Read Zeme Naga HEBRAIME 11 Bible Online

HEBRAIME 11 - Zeme Naga bible

HEBRAIME 11

¹Zai keneibe ze â mâ-mâ anui kaheguîbe ramme ze ngau ra mi lung ge dei’ntipkaibe ze de lei, mâ-mâ ngaumakbe ramme ngau ra hang mi lung ge deîtaugaibe zeu.

²Ai keneibe gene ziemmena rehei keraime ze Hera ne nguahezuâgaibe ngau daseu,

³kedeirei ze â Hera gu sam ne ’ndam gai lei, chigum ze mâ-mâ kengaube zat ramme ze liâmakbe zat ramme gene ’ndam gai bei de lei.

⁴Keneibe gene Abelbe â Kainbe suadu Hera dage herâtewbe yi-ka’nteube peipat kai bei de lei, chigezene katelingpeu hangge riamgaibe pa ngau lu lei, pe gu kela ramme lugaibe gene Hera ne sakkitew gai zeu; pa chai di de lei, kane pa keneibe gezene pa â sam sa larei lei.

⁵Kechaibe ngaumakrabe hangge Enokbe je â keneibe gene teichu gai bei de lei; zai pechu â peudau mak tai lei, pechu â Hera ne teitat’ndibe ziegeneu. Chunage pechu teitat’nderabe suagene pechu â Hera suigut tewlupeu hangge lu gai bei de lei.

⁶Zai keneibe ga zai â pe suigut tewchi lak lei. Hera dage zuawang’nnaneime â pa ring ze la lei be benai pechu gepeume je â pa ne getoabehi pei lei be ’nnumtew sing ra chang daseu.

⁷Keneibe gene Noabe, mâ-wangchangrabe bambe deu ge Hera ne ’ntîng ra rangliabeibe ze ’ntîng lu ze pe kiduîme ringpatlerabe hangge hedui’nneikuak chiam gai lu lei, zai ai kedeirei je pa ne kesiabe hang chak kai ze keneibe gene katelingbe nguaheupeu hang chang lu de lei.

⁸Keneibe gene Abrahambe, pe hangge heram ngaurabe bâm ’mbe tat ra pechu kûgaibeibe luage pa hekuâpheu lu de lei; pa ’ndai’ngge tat kai ra mei be du chî mak ze pa zuapat kai de lei.

⁹Keneibe ne chi hatkaibe heram ge pa lung ze bam de lei, samhatkaibe pa nguaheu ka’nsamme chi Isaakbe benai Jakobbe je ngua lu hesangme ram ge hetiampaîki ge lung zeu.

¹⁰Chi pedimpung kabesingbe Hera ne tewgaibe zai peluiyi ra du pa ne tewgaibe namdi hangge pa ne piekuabambe ziegeneu.

¹¹Keneibe gene Sarale, pa henalungrabe ting ’nzû di leusedu samhatkaipeu je pa ’nnum’mmibeibe ziegene ’mpung dai ra ngau lu de lei.

¹²Chipauziegene chai de ra du yidibe riâ kau, mi hangkat dagene tinggîm ge hegi misongga bambe riâ, zai ’nggeukâm ge hegitmoîne seikamlak bambe riâ ze heluîhingpat ze bam ra chang lu de lei.

¹³Aime ze â keneibe gene chai kam di de lei, mâ-hatkai’ndibe ze â ngautâu sing gai mak ze kane beting kedeu ’mbene chize ngau gai lu rechâgailube runne zeu, zai penui â hesangme kedeirei ge penui kiram hang gabe kau ramme de lei be chîchang gai lu zeu.

¹⁴Aigumbe rasam sabambe kau ramme ze penui kiram hang peu de lei be teilia’nchichiak kai daseu.

¹⁵Penui zuapatbe heram je penui ne ’nningsau mak huî bam bei nung laîzai â, penui helatwang dai ra hangge pedâuyibe ngauderabe kau de lei.

¹⁶Kane heram yi-ka’nteube, chi tinggîm deze penui ne ’nchâ ze bam de lei. Chipauziegene Hera ne penui hangge namdi kedâkua’ndibe luigum ze penui ne peize pechu penui Rapeu ze kû ra du pa ne ’ngngam gai mak ze bam bei de lei.

¹⁷Samhatkaibe ramme ngaulupeu, Abrahambe ze pechu kedakbeibe luage keneibe gene pe na hangkatgap bambepeu Isaakbe je herâtew ze peipat kai ra kedâkua lu de lei,

¹⁸pechu, “Isaakbe dagezene ning chaname ji hang ’ntak kai bu lei,” acheu ze rangaibeipeu zeu.

¹⁹Ziemmena chaidime ruagene ’nsangdu Hera ne kuakchulube hangge Abrahambe ne ’nningtâu gai lei; chipau luitak gumbe gene Isaakbe je pa ngau dai lu de lei.

²⁰Keneibe gene Isaakbe ne Jakobbe benai Esaube hesua lunghangdairabe hangge Hera dage ’nnamgaibe ramme kie gai lu de lei.

²¹Keneibe gene Jakobbe, pa chai ra ge pe gu hetui peî ge pe ju ’ngkumkeu lu kellum ze Josepbe na hangkat-kat hangge ’nnamgai-’nggamsiak kai lu lei.

²²Keneibe gene Josepbe, pa keringbe tudkairabe liage, Israelme zuapatrabe rasam saliatâu gai lu lei, zai pa chaidibe pe gu kechaipum peireige tâtewrabe tak hang sa gai lu lei.

²³Keneibe gene Mosabe pechu lungkeu gai dege, pechu â pe pui benai pe peu ne kêu chum riâ tei’mbai ze bam lu de lei, chi napoine peluiyi-kadesangbe penui ne ngaudibe ziegeneu; zai penui ne Heguangpeu gu samde ze hing mak lei.

²⁴Keneibe gene Mosabe, pa chîngchu dege Pharaobe na heleu’mpui na lei be hangge peize pechu kûgailak ze bam lu lei,

²⁵hemui suigut luakat ngau-gailutarabe je sua â, Hera gu ziemmename dage tewkahereube ngualierabe deze kelâng lu zeu.

²⁶Pa getoabehi ngau ra peubambe ziegene Ijip heurâ ramme suadu Krista ji gene ka’ngngambe lierabe ze betâudi-ka’nteube hang pa â ’nning gai ze bam lei.

²⁷Keneibe gene Ijip heguangpeu lumpum pa ngaurabe je hing mak ze Ijip put kai lu de lei; ngauchilakpeu je ngau lu dadegeu.

²⁸Keneibe gene Tat’ntuahengi ze pa reibam ze, zai hejai kezin gai lu de lei, chidezai lungkeuraibe napoine ramme je tewchatpeu ne peize penui je deîtau mak ra hangge zeu.

²⁹Keneibe gene baudime ze heram changkube ge gum ze Kegiebe Sungkling kapat lu de lei; kane Ijipme chigum tew ra heka gai dege penui â hedui ge kehakchat kam gai di de lei.

³⁰Keneibe gene Jeriko gu kerie kedibe ze penui ne hezie senane tuaguâgaibe châng dege bakêu di de lei.

³¹Keneibe gene Rahable, chi pe pum zuateupui je hekuâpheumakme dage ngua’ngga gai mak tai de lei, pa ne heram ’ngkimpieme je ’nggumgaibeibe ziegeneu.

³²Zai I ne ’ndaikau sagaisua dai ra rei lau? Gideonbe, Barakbe, Samsonbe, Jephthabe, zai Dabidbe, Samuelbe zai kemeume rasam sa bam dai ra hangge a hang pehî ga de lei—

³³keneibe gene heguangram ramme duîwang lu, kapelingbe tâ tew gai lu, samhatkaibe ramme ngau lu, heradi mui ramme tewgekapkeu lu,

³⁴hemi getaube ranchi dei’mmitkeu lu, hiazutkie mui gene ’mbiapat lu, heran-gabe gene heranchibe ngau lu, herei ge sappat lu, chi miramme hereikangme je kumtualume bau rasam zeu.

³⁵(Keneibe gene) ’Mpuimi ramme zene penui kiduîme chaidime ringchukadaibe ngau lu lei. Hanggesame je â, penui ne keringbe yi-ka’nteube ge penui ringchu dai le ra hanggene penui ne hereu nei dadege penui je tewsâ ze tewhereu gai bei de lei.

³⁶Kêdame ramme ne teihenuitewbeibe, bêu ze lakbe zai hegeîria ne pi ze kebangki ge kai ze tewsabe lie ze bam lei.

³⁷Penui je â tingchu ne tuâ zai dâng na hang rumtap kai, hiazutkie ne bichat kai ze bam lei; meli benai kemei gei bâ lu tatrua, penui dage mâ de ga kezithit ze bam, tewsâ zai tewhereu bei de lei—

³⁸kedeirei ge penui hang â lung ra du yi ta di—tingkangram ge benai peloa’ntûm ramme ge kezitrua ze, zai hekâuki ramme benai kedeiki ramme ge bamrua lei.

³⁹Zai penui keneibe gene airamme leine ze keyibe hang riam gai ze bam leusedu samhatkai’ndibe penui ngaulak tai de lei,

⁴⁰anui hangge mâge â yi-ka’nteube bambe Hera ne ngau’ntuadibe ziegeneu, dezai anui je sâu ze â penui je tew’nsanggaimakrabe hangge zeu.