Read Zeme Naga HEBRAIME 1 Bible Online

HEBRAIME 1 - Zeme Naga bible

HEBRAIME 1

¹Misonggabe tak gene benai gechâm-châmbe ’mpuî gene Hera ne anui peume keraime dage kemeume ramme dagene sam salia de lei;

²kane ai nâlangbe ting ge â getaleine nguaheurapeu hang pa ne sumgaibeipeu, chi pe Na zene anui dage salia gai bei de lei, pa ne kedeirei ze pa (pe Na) gezene ’ndamgaibe zeu.

³Pa ne Hera pengêudibe ’mbi hiakelipat kai ze pe luilungtak singbe ze punglia gai de lei, pe sam ge tâtewchibe zene ting-kedei tei’nsap zeu. Pa ne hemui hangge tewka’nchibe tâ tew gai lu dege kehube ge Heguang dilangpeu hezat’mbia ge ’ntau di de lei,

⁴penui (angelme) ji suadu yi-ka’nteube pa ne heji yibe ngau ze angelme suadu di’ngkeu lu zeu.

⁵Angelme ruage mâdauge châu dage nung ze Hera ne acheu ze sa gai bei ze lau, “Nang ze a Na lei, nemai ne I ne ningchu piakeu gai ’nde lei,” acheu zeu? Makchai du, “Pe hangge I zene bepeu chang gu, zai a hangge pa zene a na chang gu lei,” ze acheu zeu?

⁶Zai sachu dai ze, Lungkeuraibe Na je kedeirei ge pa ne nguagutkaibe luage pa ne, “Hera gu angelme leine ne peize pechu hengêutew ze kellum lau,” ze kacheu de lei.

⁷Angelme deu ge pa ne, “Pa ne pe gu angelme je tingkai hang tew gai lei, zai pe guâ ka’ngguame je hemimelei hang tew gai lei,” kacheu de lei.

⁸Kane pe Na rasam deu ge pa ne, “Hei Hera gau, ning gu heguang-bamrak â betingbeta bam lei, zai kapelingbe langsiutui ze â, ning gu Heguangram gu langsiutui de lei.

⁹Nang ne kapelingbe je ’nchâ ze hingde teimakbe je ngaugailak lei; chipauziegene Hera, ning Rapeu ne ning kangme je suadu ningchu â, hesuiyibe Hera-taudui ’nnuk kai bei de lei,” kacheu de lei.

¹⁰Zai, “Nang Heguangpeu ne, bepîbang raîlangbe ge kedeirei ze tewdîmchu gai bei de lei, zai tinggîm ze â ning bachiâm ramme de lei;

¹¹Penui â ga gu lei, kane nang â bam bam gu lei; penui â paî gum ze periekeu kam gu lei,

¹²mechuapui gum ze nang ne penui je ’nzui gai gu lei, zai penui ze keli du lei. Kane nang â peluî-luî bam lei, zai ning gu tingkum ramme ze mâtew-tewsedu tud ra mak lei,” kacheu de lei.

¹³Kane angelme ruage mâdauge Hera ne châu je nung acheu ze sa gai bei ze lau, “A hezat’mbia ’ntau lau, ning teureime je I ne ning pichaî hang tew gai mak tâneu,” acheu zeu?

¹⁴Penui ’nteumena ze tewka’nringbe ngaurame hang ziegene tâ’nggua ra langpatkaibeime ka’ngguabe herui ramme mak ti lau?