Read Zeme Naga JOSHUA 7 Bible Online

JOSHUA 7 - Zeme Naga bible

JOSHUA 7

¹Kane diepatkai’ndibe merua peireige Israelme telingkuaklak ti de lei; Juda zat ge Zerabe na, Zabdibe na, Karmibe na, Akanbe ne diepat’ndibe merua gêsa â lutat ’ndi dadegeu; zai Tingwang lumpumbe Israelme peireige wangchang de lei.

²Joshuabe ne Jeriko gene Beth-aben taige, Bethel gene tingbia ’mbia bambe Airam ’mbe ziemmena je lang gai ze “Hang ze heram ze ’ngkimpie gai ni lau,” kacheu de lei. Zai penui tat ze Ai keloa ze ’ngkimpie de lei.

³Zai penui wang dai lu Joshuabe je, “Peize ziemmena ’nteumena ne hang se lau, kane ziemmena chang na, chang chum riâ runne hang ze Ai je peize ’nggi lau; ’nteumena je â peize hanghereu se lau, chige lungme â ziemmena gechâmne runne daseu,” ze kacheu de lei.

⁴Dadege â penui ruagene ziemmena chang chum riâ hang de lei; dadege Ai ge bamme sua gene penui pak ti de lei.

⁵Zai penui ruagene ziemmena himreu seruk riâ je â Ai ge bamme ne tewchat ’ndi de lei, zai Shebarim keriekemui sua riâ sing ze penui je gua’nsachang de lei, zai pegap gene penui je bichat ’ndi de lei. Dadege baudime â penui lungchêutew ta di de lei, zai hedui gum ze penui lung ze muai gai di de lei.

⁶Dadege â Joshuabe pe paî hit te lei, zai pa benai Israelme ruage gechîngme hegî riâ chang ze Tingwang gu hingdebung suage pa kedei ge kâu’ngkumkeu gai lu, hegî riâ chang ze tuâ’ngkum bam lei, pa benai Israelme ruage gechîngme zeu; zai penui peî ge kedeinia ka’nnuk te lei.

⁷Zai Joshuabe ne sa ze, “Hei, Tingwang Hera gau, ’ndaitew ra nang ai ziemmename je Jordan nguaka gai lau, Amorme ba ge pei gai ze anui je tew’nsia gai ra ne mei? Chiramme ze de mei, Jordan gene katlam lung ra anui kaheguîbe zeu!

⁸Hei Tingwang, ’ndaikau I sa daichi ra lau, Israelme penui teureime suagene ’nnuktibe luage zeu!

⁹Kanaanme benai heram lungge bamme leine ne aize seu kam lu anui je tuaguâ gu de lei, dezai kedeirei gene anui ji lutua ’ndu da, zai ning ji kedibe hangge nang ’ndaikau tew gai ra lau?” ze kacheu lei.

¹⁰Tingwang ne Joshuabe je, “Chu de lau, ’ndaitew aigum ze ning ju ’ngkumgit bam lau?

¹¹Israelme hemui gai di de lei; a gu hingde penui je I diegaibe ze hede ze ’ngka di de lei; penui ne diepat’ndibe merua ramme lu ’ndi de lei; hega lu ze, zai karasa sa lei, zai chiramme penui gu merua ruage kai ’ndi de lei.

¹²Chipauziegene Israelme penui teureime masuage sapchi lak ti de lei; penui teureime sua gene penui pak’nnuk ti de lei, tew’nsiarabe merua penui changdibe ziegeneu. Ningnui ruagene diepatkai’ndibe merua ningnui ne tew’nsia ’nde mak tâne ningnui ruage I bam ra mak lei.

¹³Chu le lau, ziemmename je tew’nchi ze, ‘ ’Nchuamai hangge ningnui runne ningnui je tew’nchi le zu lau; Tingwang Israelme Rapeu ne aigum ze rang de lei, “Hei Israelme gau, ningnui bau ruage diepatkai’ndibe merua la lei; ningnui ruagene chi diepatkai’ndibe merua ze lutat mak tâne â ningnui ze ningnui teureime je saptingkangchi lak lei,” acheu zeu.

¹⁴Chipauziegene ’nchuamai hechua dezai ningnui je ningnui zatme ne ngua lu wang’nna gai ra lei; zai chige Tingwang ne teipatkaibe hezat ze kelak ramme ne nguawang ra lei; zai Tingwang ne teipatkaibe kelak ze heki’mpaume ne nguawang ra lei; zai Tingwang ne teipatkaibe heki’mpaupeu je ziemmena hangkat ne nguawang ra lei.

¹⁵Zai chi diepatkai’ndibe merua lutattipeu je â hemi ne rû ra lei, pa benai pe gu changbe leine jeu, pa ne Tingwang gu samhatkaibe ’ngkabeibe ziegene, zai Israelme ruage mi ’ngngam-kadesangbe tâ zat tewgai’ndibe ziegeneu,’ ze acheu sa lau,” ze kacheu de lei.

¹⁶Chigum ze Joshuabe hechuasûn chu lu, Israelme pezat-zat je nguawang gai de lei, zai Judame zat je teipat kai de lei;

¹⁷zai pa ne Juda zat je du nguawang de lei, zai pa ne Jera kiduîme je teipat kai de lei; zai Zerame kikelak ramme ge ’mpeumi ramme je nguawang gai de lei, dadege Zabdibe je teipat kai de lei;

¹⁸zai pa ne pe kiduîme ’mpeumi ramme je nguawang gai de lei, dadege Juda zat Zerabe na, Zabdibe na, Karmibe na Akhanbe je teipat kai de lei.

¹⁹Dadege Joshuabe ne Akhanbe je, “A na gau, Tingwang Israelme Rapeu dage pengêudibe pei lau, zai pechu getoabe pei gai lau; zai nang ’ndaikau tew gai mei be achu salia lau; a dagene mâ de ’ngkim se lau,” kacheu de lei.

²⁰Zai Akhanbe ne Joshuabe je kak ze, “Pelingsing de lei, Tingwang Israelme Rapeu dagene I hemui gai ’ndi de lei, zai aipau ze I ne tewgai’ndibe de lei:

²¹Hereichâ I ngaube ruage Shinar gene mechuapui peluiyibe, gepût shekel haî na, zai gechâkgeî shekel rengeu, I gesutlak ti ze chiramme lu gai ’ndi de lei, zai pie le lau, gepût ne besîng ge kai lu ze anui gu paîki lung kedei ge bai gai ne lei,” kacheu de lei.

²²Dadege â Joshuabe ne ziemmena lang gai de lei, zai paîki ’mbe penui paktat ti de lei; zai pie le lau, chize pe gu paîki ge gepût ne besîng ge kai lu ze bai gai ’ndi de lei.

²³Zai penui ne chiramme paîki gene lu lu Joshuabe benai Israelme dage teiwang gai bei de lei; zai penui ne Tingwang masuage chiramme kai bei de lei.

²⁴Zai Joshuabe benai Israelme leine ne, Zerabe na Akhanbe je ngua lu, zai gepût benai mechuapui, zai gechâktui, zai pe name ’mpeumi ramme benai ’mpuimi ramme, zai pe gu getumsei ramme, zai hekunmerângne ramme, zai meli ramme, pe gu paîki, zai pe dage bambe leine Akor kâm riâ penui ne teihang gai bei de lei.

²⁵Zai Joshuabe ne sa ze, “’Ndaitew ze anui peireige kahereube nang ne teiwang gai lau? Tingwang ne nemai kahereube ning peireige teiwang gai de lei,” kacheu de lei. Zai Israelme leine ne tingchu ne pechu tuâchat te lei; penui ne chime bau je hemi ne rû ’ndi de lei, zai tingchu ne penui je tua de lei.

²⁶Zai penui pe peireige tingchukoa kedibe koagaibe ze nemai riâ du larei lei; chidezai Tingwang pe lumpum-kadesangbe sau gai de lei. Chidadege nemai riâ chang ze chipau bâm ji ze Akor kâm ze ku lei.