Read Zeme Naga JOSHUA 8 Bible Online

JOSHUA 8 - Zeme Naga bible

JOSHUA 8

¹Zai Tingwang ne Joshuabe je, “Hing se lau, zai ning lung du chei se lau; herei gu ziemmena leine je ngua le lau, zai Ai ’mbe hang du lau; pie le lau, Airam gu heguang je ning ba ge I pei gai ’nde lei, pe gu ziemmename, pe gu namdi, zai pe gu heram du pei gai ’nde lei;

²zai Ai benai pe gu heguang je nang ne Jeriko benai pe gu heguang je tew gum ze tew ra lei; pe gu hereichâ benai kaurui ramme ze ningnui gu merua hangge lu le lau; pechai ’mbene namdi ze tuaguâ ra teleu le lau,” kacheu de lei.

³Dadege â Joshuabe benai herei gu ziemmename leine Ai ’mbe tat ra hang zuachu di de lei; zai Joshuabe ne peranchibe kau ramme je kelâng lu, tingmuî ne penui je langpat kai de lei.

⁴Zai pa ne penui je die gai ze, “Pie le lau, namdi je ’nggi ra hangge pechai ’mbene kuâ le lau; zai namdi gene tat’ndeu’mpia se lau, kane ningnui runne kedâ lu ze, kuâ lau;

⁵zai I benai a dage bamme leine ne namdi ’mbe wang gu lei. Zai anui je ’nggi ra tingtie gum ze penui pat dezai, penui ngaube gene anui pak tu lei;

⁶dezai anui je penui ’nsatat ku lei, namdi gene penui je anui nguatat kam mak tânege zeu; dezai penui acheu sa ze, ‘Anui dagene penui tingtie gum pak pak lei,’ ze acheu gu daseu. Chigum penui dagene anui pak tu lei;

⁷dezai ningnui ka’mbaibe gene zuachu lu namdi ze lu ra de lei; Tingwang ningnui Rapeu ne chize ningnui ba ge pei gai gu daseu.

⁸Zai chi namdi ze ningnui ne lu lu dezai namdi ze ningnui ne hemi ne rû ne lau, Tingwang ne rangbe luigum zeu; pie le lau, I ne ningnui je die gai de lei,” kacheu de lei.

⁹Chidadege â Joshuabe ne penui je langpat kai bei de lei; zai lîmkuarabe bâm ’mbe penui tat ti de lei, Ai gene tingbia ’mbia Bethel benai Ai kakge penui jeikua de lei; kane Joshuabe â baudime ruage chipau mai muî â bam di de lei.

¹⁰Zai Joshuabe hechuasûn chu lu ziemmena ramme je kû lu, Israelme gu gechîngme ramme je ngua lu ze, baudime sua raî ze Ai ’mbe hang di de lei,

¹¹zai herei ziemmena pe dage bamme leine hang di de lei, zai namdi taihia ’mbe wanghechut ti de lei, zai Ai gene tingpeî ’mbia penui bam lei, Ai benai penui kakge ’nggeubakchuak bambe gezeu.

¹²Zai ziemmena chang mengeu riâ gum ze pa ne ngua lu, namdi gene tingbia ’mbia Bethel benai Ai kakge lîmkua ra kai bei de lei.

¹³Dadege penui ne hereikangme bâm hangge teleu gai bei de lei, penui bâm singbe namdi gene tingpeî ’mbia zai namdi gene tingbia ’mbia du reîkua ’ndi de lei. Kane Joshuabe â bekâm ge chipau mai tingmuî â bam di de lei.

¹⁴Zai Ai gu heguang aize ngau lu dege, pa benai pe gume leine namdi ge bamme, Israelme je herei gene hedau ra Araba ’mbia kelua ze tatkeu di de lei; kane pa â namdi chai ’mbene pechu herei lîmkua la lei be chî mak lei.

¹⁵Zai Joshuabe benai Israelme leine â, penui je lakbeibe helîtew ze penui ngaube gene hênam ’mbia pak kai kam di de lei.

¹⁶Dadege namdi ge bamme leine je penui je ’nsa ra hangge kûwang’ndui gai de lei, zai penui Joshuabe je ’nsatatbe gezene namdi gene chime je nguatat’ndeu sua ra ngau di de lei.

¹⁷Ai benai Bethel ge Israelme je ’nsatatkaimakbe kau hangkatte ga di de lei; penui namdi ze sâulatla gai nan ze Israelme je ’nsatat kam di de lei.

¹⁸Dadege Tingwang ne Joshuabe je, “Ning ba ge hengeu teibe ze Ai ’mbia getua’nrik kai lau; chize ning ba ge I pei gai gu daseu,” kacheu de lei. Zai Joshuabe pe ba ge hengeu bambe ze namdi ’mbia getuapat kai de lei.

¹⁹Chidadege lîmkuame bau ze penui bâm gene kelua ze zuapat ti de lei, zai pa pe ba getuapat gap kai dege, penui ne namdi ge pakgut ze chize lu ’ndi de lei; zai penui ne keluakkelet namdi ze hemitua gai ni de lei.

²⁰Dadege Airam name ’nreiwang pie gai dege, pie le lau, namdi gu mika ze tinggîm riâ chuchang di de lei; penui ailia, chilia du paktatchi ta di de lei, hênamkang ’mbe pakkaidime bau ze penui je guaka’nsame bau tailam heletwangdaibeibe ziegeneu.

²¹Zai Joshuabe benai Israelme leine ze herei lîmkuame bau ne namdi ze lu’ndibe ngau lu dege, zai namdi rube mika chube ngau lu dege, penui helatwang dai lu Airam name je tewchat kam ’ndi de lei.

²²Zai hanggesame namdi gene penui je ’nggi ra zuapat te lei; chigum ze penui ze Israelme zuilung ge bam di de lei, hanggesame ailia hanggesame chilia acheu zeu, penui je mî de ringpat ra pei mak zai pak’mbia ra pei mak ze tewchat kam ’ndi de lei.

²³Kane Airam gu heguang je â ’nring nîm lu, Joshuabe dage teiwang gai bei de lei.

²⁴Israelme ne Ai ge lungme je ’nchumie ze hênam ’ndupuangbe gene gîchat kam lu nâlangbe riâ chang ze penui gu hiazutkie gene tewchat kam lu dege, Israelme leine Ai ’mbe helatwang dai ze, hiazutkie ne penui je tewchat kam ’ndi de lei.

²⁵Zai chipau mai ge Airam name ’mpeumi benai ’mpuimi chaidime pelane chang kereu ze kena lei.

²⁶Ai ge lungme je tewchat’nzâu ne mak tâne Joshuabe ne pe ba ge hengeu getuasau mak ze bam bam bei dadegeu.

²⁷Tingwang ne Joshuabe je diegaibe luigum ze Israelme ne chi namdi gu kaurui benai sutlube merua ramme je hereichâ hangge lu gai de lei.

²⁸Zai Joshuabe ne Ai keloa ze rû kam ’ndi de lei, zai chize betingbeta hang tew’nsia zut kai ’ndi de lei, nemai riâ acheu ze bam gum zeu.

²⁹Zai pa ne Ai ram gu heguang je hegî riâ hingbang ge keî’nchie gai bei de lei; zai tingnaimik hegî dadege Joshuabe ne die gai bei ze penui ne pe pum ze hingbang gene likeu lu, namdi gu keriekemui ge tuâ gai bei de lei, zai pe peireige tingchukoa kedibe koa gai de lei, zai chize nemai riâ du larei lei.

³⁰Israelme Rapeu Tingwang hangge Joshuabe ne Ebal Loa ge herâtewbe bâmra tew gai de lei,

³¹Mosabe gu hingde leisikuak ge rangdiakkaibe luigum zeu. Mosabe gu hingde leisikuak ge, “Mâdau du hegeîkelei huachugaimakbe chi tingchukâng ge tewbe herâtewbe kaira” acheu ze rawgaibe luigum ze Israelme je Tingwang guâ ka’ngguapeu Mosabe ne diegaibeibe luigum zeu; zai penui ne chipau peirei gene Tingwang hangge rûkambe-râtewbe peipat kai ze, desieyibe-râtewbe tew gai de lei.

³²Zai chige Israelme kengaube sing gene Mosabe gu hingde leisikuak ge pa ne ranggaibe sam tingchu peireige Joshuabe raw gai de lei.

³³Zai Israelme leine, hesangme bamgaileume, zai gechîngme, saibe ramme, zai samramme bau ze Lebi kiria zat tingkume Tingwang gu samhetkaibebung puame sua sing ge katlam ’mbe sap, zai penui ruage pa’mpi ze Gerizim loa suage sap, zai penui ruage pa’mpi Ebal loa suage sap lei, Israelme je ’nnam gai ra keraîbe ting gene Tingwang guâ ka’ngguapeu Mosabe ne diegai’ndibe luigum zeu.

³⁴Zai chipau châng dege hingde leisikuak ge rawgai’ndibe luigum ze hingde gu sam ramme pelane, ’nnamgaibe benai desetkaibe rasam ze pa ne kiâliâ gai de lei.

³⁵Mosabe ne diegaibe sam leine Israelme wangka’nduime hepui-hena zai hesangme penui ruage bamme baudime suage Joshuabe ne kiâpat kai mak tadibe sam mâ de ga lei.