Read Zeme Naga JOSHUA 3 Bible Online

JOSHUA 3 - Zeme Naga bible

JOSHUA 3

¹Hechuasûn Joshuabe chu lu, Israelme leine je ngua lu, Shittim gene zuapat ti de lei; Jordan ’mbe penui wangkeu lu, penui kapatrabe suage chige ka’nnai de lei.

²Pakechumbe mai kam gai dege saibe ramme penui gu tejeîki bâm tatpela ze,

³penui je samdie gai ze, “Lebibe kiria tingkume bau ne Tingwang ningnui Rapeu gu hingdebung puabe ngau dezai, ningnui bambe bâm gene zuapat lu ze ningnui du sui ra lei,

⁴dezai ningnui tatrabe ’mpuî chî le ra hangge zeu, besua’ngka ge aipau ’mpuî ningnui tat kai mak rei daseu. Acheuleusedu ningnui benai chipau kak ze deutau ra lei, ningnui kak ze desâu sâu chang na riâ ra lei; pehia wang’nna se lau,” ze kacheu de lei.

⁵Zai Joshuabe ne baudime je, “Ningnui runne ningnui je tew’nchi le lau, ’nchuamai â Tingwang ne ningnui peireige tâningdaulakbe tew gai gu daseu,” ze kacheu de lei.

⁶Zai Joshuabe ne tingkume je, “Hingdebung ze teichu lu baudime suage tatpat raî du lau,” ze kacheu de lei. Zai penui ne hingdebung pua lu baudime sua raîtat ti de lei.

⁷Zai Tingwang ne Joshuabe je, “Aipau tingnaimikpui ge Israelme suage I ne ningchu teichu’ngngu gai gu lei, dezai Mosabe dage I bam gum ning dage du bam lei be penui chî le ra hangge zeu.

⁸Zai tingkume hingdebung puame bau je acheu ze nang die gai ra lei. ‘Jordan geukung ge ningnui wang dezai sapgîngrim bam ra lei,’ zeu,” ze kacheu de lei.

⁹Zai Joshuabe ne Israelme je, “Ailia wang ze Tingwang ningnui Rapeu kuâ seu le lau,” acheu bei de lei.

¹⁰Zai Joshuabe ne sa ze, “Aigene Keringbe Rapeu ningnui ruage la lei be ningnui chî gu lei, zai pa ne ningnui masua gene Kanaanme, Hethme, Hibme, Perizme Girgashme. Amorme zai Jebusme je kumpat kai sing gu lei,” kacheu de lei.

¹¹Pie le lau, kedeirei leine gu Tingwang gu hingdebung ningnui suage Jordan teika gai ra lei.

¹²Chidaze chuna ’mpeumi hangkereu ze kena Israelme zat gene zat kat ge ’mpeumi hangkat-kat lu le lau.

¹³Kedeirei leine gu Tingwang gu hingdebung puame tingkume pîdei Jordan gu hedui ge katâu gai dezai Jordan gu hedui luasau gai du lei, zai ’nrei ’mbene hedui luakeube ramme ze dût kat ze ’ndang gai du lei.

¹⁴Chigum ze baudime suage tingkume hingdebung puame je ngua lu Jordan ka ra baudime penui gu hetiampaîki gene zuapatbe luage,

¹⁵zai hingdebung puame Jordan geukung ge wangbe luage, zai tingkume hingdebung puame pî hezai peireige kagaibe luage (hechit ting tâluî Jordan geuki lua’nniâmba bam bam lei),

¹⁶’nrei ’mbene hedui luakeube ramme gîngmang gai di de lei, Adam namdi ge chize Zarethan hiage, Araba sungkling ’mbe luakeu ze ’nchaî sungkling ’mbe luakeube ze sau gai di de lei. Zai baudime Jeriko gene kat lam ’mbia kapat ti de lei.

¹⁷Zai Israelme gechangbe bâm ge kapatbe lua tingkume, Tingwang gu hingdebung puame â Jordan geuki sûngngangkelî gechangbe bâm ge sap ze bam lei, heramdeiname Jordan kapat kam mak tâneu.