Read Zeme Naga 2 TIMOTHI 2 Bible Online

2 TIMOTHI 2 - Zeme Naga bible

2 TIMOTHI 2

¹Chidaze, a na gau, Isua Krista ge ka’nggiabe bambe gene nang â heranchi ze bam lau,

²zai sakkitewme bambe gene a dagene nang seulube ze miramme geteiliachiduime, lungsangtewme dage du pei gai be lau.

³Krista Isua gu sipai keyibe kau gum ze kahereube liegaihâ zu lau.

⁴Sipai tâ tewbe kau â, (sipai kiangna gu makbe) baudime ne gua’nsa ze tâtewbe ge â nguakebut mak lei, pechu teigutkaipeu suigut tewpui ra pa kahekabe ziegeneu.

⁵Ka’ntabe ge kahelitpeu du besie luigumbe gene pa helit makchai â, pechu kraun luak kai mak lei.

⁶Helu gu mâ-helei gu keraîbe hedam ngau ra kebuipeu ze â helu tâ tewka’nripeu ze lei.

⁷I sam sagaibe ge ’nning’mmiwang gai lau, mâ-leine ge Heguangpeu ne ningnui je mâ-chika’mmibe pei gai gu daseu.

⁸A gu gospel gene paugai’ndibe gum ze Isua Krista, chaidibe gene chudipeu, Dabidbe dagene piakeupeu je chibam lau,

⁹chipau gospel hanggene I hereulie ze tâ-kesiabe tewpeu gum ze kebangta ’nta ze bambe zeu. Kane Hera gu sam je â kebangta ’nta gai mak lei.

¹⁰Chipauziegene kelângpatkaibeime hang ziegene I mâgetaleine hereulie ze bam de lei, chidezai Krista dage bambe chi tewka’nringbe benai betun mak pengêudibe ze penui du ngau le ra hangge zeu.

¹¹Chi sabe ze dausingbe kau lei: anui pe dage nguachai gai dizai â, pe dage anui du nguaring gu lei;

¹²anui hereulie dizai â, pe dage anui du ngua-samram gu lei; anui pechu ’ngkim dizai â, pa du anui je ’ngkim gu lei;

¹³anui ne ’nnumi mak zai du; pa â ’nnumtewbe ge bam lei— pa â pe runne pechu ’ngkimchi lak daseu.

¹⁴Samrambe deu ge getube, chi keyibe hang tewbe makse, kane keseume hangge mâ-tewka’nsiabe changbe, chigumbe tewrabe gene ’mbia ra Heguangpeu masua gene penui je rang’ngkia gai ze dei’ntip kai be lau.

¹⁵Tâtewpeu mâ de ’ngngam-ra-gabe kau gum chang ze, Hera masuage tew’ntiplube kau gum ze ning runne ningchu peipat kai ze bam ra ning laîkai lau, samsang gu sam ze tei’mmi lu zeu.

¹⁶Hera gu zat makbe kakebiengbe gene ’mbiachi ze bam lau, chize ne ziemmename je Hera luilung zat makbe hang siabi-birabe ge ngua gai daseu,

¹⁷zai penui gu samdambe ze pungchatrabe hejâm dibe gum ze teu’ndibi-bi bam gu lei. Penui ruage Humenasbe benai Philetasbe bam de lei,

¹⁸ringchudairabe ze â kenû ge tat’ntua de lei ze penai kacheube gezene samsang gene tat’nchichiak tattime kena zeu. Penai ne hanggesame dage keneibe bambe ze tewkakeleu de lei.

¹⁹Kane Hera gu ka’ntipbe heki gu pedim ze â bam bam lei, ai mâ ka’nchetbe taunamgaibe pung lu zeu: “Chi Heguangpeu ne pe gu changme je chi lei,” kacheube benai “Mi-mige Heguangpeu ji kûme leine je peize hemui-helut gene tat’mbia kam de lau,” kacheube zeu.

²⁰Heki kedibe lungge gechâk benai gepût li (hekuak-hepiak) ramme runne bam sua me lei, kane heching ne chiambe zat ramme benai kedei ne ka’ndambe zat ramme du bam lei, zai gêsa â betâudibe ge tei ra kai, gêsa â betâudimakbe ge tei ra kai lei.

²¹Betâudimakbe hangge changbe zat gu gene mige pe runne ne pechu tew’nchi dizai â pa ze heki’mpaupeu hangge diepat’nchigailube benai betâuka’nnangbe zat, chi mâ-mâ tâ keyibe tewbe hangge kaikuabe hang chang ze betâudibe ge teirabe kerua chang gu lei.

²²Chigum ze mi rî ting gu mâ-mâ ka’nchiebe kesiabe gene ’mbiachi lu ze katelingbe, keneibe, kehungbe, zai desieyibe je heka sing lu bam lau, helung ka’nchibe gene Heguangpeu je kû ze bamme dage nguaherua zeu.

²³Kemiebe, mâ-ka’nningbe ga ze getube ramme ge kebut se lau; chiramme zene ’nggî-kahegeibe tewpat kai lei be ningnui chî lei.

²⁴Zai Heguangpeu guâ ka’ngguapeu â hegeichibe kau chang mak sing ra lei, kane mâgeteiliachipeu, gesutchipeu chang ze haimena je ’nggiachi ze bam ra lei,

²⁵pechu ka’nggime je karenuabe gene getei’nzei gai zeu. Penui helung-heli ze samsang ze chîwang ra Hera ne pei gai lêu gu lei,

²⁶zai satan gu ’mpia gene ’nreipat le ra hangge zeu, pa ne pe suî’nning tew ra pechu ruichim’ndibe chângge zeu.