Read Zeme Naga 2 TIMOTHI 4 Bible Online

2 TIMOTHI 4 - Zeme Naga bible

2 TIMOTHI 4

¹Hera benai Krista Isua chi keringme benai chaidime je samramrapeu bambesing gene zai pa wangkeu ze liârabe benai pe gu Heguangram ji gene ningchu I sam de gai lei:

²leikeutadibe liechibe benai geteichibe gene beting ge benai betingmakbe ge sam ze paukelua-desang zu lau, ranglia’mmi lau, ’ngngiam lau, zai gecheu’nrak lau.

³Ziemmename ne peling geteiliabe lielakrabe ting wang gu lei, kane penui kunki ’nchak ze penui keneibe luî tew ra hangge penui runne penui hang geteiliame ramme je kûwang’ndui gu,

⁴zai samsang ’ngkingrabe gene ’nnuktat tu, zai ’ndâ gu hêrasam ge kezittat kai du lei.

⁵Nang â pelua’nsangne ge kedâ lu kuâ ze kahereube lie ze pauruapeu tâ tew ze bam lau, nang ka’ngguabe tâ ze tewpuiting gai lau.

⁶Herâtewbe ge gum ze peipatkairabe riâ hangge I â bamdibe kau de lei, I tatrabe hî wangchang de lei.

⁷Keyibe herei ze I â hereitew lu de lei, I â teri’nzu kam lu de lei, I â nei lu de lei.

⁸Chuna gene seu ze a hangge kapelingbe kraun kaikua la de lei, chize Heguang, samrambe katelingpeu ne chipau mai ge getoabehi achu peirabe zeu, zai a hangge runne makse, kane pa wangkeu ze liârabe deze ka’nchâme leine hangge zeu.

⁹Kelua-chikemakzie ze a dage wangkeu ra ’nning le lau.

¹⁰Demasbe â henaiting kedeirei je kehungbe ziegene achu sâu gai nan ze Thessalonika ’mbe tat ti de lei; zai Krekesbe Galatia ’mbe tat ti, zai Titabe Dalmatia ’mbe tat ti daseu.

¹¹Lukabe runne a dage la lei. Markabe je kû lu a tailam pechu nguakeu lau; pa â a lâng tewchi-kadesang daseu.

¹²Tukikasbe je Ephesi ge I ne lang gai bei de lei.

¹³Nang wangkeu dezai Troas ge a gu helamechua Karpasbe dage I sâudiakkai’ndibe ze pungwang lau, zai chipau peireige du leisikuak hemeigei ne kûmlube ramme du teiwang lau.

¹⁴Alekzandarbe hetageî luapeu ne achu tewhereu-desang gai bei de lei; Heguangpeu ne pa tâtewgaibe ramme ze pechu ruî dai gu lei.

¹⁵Ning runne nang â pechu ’ntîngchi le lau, pa ne anui pauruabe sam je ’nggi kadesang daseu.

¹⁶I sagube raîlangbe lua du, mî de achu ’ngngâ gai mak lei; ’nteumena ne achu sâu gai ’ndi lei. Peize chize penui peireige ka’ngkuibe hang riam gai se lau!

¹⁷Kane Heguangpeu ne achu sapda ze samkeyibe pauliâ kam gai ra hangge a ranchi hang pei gai de lei, Jentailme ’nteumena ne chize seu le ra hangge zeu. Chigum ze heradi muiki gene achu meupat kai bei de lei.

¹⁸Heguangpeu ne achu kesiabe leine gene meupat kai ze, pe gu tinggîm gu Heguangram hangge achu tew’nring gai gu lei. Pe dage pengêudibe betingbeta peize bam bam lau. Amen.

¹⁹Priskale benai Akuilabe zai Onesiphorasbe kiduîme je rechâ gai lau.

²⁰Erastabe â Korinth ge ’nnai ze bam lei, zai Trophimasbe a ’nrâ di ze Mileta ge sâu gai bei de lei.

²¹Hetating wangchang makge a tailam wang sing ra heka lau. Pudenbe zai Linasbe zai Klaudiabe zai mi puiname ’nteumena ne tew gum ze Eubulasbe ne ningchu rechâgaibe sam lang gai de lei.

²²Heguangpeu ne ning gu herui ge peize nguabam lau. Ningnui dage ka’nggiabe peize bam bam lau.