Read Zeme Naga 2 THESSALONIKAME 1 Bible Online

2 THESSALONIKAME 1 - Zeme Naga bible

2 THESSALONIKAME 1

¹Paulbe, Silbanasbe benai Timothibe dagene, Hera anui Peu benai Heguang Isua Krista gene Thessalonika herakiangname dage,

²Hera Bepeu benai Heguang Isua Krista dagene ka’nggiabe benai desieyibe ningnui dage peize bam lau.

³Mi puiname gau, ningnui keneibe ’ntuachu-desang ze bambe, zai ningnui ’nteumena ne kat-kat je kehungbe pung-ze-sa ze bambe ziegene ningnui hangge Hera dage pehî’nsangne misuiyibe rasam anui ne pau gai ze bam sing ra yising di de lei.

⁴Chipauziegene ningnui je tewsabe ramme benai tewkahereube ramme ningnui lie ze bambe leine ge, ningnui ne ’ntiprip ze bambe benai keneibe bambe hangge Hera gu herakiangna ramme ruage anui runne kedikuâ-kua ze bam de lei.

⁵Ningnui kahereube liebe hangge ningnui je Hera gu heguangram gu kebuime hang tew gai be ra hangge aize Hera gu samrambe kapelingbe tak teilia de lei—

⁶ningnui je tewkahereume je tewkahereube zene penui je peigaidaiberabe ze Hera ne ka’nzeibe hangge chak kai,

⁷zai Heguangpeu Isua je tinggîm ’mbene pe gu angelme tâtewchime dage hemigetaube melei gene liâ gai dezai tewhereugaibeime, chi ningnui je anui dage nguasautemi ra peigairabe zeu,

⁸Hera je chimakme benai anui Wangpeu Isua gu gospel kuâpheumakme peireige hekûm lu zeu.

⁹Penui â betunmakbe kechaibe gu tewsabe benai Heguangpeu dagene zai pa tâtewchibe ngêudibe gene lupatkaiberabe ze hereulie ze bam gu lei,

¹⁰anui ne ningnui dage kerangbe sam ramme ’nnum’mmibeibe ziegene pe gu ziemmena ka’nchime ne hengêutew’ndi ze bam de ra, zai pa wangkeube mai dezai ’nnum’mmilume leine dagene ’nningdaulak ze bam de ra hangge zeu.

¹¹Aize helung ge kai lu ze, peize Hera ne pa kûgaibe ge ningnui je kebuibe kau hangge chak kai ra, zai mâ-keyibe tew ra kaibe benai keneibe tatew leine pe gu tâtewchibe rezie gene tewpui gai ra pehî’nsangne ge anui ne ningnui hangge kellum gai bam lei,

¹²chidezai anui Rapeu benai Heguang Isua Krista ka’nggiabe luigum ze Isua ji ngeu-tew’ndi gai be ra, zai pa ge ningnui ngeu-tew’ndi gai be ra hangge zeu.