Read Zeme Naga TITA 2 Bible Online

TITA 2 - Zeme Naga bible

TITA 2

¹Kane nang â mi râsie peling geteiliabe deu ge betâudibe kaisî ra yibe ramme bambe geteilia ze bam lau.

²’Mpeumi chîngbime je â, penui runne penui je reîchi ra, helung besingsiak bam ra, mi kejei peuchi ra, keneibe ge neichi ze bam ra, kehungbe ge hungchi ze bam ra, helung’ntip ze bam ra rang ze bam lau.

³Chipau luigum ze ’mpuimi chîngbime je du ’mpuimi kejeitei bam ra, sa’nsiaruachime chang ze bam mak ra, zai sakmeneuchime chang ze bam mak ra rang ra lei; penui zene mâ-mâ-keyibe geteilia ze bam ra lei,

⁴zai chigum ze ’mpuinung kahename ramme ne penui napeu benai penui name ramme je hungchi ze bam ra,

⁵penui kejei ge bamchi ra, ’ntiachi ra, kilûngkang teleuchi ra, ’nggiachi ra, zai penui napeu luntewchi ra penui je getei gai lau, chidezai Hera gu sam luî tewla gai mak ra hangge zeu.

⁶Chipau luigum ze ’mpeumi henabime ramme ne penui runne penui je reîchi ze bam ra penui je getei gai lau.

⁷Mâleine ge keyibe tewbe ge heli ra teiliabe zat hang nang chang ze bam lau, zai nang mâ-geteiliabe ge mâ-pelingtewchibe tak, helung gesang,

⁸zai sa’nsiagairagabe sam mâ-peling sabe tak ze ning runne ningchu teilia ze bam lau, chidezai mi je ka’nggibe kau je tew’ngngam gai be ra hangge zeu, anui peireige mâ de sa’nsia gai ra ga zeu.

⁹Kebangme chang ze bamme ne peize penui paume luntewchi ze bam ra, zai mâ-leine ge penui suigut tewpuiting gai ze bam ra rang gai lau; penui â geikang ze bam mak ra,

¹⁰zai mi batabe (hegachibe) tak du tew mak ra lei, kane nguahekaigit ze bambe tak ze punglia ra lei, chidezai mâ-leine ge Hera anui je Tewka’nringpeu gu mâ-geteiliabe-sie ge penui ne peluiyi ra tew’mmi gai le ra hangge zeu.

¹¹Ziemmena ’nteumena je tew’nringgairabe hangge Hera ka’nggiabe ze â liâ gai ’ndi daseu,

¹²mi râsie teika’nsiabe tak benai kedeirei suigut ka’nchiebe deze sâu nan ze, zai ’nchingchi ze, mâ-pelingtew ze bam ra, zai ai kedeirei ge Hera luilung keyibe pung ze bam ra getei ze,

¹³’nnamgai’ndibe anui kaheguîbe chi anui Rapeu dilangpeu zai Tewka’nringpeu Isua Krista,

¹⁴anui gu hemui-helut leine gene anui je ripat kai ra, zai tâ-keyibe tewbe ramme je ka’nchâme, pe gume je pe hangge tew’nchi gai ra pe runne pechu peipatkaipeu ngeudibe liârabe je kuâ zeu.

¹⁵Airamme leine ze pauliâ-’nchichiak kai be lau; reziechibe gene gecheu’nrak ze kiâ gai lau. Mî ne de peize ningchu ngau’nna gai se lau.