Read Zeme Naga 2 TIMOTHI 1 Bible Online

2 TIMOTHI 1 - Zeme Naga bible

2 TIMOTHI 1

¹Paulbe, Krista Isua ge bambe keringbe gu samhatkaibe luigum ze Hera suî’nning gene Krista gu apostol dagene,

²A na hunglangbe Timothibe dage: Hera Bepeu zai Krista Isua anui Wangpeu dagene Hera ka’nggiabe, ngauka’nggiabe, zai desieyibe peize bam lau.

³I kakellumbe ramme ge I ne ningchu ’nningdau tâne a peume ne tewbe luigum ze keyibe ’nningchi’nchichiakbe lung zene I ne pe guâ ’ngguabampeu Hera dage a suiyi lei.

⁴Chi ning mikdui ramme ze I ne chî bam lei, zai ningchu I ngau nei-desang lei, a suigut tewpui le ra hangge zeu.

⁵Keneibe kapelingbe, chi ning pai, Loisle benai ning pui Eunikile dage bamraidibe chi keneibe zat, ning gu keneibe kapelingbe tak ze I ’nningdau bam lei, zai chize chuna ning dage bam ra I ’nnum’mmi sing lei.

⁶A ba diegaibe gezene Hera gu kela peibe ning dage bambe ze nang ’ntaureba gai dai ra aigene I ne ningchu rang’ngkia gai de lei;

⁷Hera ne anui je kahengîbe (kehingbe) herui pei gai mak kane tâtewchibe zai kehungbe zai mi runne mi je reîchibe herui pei gai bei daseu.

⁸Chidaze anui Wangpeu je sakkitew ra ’ngngam ze bam se lau, zai kebangki ge bampeu I pe gu changpeu je du ’ngngam ze bam se lau, kane gospel hangge hereuliegaihâ zu lau,

⁹anui tatew ziegene makse, kane pe runne gu tâudeu hanggene benai tingtie ge Krista Isua gene ka’nggiabe pa anui je peigaibe ziegene anui je tew’nring gai ze gekûbe ka’nchibe gene anui je kûgaipeu,

¹⁰zai chunage kechaibe tew’ngga gai ze gospel gene keringbe benai chaidailakbe kebabe ge teiwanggaipeu, anui je Ripatpeu Krista Isua ne keliâbe gezene ka’nggiabe teiliapeu, Hera gu chi tâtewchibe rezie gezeneu.

¹¹Zai aipau gospel hangge achu sam pauruapeu zai apostol zai geteiliapeu hang sum gai bei de lei,

¹²chipauziegene I aigum ze hereulie ze bam de lei. Kane I â ’ngngam me lei, I ’nnum’mmi ze bambepeu je I â chî, zai pa ne achu ’nnumtew ze mâ-peigaibe zat ze chipau mai riâ pa ne reîchang-gaichi duî lei be I ne chî sing daseu.

¹³Krista Isua ge bambe chi keneibe benai kehungbe gene ningnui a dagene seube chi mâ-teiliabe hangge keyibe sam ramme ze sui bam lau;

¹⁴anui dage bam-bambe Herui Ka’nchibe zene ningchu ’nnumtew ze samsang peigaibe teichi ze bam lau.

¹⁵Asia ge bamme ’nteumena, zai penui ruage Phigelasbe benai Hermoginisbe du, a dagene tatkamdibe nang chî la de lei.

¹⁶Heguangpeu ne peize Onesiphorasbe kiduîme dage ka’nggiabe pei gai be lau, pa ne a lungsui tewrechi gai bam daseu; I kebangta ka’ntabe ze pa ne ’ngngam sua mak ze bam lei,

¹⁷kane pa Rom ge wangkeuchang dege achu peu-desang gai ze achu ngaudau de lei—

¹⁸peize Heguang ne pechu chipau Mai ge Heguangpeu dagene ka’nggiabe ngau ra tew gai be lau—zai Ephesi keloa ge pa ne a peireige ’ndaizeuge nguaka’nggua mei be ze nang â chîkadesi daseu.