Read Zeme Naga HEBRAIME 12 Bible Online

HEBRAIME 12 - Zeme Naga bible

HEBRAIME 12

¹Chipauziegene sakkitewme ramme ne anui je kemua gum guâgit bam daze mi je tewritbe zat leine, zai hemui mi je retgitbambe ramme ze lutua nan ze anui sua ’mbe teri pakrabe hang kaikuabeibe lam’mbe heleuliachibe ne pak ze bam zu kei lei.

²Isua, anui hangge ’mpuî tewgairapeu, zai anui gu keneibe tewpuigaipeu, ’ngngamgairabe hangge ngaurau mak ze hesuiyibe hang heling pe suage kaikua’ndibe, chi heling ge hereuliegaipeu, zai Hera gu Heguang-bamrak ge hezat’mbia ’ntaugaidipeu je piesûn lu zeu.

³Ningnui ran-gakeu mak zai ningnui lung cheikeu mak ze bam ra, chi pe peireige hemuime ne aigum ngaugailak bambeibe ge pa hereuliegai’ndibe tak ze pechu ’nning gai ni lau.

⁴Ningnui â hemui je ka’nggibe ge hejai ranpatbe riâ ’nggichang gai mak rei lei.

⁵Zai napoine ramme je gum ze ningnui je yine ze gecheu’nrak kai ze mâ-saliabe ze ningnui â ’ngngaî ’ndi de mei?— “A na gau, Heguangpeu gu besie ze ’nningkelam gai se lau, zai pa ne ningchu tewsâbeibe luage ning lung ’ngkeîkeu ze nang bam se lau,

⁶Heguangpeu ne pa hungbe kau je laddei lei, zai pa ne pa ka’nchâme je sâ ze laddei lei,” kacheube zeu.

⁷Ningnui ne hereulierabe ze mâ-deiliarabe hang lei. Hera ne ningnui je hename peireige gum ze tâtew lei; napoine pe peu ne deimakbe kau châu la lau?

⁸Ningnui je kedeibe pei gai mak ze sâu gai ’ndizai â, ningnui chige bamme leine ze ’nchui ze lungkeube na mak ze rehane-na kam lei.

⁹Aipau peireige du, anui je laddei ra kedeirei ge mi peume bam de lei, zai penui ngêutew ze anui bam lei, anui ne herui ramme Peu je pe kuâ kangge keikeu’nteu ze bamrabe mak mei?

¹⁰Penui (kedeirei ge mi peume) ne penui ’nning’nzeigailube gene beting keduîne hangge anui je laddei gai ze bam de lei, kane Hera ne anui yirabe hanggene anui je laddei ze bam de lei, chidezai anui du pa gum ze ’nchi ze bam le ra hangge zeu.

¹¹Tingkat hangge mâ-mâ-besie geteiliabe zat leine ze hesuiyibe chang meraine geteubeted lielakbe hang chang lei; kane chigene geteichipatlume ze â chipau chângge karenuabe pelingtewbe rachî ’nchi ze bam lei.

¹²Chidaze ningnui leikeudibe ba ramme teichu gai ze ningnui kakedunbe kukra ramme tewperanchi gai lau.

¹³Ningnui tatbe ’mpuî ze tat’nzeitun ze tat lau, chidezai penui pîsiame penui pî tatkerîng mak ra, kane penui pî siabe tat’mmi le ra hangge zeu.

¹⁴Ziemmena ’nteumena dage nguadesieyichi ze bam ra, zai kesiatew mak ’nchichiak ze bam ra ransing-ran gai lau, chize ga ze mî de Heguangpeu je ngaulak lei.

¹⁵Mi-mige ne Hera ka’nggiabe ze ngaulak ze bamderabe hangge pie’mmi le lau; chidezai “hîngma gekabe” puakpat ze mâ-tewkeleu gai mak ra, zai chize ne ’nteumena je tewhebâ gai mak ra hangge zeu;

¹⁶chidezai mî de hangleutew mak ra, zai Esaube gum ze herasie suigailak ze bam mak ra hangge zeu, chi takkuak kat hanggene pe gu gechîngbe zuagai’ndipeu zeu.

¹⁷Chize ningnui chî dezei lau, bechâng dege â pa pe mikdui ne chi ’nnamgaibe nguaheu ra peu ze bam sede pa mâ de helidairabe ’mpuî hang gadibe ziegene chize pa nguaheu nei ze bambe luage pechu â tuâpatkaibeibe zeu.

¹⁸Deîtauduibe bâm, hemimelei bambe, zai kemuîbe, zai mi duânggabe, zai hedui-tingkai kechibe,

¹⁹zai hegeîluîkie kuâ, zai penui ne hekuâ seube, chi keseume zene aigumbe sam â penui dadege peize sa gai ta ra kiambe, chigumbe bâm ge ningnui â wang gai mak daseu.

²⁰Penui je samde peibe ge, “Mâ-rekaune ne ’nsangdu chipau kedeiloa ze deîtau dizai â, tingchu ne tuâ sing ra lei,” kacheube sam ze penui seugut-hung di de lei.

²¹Chi mâ-kengaube ze â mi ngauhing-kadesangbe kau de lei, Mosabe ne sa ze, “I hingkedun ze bam di de lei,” kacheu de lei.

²²Kane ningnui â Zaion Loa benai Keringbe Hera gu namdi ge, tinggîm Jerusalem ge, zai angelme seikamlakme ne ’nduilumteubambe bâm ge,

²³zai tinggîm ge heji rawgai’ndime, lungkeuraibe (meraibe kiangna) ka’nduibe bâm ge, zai haimena Rapeu chi samrampeu dage, zai helungka’nzeime gu herui ramme je tew’nsanggaibe bâm ge,

²⁴zai Isua, chi samhatkaibe karchibe ge desieyibe tewpeu dage, zai Abelbe jai suadu ka’nggiabe sam sa’mmi-gaika’nteube chi hejai kezin-gaibe bâm ge wangchang gai di de lei.

²⁵Kesakerangpeu je ningnui lugailak mak ra ’ntîngchi le lau. Kedeirei ge penui je deiliapeu je penui lugailakbe luage penui ne ’mbia lak bam dizai â, tinggîm ’mbene anui je deiliapeu je anui lugailakbe luage anui ne ’mbiachi lak ’nteu ze bam gu daseu.

²⁶Chidadege pe kuâ zene kedeirei tew’ngngailun gai bei de lei; kane pa ne chunage deseu gai ze, “Kane kedeirei je runne mak ze tinggîm je du I ne luakat tew’ngngailun gai gu rei lei,” kacheu de lei.

²⁷Aige, “Kane luakat tew gai dai ra” kacheube sam ze â tew’ngngaichilakbe je peize bam-bamrabe hanggene chi ’ndamgaibe zat tew’ngngaigai’ndibe tew’ngga gai ra rangbe hang teilia lei.

²⁸Chidaze tew’ngngaichilakbe, chi heguangram anui ne ngaulube hangge mi suiyi ze bam zu kei lei, zai chigum ze hengêutewbe benai hingchibe lungtak ne Hera ne luneibe kellum zat anui ne pe dage peipat kai ze bam kei lei;

²⁹anui Rapeu â rûka’nggabe hemi chang daseu.