Read Zeme Naga JOSHUA 9 Bible Online

JOSHUA 9 - Zeme Naga bible

JOSHUA 9

¹Zai heguangme leine Jordan ’nzû ze peloaram ge bamme zai bekâmram Sungkling kedibe kung ge Lebanon ’mbia ge bamme Hethme, Amorme, Kanaanme, Perizme, Hibme zai Jebusme ne aize seu lu dege,

²penui Joshuabe benai Israelme je ’nggi ra muikattew ze wang’ndui gai de lei.

³Kane Gibeon ge lungme ze Joshuabe ne Jeriko benai Ai keloa ge tâtewgaibe ramme seu lu dege,

⁴penui lam gene ningching kesiabe tak gene tâtew ze penui tat lu teu ra sak ra kedâ gai de lei, zai penui gu hekunmerângne ching ge miseigiriapaî siadibe ramme, hemeigeibung ramme siadibe getakdailube ramme kai de lei,

⁵zai pîchûp kaitadibe getak-ratrikbe ramme penui pî ge rua gai zai kaitadibe paîni ramme kai de lei; zai penui teurabe kerua ramme ze du changku di, zai rehâmtaupû tai de lei.

⁶Zai Joshuabe bambe bam Gilgal ’mbe penui tat lu, pechu benai Israelme je, “Anui â heram kedeu ’mbene wang de lei; chidaze chuna anui dage samhat kai lau,” ze kacheu de lei.

⁷Kane Israelme ne Hibme je, “Ningnui â anui ruage lungme lau zeî lau; ’ndaigum ze ningnui dage anui samhatchi ra lau?” acheu bei lei.

⁸Penui ne Joshuabe je, “Anui â ning guâ ka’ngguame bau lei,” kacheu de lei. Zai Joshuabe ne penui je, “Ningnui chaume lau?” zai ningnui ’ndai’nggene wang lau? kacheu de lei.

⁹Penui ne pechu, “Tingwang ning Rapeu ji gene ning guâ ka’ngguame bau heram kedeu ’mbene wang de lei; pe rasam pauchangbe benai Ijip ge pa ne tâtewbe leine rasam

¹⁰benai Amorme heguang kena Heshbon heguang Sihonbe benai Bashan heguang Ogbe, Jordan ’nzû ze Ashtaroth ge bambepeu hangna peireige pa ne tâtewgaibe rasam anui ne seuchang di dadegeu.

¹¹Dadege anui gu herakiangna gechîngme zai heram lungge bamme leine ne anui je acheu sa ze, ‘Tebeîtew ra hangge ningnui ba ge ka’nnangbe leine tei le lau, zai tat ze penui je hedau gai lau; zai penui je, “Anui â ningnui guâ ka’ngguame bau lei; chuna wang ze anui dage samhat kai lau,” ze penui je acheu be lau,’ ze anui je kacheu de lei.

¹²Aige anui gu tingku la de lei; anui tebeîtewbe ge anui gu teka hang anui ki gene lube lua â lumbup ze lu de lei, ningnui tailam zuamie ra tatchube mai geze aî, kane chuna â pie le lau, chuna changku zai rehâmtaupû la de lei;

¹³ai hemeigeibung ramme ze du anui kaipuigaibe lua â rechidabe kau da, kane pie le lau, chiramme du pâng kam de lei; anui tebeî acheutie tatbe gene anui paîni zai pîchûp ramme du sia kam de lei,” ze kacheu de lei.

¹⁴Chidadege â Tingwang dage â penui mâ de sam’nneu mak ze merua ramme penui ne lu gai ’ndi de lei.

¹⁵Zai Joshuabe ne penui benai desieyibetew gai lu, penui benai samhat kai ze, penui je lung ra pei bei de lei; zai besuitewme benai baudime ne samhat kai de lei.

¹⁶Penui benai samhatkailube gene hezie kechum ne chang dege, chime ze penui huâzieme lei be, zai penui ruage bamme bau lei be penui seu lu de lei.

¹⁷Zai Israelme zuapat ze pakechumbe mai ge chime bau gu namdi ge wangchang de lei. Chunage penui gu namdi ramme ze â, Gibeon, Kephira, Be-eroth zai Kiriath-jearim airamme de lei.

¹⁸Tingwang Israelme Rapeu dage baudime gu besuitewme ne samhatkai’ndibe ziegene Israelme ne penui je tewchat mak tai de lei. Dadege baudime ze besuitewme peireige penui telum ze bam de lei.

¹⁹Kane besuitewme bau ne baudime je, “Tingwang Israelme Rapeu ji gene anui ne penui dage samhat kai ’nde lei, chuna â penui je tewchat dai lak te lei.

²⁰Aize penui hang anui tew gai ra de lei, penui peize ring ze bam lau, anui ne penui dage samhatkai’ndibe ziegene peize anui peireige helumpumbe wang mak ra hangge zeu,” ze kacheu de lei.

²¹Zai penui ruage besuitewme ne sa ze, “Peize penui ring ze bam lau,” kacheu de lei. Chidadege â baudime hangge hechingriame zai hedui tuakme hang penui chang di de lei. Penui ge besuitewme ne ranggaibe luigum zeu.

²²Joshuabe ne penui je kûwang lu, pa ne penui je, “’Ndaitew ningnui anui je choa ze, ‘Anui â ningnui dagene kedeu ’mbe bambe kau lei,’ ze kacheu lau, anui ruage ningnui lung lu zeu?

²³Chuna chipauziegene ningnui je deset kai ’nde lei, zai ningnui ruage hanggesame â kebang chang ze bam bam gu zai a Rapeu ki hangge hanggesame â hechingria zai heduituakme chang gu lei,” ze kacheu lei.

²⁴Penui ne Joshuabe je kak ze, “Tingwang ning Rapeu ne pe guâ ka’ngguapeu Mosabe je ningnui je heram pelane pei gai ra, zai ningnui masua gene heram ge lungme leine je tew’nsia kam gai ra die gai de lei be ning guâ ka’ngguame je rangsinggaibeibe ziegene de lei; chigum ze ningnui ziegene benai aize anui ne tewgai’ndibe ziegene anui hing-desang di de lei.

²⁵Zai chuna â pie le lau, anui â ningnui ba ge la de lei; ningnui ne anui peireige tew ra yibe tak tew gai du lau,” kacheu de lei.

²⁶Zai pa ne aize penui hangge tew gai bei de lei; zai Israelme ba gene penui je ’nripat kai bei de lei; zai penui ne chime je tewchat mak tai lei.

²⁷Kane Joshuabe ne penui je baudime hangge benai Tingwang gu aipau tâ nemai riâ tewtat bam ra Tingwang ne kelânggaibe bâm ge herâtewbe-kaira hangge hechingriarame benai heduituakrame hangge tew gai bei de lei.