Read Zeme Naga 2 TIMOTHI 3 Bible Online

2 TIMOTHI 3 - Zeme Naga bible

2 TIMOTHI 3

¹Kane aize chî le lau, beting nâlangbe ge â mi duânggabe hî ramme wang gu lei.

²Ziemmename ramme ze, penui runne penui je kehungme, rangkâng je kehungme, kahegiême, kechî-keditewme, penui samsiame, penui pui-peu kuâ pheumakme, yigailakme, ’nchimakme,

³ziemmena je ziemmena tewmakme, helungchime, sa’nsiachime, penui runne penui je reîchilakme, katingrakme, keyibe je ngaugailakme,

⁴penui choâsiame, ka’ntîngbe-game, ka’ngngangme, Hera je ’nchâ ra suadu mâ-mêruang je ka’nchâme,

⁵kengaube ge â mi râsie tei, kane chige tâtewchibe bambe je â ka’ngkimme chang du lei. Aigumbe kau ramme dagene ’mbiachi le lau.

⁶Penui ruage bamme bau ze â kelakki ramme ge tat ze ’mpuimi heran-game ramme je ’nrak lu ze hemui ne penui put tewrit kai ze nguakezit ze bamme bau de lei,

⁷mi-mige kuâ â ’ngking bam gu, kane samsang â mâtew-tewsedu chîtuilakrame bau zeu.

⁸Jannesbe benai Jambresbe ne Mosabe je katingkangbe gum ze, aime, choateube lungtakpungme benai keneibe helîtak tewme ne samsang je du tingkang ze bam lei;

⁹kane penui tat’ntie ra mak lei, chi hangna chui ge gum ze, penui kemiebe tak ze haimena dage chî’nchichiak la daseu.

¹⁰Chunage I ne mâ-geteiliabe tak, I kebambe tak, keringbe ting ge I ne mâ-heka sing ze bambe tak, I keneibe tak, I liechibe tak, I hungchibe tak, I ’ntiprip ze bambe tak,

¹¹achu tewsabe tak, I hereuliebe tak ramme, Antiok ge, Ikoniam ge, zai Listra ge a chui ge mâ-wangchangbe tak ramme, tewsabe ramme I ne liebe tak ramme ze nang ne ngauchi kam la daseu; aigum sedu chiramme leine gene Heguangpeu ne achu meupat kai bei de lei.

¹²Gesangsing lei Krista Isua gene Herasie keyibe tei ze lungneime je tewsâ gai kam gu de lei,

¹³ziemmena kesiame benai miramme helîtak tew ze tâtewme ze siabe gene siasua-sua ze miramme je duairua zai penui runne penui je du duaikau ze bambe ting zeu.

¹⁴Kane nang â nang chîlube ge benai ’nnum’mmisinglube ge bam bam lau, châu dagene nang aize chî lu mei,

¹⁵zai Krista Isua gezene tewka’nringbe ngau ra ningchu geteiliachilube chi rawgaibe sam ka’nchibe ramme geze nang hena’ngka gene ’ndaigum chî’mmikua di mei be chî lu zeu.

¹⁶Ka’nchibe rawdiakkaibe sam leine ze Hera ne geteiliagaibe gene pat lei, zai mâ-geteiliarabe hang kiâ ze geteirabe hang, ngua’nzeigairabe hang, zai peling gene geteigairabe hang betâudibe zeu,

¹⁷chidezai chi Hera gu ziemmena ze ’nsang lu ze tâ-keyibe tewbe hangge ’nchichiak ze bam le ra hangge zeu.