui hangge hingde rawgaibe ramme benai hingde-sie ramme tew gai de lei.

²⁶Zai Joshuabe ne aipau sam ramme ze Hera gu hingde leisikuak ge raw gai de lei; zai pa ne tingchukâng kedibe tei lu, zai chize ’mpubang kangge, Tingwang bambe bâm ge sum gai de lei.

²⁷Zai Joshuabe ne baudime leine je, “Pie le lau, aipau chukâng zene anui hangge sakki chang ra de lei; aize ne Tingwang ne anui je ka’mpaube sam ramme leine seu lu daseu; chidaze aize ningnui hangge sakki chang gu lei, ningnui Rapeu dage tâ karasa tew gai mak ra hangge zeu,” kacheu de lei.

²⁸Chidadege Joshuabe ne baudime ’nteumena je penui kiram-ram ’mbe lang gai bei de lei.

²⁹Airamme leine chângge Nunbe na Joshuabe, Tingwang guâ ka’ngguapeu chai di de lei, kum haî kat ze kereu chang di zeu.

³⁰Zai penui ne pechu Gaas deiloa gene tingpeî ’mbia, Ephraim gu peloaram ge bambe pe ram Timnathsera ge bai gai bei de lei.

³¹Zai Joshuabe ringbe ting tâluî, zai Joshuabe sua ringtieme gechîngme ringbe ting leine ge Israelme Tingwang guâ ka’nggua de lei, zai Israelme hangge Tingwang ne tâtewgaibe leine chî ze bam lei.

³²Ijipram gene Israelme ne Josepbe ra ramme teihangbe ze, rangkâng haî kat ne Shekembe peu Hamorbe dagene Jakobbe ne luilube kedei bâm ’nchui ge bai gai de lei.

³³Zai Aaronbe na Eleazarbe chai di de lei; zai penui ne pe na Phinehabe gu namdi, Ephraim gu peloaram pe hangge peigaibe Gibea ge pechu bai gai bei de lei.