Read Zeme Naga TITA 1 Bible Online

TITA 1 - Zeme Naga bible

TITA 1

¹Paulbe, Hera guâ ka’ngguapeu zai Isua Krista gu apostol dagene, Hera gume bau je keneibe lam ge ’ngngâ gai ze, zai anui râsie ne geteiliabe gu samsang ge penui je ’ngngâ gai ra achu kelâng gai lu lang gai bei de lei, ringbetunmakbe

²hanggene heguî ze tâtewbe zeu. Hera karasa samakpeu ne anui hang â beting-pehî bam makge aipau keringbe anui ring ze bambe ze hat kai ’ndi de lei,

³dadege beting-pehî tit ge pa ne aige pe gu hepâusam gene teilia’nchiepuang gai bei de lei. Aipau tâ’nggua ra achu ’nnummi ze rang gai de lei, zai I ne anui je Ripatbepeu gu samdie gene aize paurua de lei.

⁴Anui heluagit ze bambe keneibe ge a na gesang chang ze bambepeu, Titabe dage I sam raw gai de lei. Hera Bepeu zai Krista Isua anui je Ripatpeu ne ningchu peize ka’nggiabe benai desieyibe pei gai be lau.

⁵Aipauziegene Kret ge I ne ningchu sâu gai de lei, chidezai mâ-mâ betâusiabe nang ne teleu’mmi gai ra, zai I ningchu geteigaibeibe luigum ze namdi leine ge gechîngme ramme je sum gai ra hangge zeu,

⁶chige mige hetiâkgabe kau, pe nâu kat runne bambe kau, pe name zene Hera je keneime kau chang zai keleurua ze bammak bei zai ai.

⁷Episkopos (herakiangna kereîpeu) â Hera gu tiâkela chang ze hetiâkgabe kau chang ra lei; pa â kechî-keditewbe kau, zai helumpum keluachibe kau, zau meneuchibe kau, zai ’nggî-hegeichibe kau, zai pegiê ngau ra kadekumbe kau zat chang mak ze,

⁸kane hesangme je ’nningtinggeuchibe kau, mâ-keyibe ka’nchâbe kau, pe runne pechu teichibe kau, ka’nzeibe kau, ka’nchibe kau, pe runne pechu reîchibe kau chang sing ra lei;

⁹mâ-gesang geteigaibeibe luigum ze chize pa teichi ze bam sing ra, chidezai besie-hingde gene mâ-geteiliabe pa chî le ra, zai pa zene chi tewkakeleume je penui kesiabe tak teilia ze kiâchilerabe kau chang ra hangge zeu.

¹⁰Hekua kangge keikeumakme, ’ntane mâ-damkeloichime benai choachime, ’ngkeune ze rumkagetanbesie teime misongga bam di daseu;

¹¹penui ze penui kuâneu mak bam sing ra lei, rangkâng chîam hanggene tâtew ze penui ne geteilia ra besiemakbe zat ramme nguagetei ze bambe zene kelak ramme leine sui tew’nsia ze bam daseu.

¹²Penui ruage penui gu kemeu’mpeu hangkat ne sa ze, “Kretme â patingnai’nsangne ge karasa sachime, hekaubena kesiabe kau ramme, henga ze mâ-teusuame kam lei,” ze kacheu de lei.

¹³Ai sakkitewbe ze â gesang lei. Chidaze penui je ’ngngiam’nteukala gai be lau, chidezai keneibe ge penui neichi ze bam le ra hangge zeu,

¹⁴Judame gu ’ndâ gu mâ-rasam ge ’ntîngchi ze bamrabe mei nune samsang tuâpatme gu samde ramme ge mei ’ntîngchi ze bamrabe suane ai.

¹⁵’Nchi ze bamme hang â getaleine ze ’nchi kam lei, kane hebâdime benai ’nnum’mmimakme hang â mâ de ka’nchibe ga lei; penui lung mâ-ka’nningbe tak ramme benai penui lungsui tak ze â tewhebâ kam ’ndi de lei.

¹⁶Penui Hera je chî lei ze kacheu de lei, kane penui tatew ramme zene pechu penui ka’ngkim lei; penui â mi katenetbe kau ramme, hekuâpheumakme, keyibe tâ tew ra mâ de buimakbe kau ramme lei.