Read Zeme Naga 1 TIMOTHI 3 Bible Online

1 TIMOTHI 3 - Zeme Naga bible

1 TIMOTHI 3

¹Aipau sam â peling de lei: mi-mige de kereîbepeu tâ tew ra pe lungge ’nchâ-desang ze bambe kau â tâ-yibe tewneibe kau de lei.

²Zai kereîbepeu â, pe peireige sa’nsiagairagabe kau, nâu kat kûbe kau, gesutchibe kau, hejaîsie chîbe kau, miramme ne pechu hengêutewchibe kau, hesangme je tinggeuchibe kau, mâ-geteiliachiduibe kau,

³meneumakbe kau, tingrak mak ze, kane karenuabe kau, hegeimakbe kau, zai rangkâng je hungmakbe kau ne sing ra lei.

⁴Pa ze mâ-leine ge pe name je hengêutewchibe benai hekuâpheube kangge kaichi ze pe kilûng-kelak teichi sing ra lei;

⁵ziemmena hangkat ne pe kilûngkang tei’nsaprabe tak chî mak tizai â ’ndaigum pa Hera gu kûchâmpatkaibeime bau je tinggeuchi dai ra lau?

⁶Pa ze keneibe ge gutrechidabe kau ne mak sing ra lei, makchai â pelung ge kahegiêbe zene pechu ’nning’ndi lu ze diabolbe gu tewka’ngkuibe ge pa kâu gai gu lei;

⁷chipau peireige du hela ge bamme ne pechu ’nning’mmi ze bambe kau pa chang sing ra lei, makchai â, saka’nsiabe ge benai diabolbe gu ’mpia ge pa kâu gai gu lei.

⁸Chigum ze tâka’ngguame (baizame) ze lungsang sing ze bam ra, hekuâkie mak ra, wain ’ngkîmgailakme chang mak ra lei, zai mâ-pegiê ngaube ge kadekumme chang me ra lei;

⁹keyi-kesia chibe gene keneibe sam kechukbe ze penui teichi ra lei.

¹⁰Zai peize penui je du kedak raî le lau; penui runne penui dage hetiâkgarabe chî lu dezaine tâka’ngguame (baizame) chang ze peize ’nggua lau.

¹¹Chipau luigum ze ’mpuimi ramme ne du lungsang sing ze bam ra lei, miramme je sa’nsiachime chang mak kane gesutchi ze, zai getaleine ge lungsangtewme chang zeu.

¹²Tâka’ngguame (baizame) je â peize nâu kat runne bam lau, zai penui name benai penui kilûngkangme je du tei’mmi ze tei lau;

¹³tâkanguame (baizame) chang ze tâ’nggua zun ze ka’ngguame â penui ji yi ra ngau lei, zai Krista Isua ge bambe keneibe lung ka’ntipbe ze du ngau lei.

¹⁴Ning tailam wangkelua ra I kaheguî de lei, kane mâ-geteiliabe ramme ning hangge I raw gai lei, chidezai,

¹⁵I ne kelualak lêuzai â, chi samsang gu hekut benai kechia’ndi changbe, keringbe Hera gu herakiangna, Hera kibaume ruage hangkat ne heluilung keyibe pungrabe tak ze nang ne chî ra hangge zeu.

¹⁶Gesang run lei, anui suiyibe Hera sie gu gechukbe anui paube ze â gesang lei: Pechu â hejaipum ge liâ gai bei, herui gene ranglia’nchichiak kai bei, angelme ne ngau di, heram zat ramme dage pau gai bei, kedeirei ge ’nnum’mmi kam di ze, pengêudibe gene nguachu gai ’ndi lei.