Read Zeme Naga JOSHUA 4 Bible Online

JOSHUA 4 - Zeme Naga bible

JOSHUA 4

¹Heramdeiname Jordan kapat kam dadege, Tingwang ne Joshuabe je,

²“Baudime ruage pezat kat-kat gene ’mpeumi hangkat-kat pat ze hangkereu ze kena je ngua le lau,

³zai samdie gai be lau, ‘Ai Jordan geuki sûngngangkelî tingkume sapbe ’nchui singbe ai gene tingchukâng kereu ze kena lu le lau, zai nemai muî ningnui reûrabe bâm ge puatat ze heîkeu gai be lau,’ ze acheu zeu,” ze kacheu de lei.

⁴Dadege Joshuabe ne Israelme ruagene ’mpeumi hangkereu ze kena hezat ’nsangne gene pa ne sumgailume je kû gai de lei;

⁵zai Joshuabe ne penui je, “Tingwang ningnui Rapeu gu hingdebung suage raî ze Jordan geuki sûngngangkelî ’mbe gut ze, ningnui ’nteumena ne ningnui keîtoa ge tingchukâng pua kam le lau, Israelme zat riak luigum zeu,

⁶chidezai bechâng ningnui name ne, ‘Chi tingchukâng ramme ze ningnui hangge ’ndaikau hang lau?’ ze ’nneu dezai aize ne ningnui ruage mâge â chî ra teiliabe zat hang chang ra de lei.

⁷Chidezai Tingwang gu hingdebung suagene Jordan geudui luataptat ti de lei be penui suage ningnui salia ra lei; Jordan kabe luage Jordan dui luatap tat ti de lei. Chigum ze aipau tingchukâng ramme zene Israelme hangge chibamrabe chusum chang ra de lei betingbeta hangge zeu,” ze kacheu de lei.

⁸Tingwang ne Joshuabe suage rang gai bei ze, Joshuabe ne diegaibeibe luigum ze Jordan geuki zuilung gene Israelme penui riak tingchukâng kereu ze kena kuaipat te lei; zai chiramme ze penui tejeîbâm ge penui ne tei lu tat ze kai de lei.

⁹Zai Joshuabe ne Jordan geuki sûngngangkelî ge tingchukâng kereu ze kena sum gai de lei, tingkume hingdebung puame sapbe bam gezeu; zai nemai riâ chang ze chige chiramme la lei.

¹⁰Tingwang ne Joshuabe je baudime je salia ra samdiegaibe tâ ziemmename tew kam mak tâne chi tingkume hingdebung teime bau Jordan geuki sûngngangkelî ge sapkua bam lei, Mosabe ne Joshuabe je samdiegaibe luigum zeu.

¹¹Zai baudime penui kapatkamdibe luage Tingwang gu hingdebung benai tingkume ne baudime sua kapat raî di de lei.

¹²Reubenbe name benai Gadbe name zai Manasseme zat pa’mpime bau zene hereipuâ kai lu Israelme suage kapat raî de lei, Mosabe ne penui je ranggaibe luigum zeu;

¹³ziemmena chang hedai riâ gum, herei hang kedâlume Jeriko kâm ’mbe herei ra Tingwang suage kapat ti de lei.

¹⁴Chipau mai ge Tingwang ne Israelme zat leine suagene Joshuabe ngeutew’ndi gai bei de lei;

¹⁵Zai Tingwang ne Mosabe je,

¹⁶“Tingkume hingdebung teime je Jordan gene hang kam ra rang gai lau,” acheu bei de lei.

¹⁷Chidadege Joshuabe ne tingkume je samdie gai ze, “Jordan gene hang kam de lau,” acheu bei de lei.

¹⁸Zai tingkume Tingwang gu hingdebung puame Jordan geuki zuilung gene hang kam gai di, zai tingkume depûloa ’nzakchu kam gai dege Jordan geu dui pebâm ’mbe luawang dai ze bekung ramme naîting bam di de lei, besua’ngka bam gum zeu.

¹⁹Railangbe kêu hezie kereu mai ge Jordan gene haimena zuapat kam di de lei, Jeriko gene tingbia ’mbia gu heramrai Gilgal ge penui gu tejeîbâm hang tew de lei.

²⁰Zai tingchukâng kereu ze kena, Jordan gene penui teipatbe ramme ze Joshuabe ne Gilgal ge sum gai de lei.

²¹Zai pa ne Israel zatme je, “Bechâng dezai ningnui name ramme ne penui peume je ’nneu ze, ‘Ai tingchukâng ramme ze ’ndaikau hang lau?’ acheu dezai,

²²‘Israelme ai Jordan ge depûloa gene kapat lei,’ kacheube ze peize ningnui name chî ra rang gai ra lei.

²³Anui ’nggeuki kapat kam mak tâne Tingwang ningnui Rapeu ne chize tewchangkugaibeibe Kegiebe Sungkling peireige pa tâtew gai gum ze Jordan geuki ningnui kapat kam mak tânege Tingwang ningnui Rapeu ne chize tewchang gai kuâ bei daseu,

²⁴chidezai kedeirei ziemmena leine ne Tingwang ba â tâtewchibe lei be peize chî kam ra hangge zeu; dezai Tingwang ningnui Rapeu je betingbeta ningnui hingchi le ra hangge zeu,” ze kacheu de lei.