Read Zeme Naga JOSHUA 5 Bible Online

JOSHUA 5 - Zeme Naga bible

JOSHUA 5

¹Amorme gu heguangme leine Jordan ’nzû ze tingrun ’mbia ge bamme benai sungkling hiage Kanaanme gu heguangme bamme leine Tingwang ne Israelme Jordan kapat kam mak tâne hedui tewchanggaikuâbeibe sam seu lu dege, penui lungcheûtew ta di de lei, zai ’nningherârie bam di de lei, Israelme ziegeneu.

²Chipau ting ge Tingwang ne Joshuabe je, “Kêdareîne kereu lu ze Israelme je pakenabe hang rumgeten gai dai lau,” kacheu de lei.

³Chigum ze Joshuabe kêdareîne kereu lu ze Gibeath-haaraloth gene Israelme je rumkageten de lei.

⁴Ijip gene zuapatme ’mpeumi leine, herei gu ziemmename leine, Ijip gene penui zuapatlube châng hênamkang ge chaigaikamdibe ziegene Joshuabe ne ai rumkagetenbe tâ ze tew de lei.

⁵Zuapattime leine ne rumgeten lu leusede Ijip gene zuapatbe châng hênamkang gene lungkeume leine je â rumgeten mak rei lei.

⁶Ijip gene zuapatme, herei gu ziemmena pezat pelane Tingwang kuâ penui ’ngkingmakbe ziegene ’nggagaikamdibe riâ chang ze hênamkang ge penui kum hedai tat ze bam de lei; Tingwang ne anui peume je hatkaibe heram tungdui benai ’ngkuidui ne luabe heram ze Tingwang ne penui je ngau ra pei ra mak lei, ze penui suage hat kai ’ndi de lei.

⁷Chime bau kelei ge Tingwang ne teichugaidaibeime name bau je Joshuabe ne rumgeten gai de lei; penui je â tebeî ’mpuî gene rumgetenmakbe ziegene, penui je â rumgeten mak tai dadegeu.

⁸Pezatme gechu je rumgeten lu dege, penui jâm yi’nchi mak tâne penui gu hetiamki ge bam bam lei.

⁹Zai Tingwang ne Joshuabe je, “Ningnui dage nemai ge Ijipme gu ngauka’nnabe I ne lutua ’nde lei,” kacheu de lei. Zai chipau bâm ji nemai riâ chang ze Gilgal ze ku la lei.

¹⁰Israelme Gilgal ge wang’ndui ze tejeîki tew lu bambe ting ge, hekêu gu hezie kereu ze medai mai hegî ge Jeriko kâm gene penui tat’ntuahengi bam de lei.

¹¹Bechaibe mai tat’ntuahengi chângge, chipau mai sing ge heram gene tewpatlube rachî ze penui teu de lei, ’nduihîkaimakbe tingku benai chêu getalube zeu.

¹²Zai bechai mai gene manna ze peisau gai di de lei, penui gu mâ-himlei tewpatlube teutâu gai degeu, zai Israelme hangge manna ze ’ngga di de lei, chipau kum dege â, Kanaanram gu rachî penui teu di de lei.

¹³Joshuabe Jeriko taihia wangchang dege, pa ’ngngangrakchu pie gai de lei, zai pie le lau, ziemmena hangkatpeu ba ge hiazutkie hualimra lu sapbambe pa ngau de lei; zai Joshuabe wang lu pechu, “Nang ze anui hang mei nune anui je ’nggirabe kau lau?” kacheu de lei.

¹⁴Zai pa ne sa ze, “Mak lei, Tingwang gu hereikangmuiteipeu gum ze I aige wang lei,” kacheu de lei. Zai Joshuabe kedei ge pe ju ’ngkumkeu lu pechu kellum ze, “’Ndaikau tew ra a wangpeu ne pe guâ ka’ngguapeu je lang gai lau?” kacheu de lei.

¹⁵Zai Tingwang gu hereikangmuiteipeu ne Joshuabe je, “Ning pîchûp ning pî gene luak ne lau; nang sapbe bâm ze ka’nchi daseu,” kacheu de lei. Zai chipau luigum ze Joshuabe tew de lei.