Read Zeme Naga 2 THESSALONIKAME 3 Bible Online

2 THESSALONIKAME 3 - Zeme Naga bible

2 THESSALONIKAME 3

¹Nâlangbe ge mi puiname gau, anui hangge kellum gai lau, dezai ningnui ruage gum ze Heguangpeu gu sam ge ditatkelua ze duîtat bam ra,

²zai anui je helungriaksiame benai ziemmena kesiame dagene lupat kai be ra hangge zeu; ’nteumena ne keneibe ga daseu.

³Kane Heguangpeu â lungsangtew-desang la lei; pa ne ningnui ran tew’nchi gai ze, zai kesiabe gene ningnui je reî’mmi ze bam gu lei.

⁴Zai Heguangpeu gene anui ne ningnui je ’nnumtew-sing ze bam lei, anui ne diegaibe zat ramme ningnui ne tewbe zai tewbamrabe hangge zeu.

⁵Peize Heguangpeu ne Hera gu kehungbe lam’mbe zai Krista gu ’ntiprip ze bambe lam’mbe ningnui lung ramme tei’nrei gai be lau.

⁶Mi puiname nung gau, ningnui sikina mi-mige renga ze lungme, anui dagene herasie teipelakeube ningnui ngaulube ge helualakme dagene bamchâm de ra anui Wang Isua Krista ji gene ningnui je anui ne samdie gai de lei.

⁷Ningnui ne anui helî heli ra yibe tak ze ningnui ne du chî kam la daseu; ningnui ruage anui bambe tingge anui â renga ze bam mak lei,

⁸pemî pei mak ze anui â mî gu hetak teu mak lei, kane ningnui mi-mi je de tewhereu gai mak ra hangge anui â kemuî-keba hereu ze ’nrî ze tâtew bam lei.

⁹Chize anui hangge ka’ngngâbe ngau ra besie gene changmakbeibe ziegene mak ze, kane anui tatew tak gene tewliabe ningnui je peigairabe hanggene de lei.

¹⁰Anui ne ningnui dage bambe ting ge du, anui ne aipau samdie ze ningnui je pei gai de lei: Mige ne tâtew mak ra zai â, peize pechu teu se lau, kacheube zeu.

¹¹Ningnui ruage hanggesame â, mâ tâ de tew mak ze miramme tâtewbe ge tewkebuak ze, hengazek ze bambe rasam anui seu daseu.

¹²Chunage aigumbe kau ramme je peize penui hekuâkie mak tâtew ze penui runne hiteu ze bam ra Heguang Isua Krista gene anui ne samdie gai ze gecheu’nrak kai de lei.

¹³Mipuiname nung gau, mâ-keyitewbe ge leikeu se lau.

¹⁴Aipau samkela ge anui ne sabe ze mi-mige lumeube kau, chigumbe kau je â ’nchetchî le lau, zai pe dage mâ de nguatatew mak zeu, chidezai peize ’ngngam gai de ra hanggeu.

¹⁵Pechu miteureipeu hang gum ze ngau gai se lau, kane mi sikina je gum ze ’ntîng ra ranglia lau.

¹⁶Chunage desieyibe Heguangpeu ne mâleine ge pehî’nsangne ge ningnui je peize desieyibe lungzeunetewbe pei gai be lau. Heguangpeu ne peize ningnui ’nteumena dage bam lau.

¹⁷I, Paulbe ne a ba sing ne ai rechâgaibe sam ze raw de lei. A gu sam kela leine ge ai ’nchetkaibe ze la kam lei; aize I ne rawbe tak te lei.

¹⁸Anui Wangpeu Isua Krista ka’nggiabe ze peize ningnui ’nteumena dage bam lau.