Read Zeme Naga TITA 3 Bible Online

TITA 3 - Zeme Naga bible

TITA 3

¹Samramme benai rezieteime kuâkang ge bamchi ra, hekuâpheuchi ra, zai mâ-mâ tâ peling tewnei ra,

²mî je de sa’nsia mak ra, hegei mak ra, renuachi ra ’nteumena dage yichai ze bamchi ra rang’ngkia lau.

³Tingkat ge â anui ze du kemieme, hekuâpheumakme, kezitruachime, mâ-mâ ka’nchiebe benai peruânggabe suigut ramme gu kebang changme, katîmphibe benai hemimeube luilung ge bam ze anui ting bam’nggakamdime, miramme ne ngaugailak zai kat-kat je ngaugailak ze bamdime chang daseu;

⁴kane Hera anui je Tewka’nringpeu keyibe pa hungka’nggiabe ze liâ gai dege,

⁵pa ne anui je tew’nring gai bei de lei, peling gene anui tâtewbeibe gene makse, kane pa ngauka’nggiabe gezene Herui Ka’nchibe gene nguachu-rechigaibe benai tewkarchibe,

⁶chi anui je Tewka’nringpeu Isua Krista gezene pa ne anui peireige puiting ze ruîkeugaibeibe ziegeneu,

⁷chidezai pa ka’nggiabe gene anui je tew’nzei gai bei ze ringbetunmakbe je kaheguîbe ge anui du chige nguakaheguîme chang le ra hangge zeu.

⁸Aize sabe sam ze gesang de lei. Zai nang ne airamme ze salia’mmi gai ra I lunei de lei, chidezai Hera je ’nnumka’mmime ne tâ-keyibe ramme tewbe ge penui laîkai ze bam le ra hangge zeu; airamme â ziemmena hang mâ-keyibe benai kegiebe chang lei.

⁹Kane ’ntane mâ-mâ tukakeleube, ’ntane mi ki rehei ka’ntibe, ’ntane besie-hingde deu gene tukebieng ze kahegeibe ramme, airamme ge bam se lau, chiramme â pegiêgabe mâtâu hang gabe chang daseu.

¹⁰Pebau kuipângneibe kau je luakat luana pechu kedeibe lam gene mâ-geteigai’mmilube châng dezai â, pe dage mâ de nguatatew ta lau,

¹¹chigumbe kau â, ziemmena kakeriângbe kau, zai kesiabe kau lei be chî lu zeu; pa â pe runne pechu tew’ngkui gai lei.

¹²Artemasbe mei nune Tukikasbe mei je ning lam ge I lang gai dezai, Nikopolis ge a tailam zuamie ra hekasing le lau, hetating ge chige bam ra I â sam sa gai ’ndi daseu.

¹³Zenasbe hingde sakelichipeu benai Apollobe je penai gu tebeî ’mpuî hangge tinggeuzun gai be lau; penai hereu ra pei se lau.

¹⁴Zai anui gu ziemmename, tâ-keyibe tewbe ge penui laîkai ze bam ra peize tewheli ze bam lau, chidezai ’nta kezit’ngga gai mak ze, taunangwangbe ge peize ’ngngâ ra hangge zeu.

¹⁵A dage nguabamme leine ne ning dage rechâgaibe sam lang gai de lei, keneibe lam gene anui je ’nchâ ze bamme dage anui ne rechâgaibe sam lang gai de lei. Ningnui ’nteumena dage Hera ka’nggiabe peize bam bam lau.