Read Zeme Naga 2 THESSALONIKAME 2 Bible Online

2 THESSALONIKAME 2 - Zeme Naga bible

2 THESSALONIKAME 2

¹Chunage anui Wang Isua Krista wangkeurabe benai pechu anui hedau ra wang’nduirabe mai hang deu ge mi puiname gau, ningnui je anui kiam lei,

²chi Heguangpeu gu tingnaimikpui â wangchang de lei, bei be ziegene Herui ne mei nu sam ne mei, nune anui dagene patbe hang chakkaibe samkela zene mei ningnui je kelua ze helung tewkeleulia gai mak ra, zai helung tewkeheu gai mak ra hangge zeu.

³Peize mâ-mâ gene du ningnui je duai ze bam se lau; ka’nggibe zene wangrai lei maktizai â, zai sia’nzâugaiderabe na, hingde teimakbe kau ziemmena je liâ gai lei maktizai â chipau tingnaimikpui ze wangchang ra mak daseu,

⁴pe runne pa ze Hera de lei ze paurua ze Hera gu kellumki ge pa ne pe bâm chang ze ’ntau ra chi hera acheu ze kube leine mei nune teikakellumbe zat leine mei je ’nggi ze pe runne pechu ’nning’nditau gai ze bambepeu zeu.

⁵Ningnui ruage I bambe ting ge du aize I ne ningnui je ranggaibe chî ta di de mei?

⁶Zai pe gu beting ge pechu peize liâgaiberabe hanggene ’ndaikau ne chunage pechu nam mei be ningnui ne chî lei.

⁷Hingde gabe gu mi ’nningchilakbe tatew â kenû ne du tâtew ze bam di de lei; kane pechu nampeu ze ’mpuîki gene pa hela pat te mak tâne chize pa ne acheu tew bam gu daseu.

⁸Zai hingde gabe kau je liâpat kai gu lei, zai Heguang Isua ne pe mui gene pe chui patbe zene pechu ’mmutchat kai gu lei, pa ne liâ ze wangkeube mai gezeu.

⁹Satan gu tatew gene hingde gabe kau wangbe ge tâtewchibe rezie benai pahelîtewbe gene ka’nchetbe teiliabe ramme benai ningdaulakbe ramme,

¹⁰zai gagaiderame hangge keduaibe benai kesiabe ramme bam gu lei, penui â ring le ra hangge samsang je hunggailak daseu.

¹¹Chipauziegene mâ-karasa ramme penui ’nnum’mmi ra Hera ne mâ-pahelîtewbe zat kedibe ramme penui peireige lang gai bei de lei,

¹²chidezai samsang je ’nnum’mmi mak ze kane mâ-pelingtewmakbe peireige penui suiyime je tew’ngkui kam gai be ra hangge zeu.

¹³Kane mi puiname, Heguangpeu ne hung-desang ze bamme gau, ningnui hangge anui ne pehî’nsangne Hera dage misuiyibe sam pau gai bam ra chang di de lei, Herui ne tew’nchigaibe gene benai samsang ge ’nnumka’mmibe gezene tew’nring gai be ra hang bepîbang gene Hera ne ningnui je kelâng’ndibe ziegeneu.

¹⁴Aipau geze ningnui je anui gu gospel gezene kû gai bei de lei, chidezai anui Wang Isua Krista ngêudibe ningnui dage bam le ra hangge zeu.

¹⁵Chidaze mi puiname gau, mi mui sam ne mei nune samkela rawgaibe ne mei ze anui ne ningnui je geteigaibe chi mi sie teipelakeube tei’mmi ze chige sap’ntip ze bam lau.

¹⁶Chunage anui Wang Isua Krista sing ne, zai Hera anui Peu, anui je hungbeipeu zai anui je betunmakbe katemibe peibeipeu zai ka’nggiabe gene keyibe kaheguîbe peibeipeu ne

¹⁷peize ningnui lungsui tew’nta gai ze tâ-keyibe tewbe leine benai sam ge ningnui lung ramme tew’ntip kai be lau.