Read Zeme Naga 1 TIMOTHI 5 Bible Online

1 TIMOTHI 5 - Zeme Naga bible

1 TIMOTHI 5

¹’Mpeumi gechîngme je ’ngngiam se lau, kane mi peu je gum ze pechu gecheu’nrak lau; ’mpeumi hename ramme je mi sikina ’mpeumi ramme hangge chak kai lau,

²’mpuimi gechîngme ramme je mi puime hangge chak kai lau, ’mpuimi hename ramme je mi sikina ’mpuimi ramme hangge chak kai lau, (helung) ka’nchibe geneu.

³Kemîpui singbe kau ramme je â hengêutew lau.

⁴Kemîpui ne pe name mei nune pe chame mei bam zai â, penui kilûngkang hangge penui gu herasie gu tâ-ngeu ze peize penui ne getei raî lau, zai penui pui-peu hangge chigene peize peiruî dai lau; aize â Hera mikngau ge ka’nchâbe daseu.

⁵Kemîpui singbe kau, zai ’nggiâkia ze putkaibeibe kau â Hera dage pa kaheguîbe kai ze kemuî-keba ’ngngâ gai ra kiâm ze kellum bam lei;

⁶kane chi kemîpui pe runne pe deuzietew ze bambe kau â pa ring ze bam leusedu pa â chai di de lei.

⁷Aize tew ra die gai lau, dezai penui je sa’nsia gai mak ra hangge zeu.

⁸Mige pe kiduîme hangge ’nningtinggeumakbe kau â zai ’ngkeune ze pe kilûngkang hangge ’nningtinggeumakbe kau â keneibe-sie tuâpat kai nan ze neimakme suadu siadibe chang lei.

⁹Kemîpui meihui â meigailupui ze pa ne patingkum riakseruk riâ chang mak tizai â, kemîpui hangge peize chak kai me ra lei,

¹⁰zai chipaupui zene keyibe ramme tew bei be miramme ne sakkitewgai’ndipui zai pe name je du pa ne ngua’ngkutchi lu, hesangme je pe ki ge rêu ra ka’nchâbe kau, keneime ka’nchime pî huilube kau, kahereube lie ze tâka’ngguabe kau, zai mâ-leine ge tâ-yibe tew ra pe runne pechu peipatlube kau je sakkitew’ndi gai sing ra lei.

¹¹Kane kemîpui henabime je â kemîpuime ruage chakherua gai se rî lau; penui Krista dagene kesiatew ze lungkeleu ze meitat nei dezai

¹²penui karai ge samhatlube tewka’nsiabe gene penui runne penui peireige tew’ngkuigaibe teiwanggaibe chang mak ra hangge zeu.

¹³Chipau peireige du, penui deuzietew ze kelakki-ki tatrua ze deuzietewruame changbe runne makse, kane damkeluai ze penui samakrabe sa ze miramme je tewkebakrua ze bam gu lei.

¹⁴Chidaze kemîpui kahename ramme je â meikeu ze napoine ramme lungkeu ze penui kelak tei’nsap ze bam ra, zai ka’nggime ne anui je sa’nsiagairabe ’mpuî hang garabe ze I â nei de lei.

¹⁵Hanggesame â Satan chai sui’mmie gai kam di daseu.

¹⁶’Mpuimi ’nnumka’mmibe kau mi-mige du pe kibaume kemîpuime lazai â, pa ne peize penui je ’ngngâ lau; herakiangna je heput tewrit kai se lau, chidezai herakiangna ne kemîpui singme je ’ngngâgaichi le ra hangge zeu.

¹⁷Gechîngme, samramchime je â peize hengêutewbe dêt na ngaukakezeime chang lau, ’ngkeune ze samyibe pauruabe ge benai geteiliabe ge tâtewka’nrîme hangge zeu;

¹⁸Hera gu sam ne, “Getumsei chêuneibe luage nang pe mui dumnam se lau,” zai, “Tâtewpeu â pe hî ngaukezei sing lei,” ze kacheu daseu.

¹⁹Gechîngpeu peireige kesiachaugaibe ze sakki hangna hangchum gu chîsingbe gene makchai â mâtew-tewsede lun se lau.

²⁰Hemui tâ ge ran ze bamme je haimena bambe gene penui je ’ngngiam gai lau, dezai miramme kêdame ne du hing de ra hangge zeu.

²¹Kehung-ka’nrietewbe gene ngauka’nggiabe tew mak ze aipau sie ramme tei’mmi ze bam ra, Hera benai Krista Isua masua gene zai kelânglume angelme masua gene I ne ningchu die sing gai lei.

²²Heba getuapat ze heba diegaibe tâ tewbe ze tew gai kelua se lau, zai miramme gu hemui ge kebut se lau; ning runne ningchu tew’nchi ze bam lau.

²³Hedui runne â sak ta lau, kane ning bungpui hang ziegene benai nang teuneuchibe ziegene wain ze kecheî-cheîne sak kai lau.

²⁴Hanggesame gu hemui ramme â ngaupatseula ze bam lei, samramrabe hangge zeu, kane kêdabe gu hemui ramme â bechâng dezaine lia lei.

²⁵Chigum ze tâ-yibe tewbe ramme â ngaupatseula ze bam lei; zai chize acheu suadu mak zaidu, chiramme ze tei’mbai ze bam-bamchi lak lei.