Read Zeme Naga 1 TIMOTHI 4 Bible Online

1 TIMOTHI 4 - Zeme Naga bible

1 TIMOTHI 4

¹Chunage Herui ne sa’nchichiak kai ze, bechâng dezai hanggesame â kechoabe herui ramme benai herasiabe gu mâ-geteiliabesie ’ngking lu ze keneibesie gene rimnatat tu lei,

²penui mâ-ka’nningbe ramme tew’ngku zai tew’nda’ndime,

³kelaktew ra nam zai samsang je ’nnumka’mmime benai samsang gechîme ne hesuiyibe sam pau gai lu luteurabe Hera ne tewgaibe hetak ze teu mak ra kenamme kuâ gezeneu.

⁴Hera ne ’ndamgaibe leine ze keyibe kam lei, zai hesuiyibe sam pau gai lu ze teu dizai â mâ de tuâ’nderabe ga daseu;

⁵chize â Hera gu sam benai kakellumbe ne tew’nchi gai ’ndi daseu.

⁶Ai mâ-geteiliabe ramme ze nang ne mi puiname suage kai dizai â nang ze keneibe gu sam ramme benai nang sui ze bambe keneibe-sie keyibe gu sam ramme gene teu ze ring ze Krista Isua gu tâka’ngguapeu keyipeu nang chang gu lei.

⁷Hera luilung keyibe gabe ge benai mâ-pedeugabe hêrasam ge nguakebut ze bam se lau. Hera luilung keyibe gene ning runne ningchu getei ze bam lau;

⁸hejaipumsie ge du mi pum kaheriabe ze â pemî gesa ge bam leu gu, kane heluilung ka’nchibe pungbe â mâ-leine ge pemî bam sing daseu; chize ne chuna ting hang du zai wangdairabe ting hangge du keyibe dau ra samhat kai bei daseu.

⁹Chi sabe sam ze â dausingbe kau, zai lutei kam ra yibe kau lei.

¹⁰Aipau deu hang gene anui ne tâtew ze hereu ze rankai ze bam de lei, anui â keringbe Hera, ziemmena leine je Tewka’nringpeu, ’ngkeune ze pechu ’nnumka’mmime je Tewka’nringpeu dage anui kaheguîbe ze kai lu dadegeu.

¹¹Airamme ze die gai ze geteilia gai be lau.

¹²Peize mî ne de nang kahenabe ze ngau’nna se lau, kane nang â keneime dage samsabe tak gene, zai kebambetak gene, kehungbe gene, keneibe gene, zai ka’nchibe lungpungbe tak gene piekeda ra hang teiliabe chang lau.

¹³I wangkeu mak tâne nang â baudime suage rawdiakkaibe leisi sam ramme kiabe ge benai Hera gu sam pauruabe benai geteiliabe tâ ge tâtewkuâ bam lau.

¹⁴Tâtew ra ning dage kela bambe ze nang ’nning’nna se lau, Presbytery ne heba die gai ze, kemeusam chang ze sapatkaibe gene ningchu peigaibe zeu.

¹⁵Aipau tâ-ngeu ramme ze nang tewtat bam lau, chiramme ge ’nninghekuî gai zeu, chidezai nang ka’ntuabe ze mi haimena ne ngauchi le ra hangge zeu.

¹⁶Ning runne ningchu benai nang mâ-geteiliabe geze ’ntîngchi ze bam lau, chize tei’mmi ze bam lau, chigum tewbe gene ning runne ningchu benai ning sam ka’ngkingme je nang ne tew’nring gai gu lei.