Read Zeme Naga HEBRAIME 10 Bible Online

HEBRAIME 10 - Zeme Naga bible

HEBRAIME 10

¹Hingde ge â, airamme mâ-mâ bamkuasingdibe zat ramme makse kane mâ-mâ keyibe wangrabe gu kezui ze bam lei, patingkum gepat tewbambe heratewbe zat ramme zene â chige kellum ra wangka’nname hangge ka’nzeibe hang tew’nsanggaichi lak ti de lei.

²Chize ne tewchi lu lei dizai â, penui herâtew ze bambe ze tewsauderabe kau de mak mei? Chige kakellumbe teiwangme je luakatne hui’nchi gai dizai â, penui dage hemui bambe tak ze penui chî ta du de lei.

³Kane patingkum gepat tânege hemui bam bam lei be chî ra mâ-rang’ngkiagaibe aipau herâtewbe zat ramme bam de lei.

⁴Getumsei benai kemei ramme jai zene â, hemui lutuachi lak ti daseu.

⁵Chigum ze nâlangbe ge â, Krista ne kedeirei ge wangkeu dege, pa ne sa ze, “Herâtewbe ramme benai mâ-kela peibe ramme je nang ne ’nchâ me lei, kane a hangge kedâgaibe chi hepum ze zangnêu;

⁶rûkambe-râtewbe benai hemui-râtewbe ge nang ne ning suiyi gai me lei.

⁷Chidadege I ne sa ze, ‘Ni, I ning suî’nning tew ra wangkeu de lei, Hei Hera gau,’ ze kacheu de lei, chi leisizui ge a rasam rawgai’ndibe gum zeu,” ze kacheu de lei.

⁸Ai bepeirei ge rawgaibe ge pa ne, “Herâtewbe zat ramme ge zai rûkambe-râtewbe ramme ge zai hemui-râtewbe ramme ge nang ne ’nchâ gai mak zai ning suiyi gai mak lei,” ze sagaibe luage (airamme ze hingde luigum ze peipat kai ze bambe),

⁹pa ne sa’nduâ gai ze, “Ni, I ning suî’nning tew ra wangkeu de lei,” ze kacheu de lei. Pa ne chi pakenabe tei’nsapchugairabe hanggene chi keraîbe ze tew’ngga gai nan ze bam de lei.

¹⁰Dadege chi pa’nningtak gene luakatne pelane hang Isua Krista pum herâtew ze peipatkaibe gezene anui je â tew’nchi gai bei de lei.

¹¹Zai tingkume leine ne chi hemui lutuachilakbe herâtewbe zat kat zene herâtew dai tew dai ze nai’nsangne ge pa tâtewbe bâm ge sap ze bam lei.

¹²Kane Krista ne pelua leine hangge hemui hang kat sâng kat herâtewbe peipat kai lu dege Hera hezat’mbia ge pa ’ntaukeu gai di de lei,

¹³chidezai pe teureime je pe pichaî hang tew gai mak tâne bamkuâ ra hangge zeu.

¹⁴Luakat sâng luakat herâtew ze peipatkaibe zene tew’nchigaibeime hang pelua leine hangge pa ne tew’nzei’nsangsiak kai bei daseu.

¹⁵Zai Herui Ka’nchibe ne du anui je sakkitew de lei; raîlangbe ge pa ne,

¹⁶“Chipau ting ’ntua dezai I ne penui dage samhatkaibe tâ tewgairabe ze aize de lei, ze Tingwang ne kacheu de lei: I ne penui lung ge a gu hingde ramme kai gu lei, zai chiramme penui lung ka’nningbe ge raw gai gu lei,” ze acheu sabe chângge,

¹⁷chidadege pa ne sa’nduâ dai ze, “I ne penui gu hemui ramme benai tewmaube ramme ze chibam ra mak lei,” ze kacheu daseu.

¹⁸Airamme hang kelunbe bambe bâm ge hemui hangge herâtewbe bam ta di de lei.

¹⁹Chipauziegene mi puiname gau, kakellumbe bâm ka’nchibe ge Isua Krista jai gene zai

²⁰chi anui hangge paîlîmsungbe gezene anui hangge pe pumji gezene pa ne latkaibe, chi karchibe benai keringbe ’mpuî gene anui zuagutchi le ra anui dage ’nnum’mmi singbe bam lu daze,

²¹zai Hera kiduîme bau peireige tingkupeu kedibe anui hangge bam bei daze,

²²keneibe ge anui ’nnum’mmi sing lu bambe helung gesang pung lu, helungsuitak kesiabe gene anui lung kezin’nchi lu zai hedui ka’nchibe zene anui pum hui’nchi lu ze anui zuawang’nna zu kei lei.

²³Helung ’ngngiau makse, kane anui gu kaheguîbe hangge keneibe sam sapatkaibe ze anui tei’ntiprip ze bam kei lei, samhatkai’ndipeu â lungsangtew daseu;

²⁴zai kehungbe benai tâ-yibe tewbe hangge anui kat-kat je gecheulum ze bam ra anui ’nning kei lei,

²⁵hanggesame kebambe tak gum ze, ’nduiherua ze bambe ze ’nningkelam gai makse, kane kat-kat lungsui tew’mmi zeu, zai Patingnaimikpui wang’nnadibe ningnui ngaulube luigum ze tâtewrankaibi-bi zeu.

²⁶Anui ne samsang gu mâ-gechîbe ngaulube chângge chikâ lu ze hemui tâ tew bam dizai â hemui hangge herâtewbe â bam dai ra mak te lei,

²⁷kane samrambe mai hangge mi kehingbe hang heguîkuarabe benai ka’nggime je rû’nggarabe hemited kesiabe hang runne de lei.

²⁸Mosabe gu hingde peireige ’nggi ze tewkeleugaibe kau â, hangna mei, hangchum mei ne sakkitewbeibe gene makchai â, ngau’nggia gai ra ga ze chai ra chang lei.

²⁹Hera Na je ngau’nrie ze tuâpatkaibe kau, zai pechu tew’nchigaibe chi samhatkaibe hejai ze mâ-hang ’nninggaimakbe kau, zai ka’nggiabe gu Herui peireige kagechingbe kau zene ’ndaizeu tewsabe kedibe pa ne ngau ra ka’nzeibe hang nang ne ’nning gai lau?

³⁰“Hekûmtewbe â a gu lei, I ne pei dai gu lei,” ze acheu sagaipeu je anui ne chî daseu. Zai “Tingwang ne pe gume je samram gu lei,” acheu kadaibe du anui chî daseu.

³¹Keringbe Rapeu ba ge kau gai ra hang â mi kehingbe kau de lei.

³²Kane tingtie ge ningnui je mâ-ranglia’nchichiak kai ze ningnui lung tewrebagaibeibe chângge hereulie ze ’nggi-desanggaibe ramme,

³³luadege â haîmapa gene ningnui peireige ketakedautew ze tewkahereube, zai luadege â miramme peireige chigumbe tewme dage ningnui du hereu gai ze bamdibe ze chî bam lau.

³⁴Kebangki ge bamme ramme je ningnui ne ngau’nggia ze bam, zai ningnui heurâ yi-ka’nteube chize bam-bambe lamui lei be ningnui chîlube ziegene ningnui heurâ ramme sut-tatibe ge du ningnui â ningnui suiyi’nta ze bam daseu.

³⁵Chidaze mâ-saliabe chîlube ge ningnui ’nnum’mmi ze bambe tuâ se lau, chige hetoahi kedibe bambe zeu.

³⁶Ningnui hereuliechi ra ’nnang de lei, chidezai ningnui ne Hera ’nning tâ tew lu ze hatkai’ndibe ngau le ra hangge zeu.

³⁷“Mâtiegemakse wangkeurapeu ze wangkeu gu de lei, beting tew’ntie ta de lei;

³⁸kane a gu ziemmena katelingbe kau â keneibe ne ring gu lei, zai pa ne ’ngngîn dai dizai â pa ge a lungsuiyibe ga de lei,” kacheu de lei.

³⁹Kane anui â hechai’ngngîn ze gagaiderabe kau ramme chang mak, kane keneibe bam lu mi keringbe reî’mmi ze bamdime chang lei.