Read Zeme Naga 1 TIMOTHI 2 Bible Online

1 TIMOTHI 2 - Zeme Naga bible

1 TIMOTHI 2

¹Chidaze raîlangbe ge ziemmena ’nteumena hangge ’ngngâ ra kiambe, mâ-gekiebe, miramme deu hang gekiambe zai hesuiyibe paugaibe, zai aipau tâ ramme ze tew gai ra I ningnui je kagecheu lei,

²heguangme benai rezieteime ’nteumena hangge zeu, dezai mâ-leine ge anui desieyi ze ’ndeuhui bam lu Hera yi gum yi ze hengêusie chî ze bam le ra hangge zeu.

³Aize mâ-keyibe lei, zai aize â Hera, anui je tewka’nringpeu mikngau ge ka’nchâbe lei,

⁴ziemmena ’nteumena je tew’nring gai le ra, zai peize samsang gu mâ-gechîbe ge wang kam ra hang luneipeu zeu.

⁵Hera kat, zai Hera benai ziemmena kakge hekakdakpeu â kat la daseu, chi ziemmena Krista Isua,

⁶kebang ka’nribe mî hang gum ze pe runne pechu haimena hang peigaipeu, pehî sing ge chi sakki ze tewgaibe zeu.

⁷Aipau hang gene achu pauruapeu benai apostol hang (I mâ-peling sa lei, karasa sa me lei), keneibe benai samsang ge Jentailme gu geteiliapeu hang sumgaibeibe ziegeneu.

⁸Chidaze pebâm leine ge ’mpeumime ne helumpumbe benai getube tew makse heba ka’nchibe getuachu ze kellum ra I ne lunei de lei;

⁹zainedu ’mpuimi ne kebuibe riâ gene pe paîni tei ze betâu-pakezei gene pe puâni keru ze, hetamkitbe mei zai gechâk mei zai telui mei zai pemîhung-hungbe paîni mei ne mak ze

¹⁰kane mi tatew yibe zene herasie pauka’ndime chang ze ’mpuimi kezeitei bam ra I ne lunei de lei.

¹¹’Mpuimi â hekuâpheube gene reine ze peize mâ-chî le lau.

¹²’Mpuimi ne mâ-geteilia ra, zai ’mpeumi peireige rezietei ze bam ra I ne lunei mak lei; pa â pe kuâneu mak ze bam ra lei.

¹³Adambe je ’ndam gai raî lu chipau châng dezaine Ebile je ’ndam gai daseu;

¹⁴zai Adambe je â duaikau gai mak lei, kane ’mpuimi je â duaikau gai bei ze hedeka’ngkapui chang gai di lei.

¹⁵Acheuleusedu henalungbe gene ’mpuimi je â tew’nring gai bu lei, pa ne pe luilung pungchi ze keneibe, zai kehungbe zai ka’nchibe ge bamchi ze bam bam dizai ai.