Read Zeme Naga JOSHUA 6 Bible Online

JOSHUA 6 - Zeme Naga bible

JOSHUA 6

¹Chuna â Jeriko ze Israelme ziegene gut ze pat’nrui ta ra kainamting gai ’ndi de lei.

²Zai Tingwang ne Joshuabe je, “Pie le lau, I ne ning ba ge Jeriko zai pe gu heguang zai herei ge peranchime ramme pei gai lei,

³ningnui chi namdi ze tuaguâ ra lei, herei gu ziemmena leine luakat namdi ze tuaguâwang gai zeu. Chigum ze ningnui hezie serukne tew ra lei.

⁴Zai tingkume hangsena ne meli’nsei kie sena tei lu hingdebung suage sapkua ra lei; zai tingkume ne meli’nsei-kie ’mmut ze pasenabe mai dezai chi namdi ze lua sena tuaguâ ra lei.

⁵Zai penui ne meli’nsei kie ’mmutzia gai dezai meli’nsei kie ka’mmutbe kuâ ningnui seu-seube luage ningnui haimena ’nrung’nchi ze ’nrung ra lei, dezai kerie ze bakêu gu, dezai ziemmena leine besua luî ’nzeitun ze namdi ’mbe gut ra lei” ze kacheu de lei.

⁶Chigum ze Nunbe na Joshuabe ne tingkume ramme je kûwang lu penui je, “Hingdebung ze puachu le lau, zai tingkume hangsena ne meli’nsei kie Tingwang gu hingdebung suage peize tei le lau,” kacheu de lei.

⁷Zai pa ne baudime je, “Tatpat chu lau, namdi ze tuaguâ zu lau, zai hereimerua teime bau ne Tingwang gu hingdebung suage peize raîtat lau,” kacheu de lei.

⁸Zai Joshuabe ne diegaibeibe luigum ze Tingwang masuage tingkume hangsena meli’nsei kie ka’mmutbe ramme tei lu ’mmut ze hesua ’mbia tatpat te lei, chige Tingwang gu samhatkaibe hingdebung sui ka’mpam de lei.

⁹Zai tingkume mâkie ka’mmutme suage herei gu ziemmena ramme ne raîtat te lei, zai mâkie ’mmut bambe luagene hingdebung chaige kereîme tatwang de lei.

¹⁰Kane Joshuabe ne baudime je, “Ningnui â ’nrung se lau zai ningnui kuâ du peize seu se lau, ningnui mui gene sam du peize zuapat se lau, I ne ningnui je ’nrung ra ranggaibe mai dezai ningnui ’nrung ra lei,” kacheu de lei.

¹¹Dadege pa ne Tingwang gu hingdebung ze namdi puagua ra rang gai de lei, lua kat sâng lua kat hangge zeu; dadege penui tejeîki ge wang lu, tingmuî chige bam de lei.

¹²Zai hechuasûn Joshuabe chu de lei, zai tingkume ne Tingwang gu hingdebung puachu de lei.

¹³Zai tingkume ziemmena hangsename ne meli’nsei kie sena tei lu Tingwang gu hingdebung sua-sua ’mmutzutza ze tat te lei; zai herei gu ziemmena ne penui suage raîtat te lei, zai pechai ge kereîme bau ne Tingwang gu hingdebung chaige mâkie ’mmutzutza ze tat te lei.

¹⁴Zai pakenabe mai ge chi namdi ze luakat tuaguâwang gai lei, dadege penui gu tejeîki ’mbe wang de lei. Chigum ze hezie serukne penui tew gai de lei.

¹⁵Pasenabe mai hechua bara ge penui chu lu lua sena penui tingtie ge tewbe tak gene tuagua de lei; chipau mai runne penui namdi ze lua sena tuagua lei.

¹⁶Zai lua pasenabe geze â, tingkume ne mâkie ’mmut kai dege â, Joshuabe ne baudime je, “’Ngkiak chu lau, Tingwang ne namdi ze ningnui je pei gai ’nde lei.

¹⁷Zai namdi benai pelung ge bambe leine peize sia kam de ra hang Tingwang dage diepat kai ra lei; Rahable pe pum zuateupui benai pe kiduîme je runne tew’nring gai ra lei, hepâupaume anui ne langgaime je pa ne tewtimbaigaibeibe ziegeneu.

¹⁸Kane ningnui â mâ-tew’nsia ’nde ra diepatkai’ndibe ze lu se lau, chize ningnui tewbeibe ziegene Israelme gu sieki ge kahereube benai tewka’nsiabe teiwang gai mak ra hangge zeu.

¹⁹Kane gechâk benai gepût zai kangngâgeî benai hegeî ramme â Tingwang ki hangge ka’nchibe lei; chiramme â Tingwang ki heurâ hangge chang ra lei,” kacheu de lei.

²⁰Chigum ze baudime ka’ngkiak te lei, zai mâkie ramme ka’mmut te lei. Baudime mâkie kuâ seugap dege, baudime ’ngkiak-riau pat te lei, dadege â kerie ze bakêu tuâtiam bam di de lei, zai baudime namdi ’mbe hang di de lei, penui sua luî ’nzeitun zeu, zai namdi ze penui ne lu ’ndi de lei.

²¹Penui ne namdi ze tew’nsia kam lu, ’mpeumi benai ’mpuimi, gechîngme benai hename, getumsei, meli, zai hekunmerângne ramme je hiazutkie ne bi’nsia kam ’ndi de lei.

²²Zai Joshuabe ne heram ’ngkimpiegaibe ziemmena hangna je, “Pe pum zuateupui ki lam’mbe tatchu lau, zai chigene ’mpuimi hangkat je nguapat lau, zai pechu ningnui samhatkaibe luigum pe kiduîme gechu jeu,” ze kacheu de lei.

²³Dadege chi rehangme heram ’ngkimpieme hangna ze gut ti de lei, zai Rahable zai pe peu, pe pui zai pe sikiname zai pe kiduîme leine je nguapat kai bei de lei; zai pe guâ ka’ngguame je du penai ne nguapat ze Israelme gu sieki hela ge penui je kai bei de lei.

²⁴Zai hekuînam benai pelung ge kebambe leine ze hemi ne penui ne rû ’ndi de lei, gechâk, gepût, zai kangngâgeî benai hegeîli ramme runne Tingwang heurâ reîbe bâm ge penui ne kai ’ndi de lei.

²⁵Kane Rahable pe pum zuateupui benai pe kiduîme zai pe peu ki ge bamme leine je â Joshuabe ne tewchat mak ze ’nzuak kai bei de lei. Zai chipaupui â Israelme ruage nemai riâ lung ze la lei, Joshuabe ne Jeriko ’ngkimpie ra langgaime je pa ne tei’mbaigaibeibe ziegeneu.

²⁶Joshuabe ne chipau ting ge penui peireige deseu ze sam sa gai de lei, “Mige ne zuachu ze aipau hekuînam Jeriko ze tew’nsapchukadaibe kau peireige â, Tingwang masuage desiâng peize wangchang lau. Pe na meraibe keringbe ’ngga gai ze pa namdi ze tewdîmchu gu lei, zai pe na henalangpeu keringbe ’ngga gai ze keriekemui ramme tewchu gu lei,” ze acheu zeu.

²⁷Chigum ze Joshuabe dage Tingwang bam de lei; zai heram leine ge pe ji ne puigit bam di de lei.