Read Zeme Naga HEBRAIME 13 Bible Online

HEBRAIME 13 - Zeme Naga bible

HEBRAIME 13

¹Puinakattewbe kehungbe ze ningnui dage peize bam lau.

²Hesangme peireige ’nningkatinggeube kelam se lau, chigumbe ne hanggesame â penui chî mak ze angelme penui ki ge rêudau-gaichi daseu.

³Kebangki ge bamme je penui je nguabambe helî gumbe gene penui je chî bam lau; zai kategabe lieme je du chibam lau, ningnui pumkat ge bam daseu.

⁴Haimena ruage peize kahegiabe ngeu-tew’ndi ze bam lau, zai (penai runne ’nchichiak ze bam ra zangno) peize kahegiabe jeî ze tewhebâ gai ze bam se lau; hangleutewme benai kahemame je â Hera ne samram gu daseu.

⁵Rangkâng je hung mak ze temichai ze bam de lau, zai ningnui dage kebambe geze ningnui lungwângchang ze bam de lau; pa ne sabe ge, “I ne ningnui je mâtew-tewsedu sâu gai ra mak, zai put kai ra mak lei,” ze kacheu daseu.

⁶Chigum dadege anui ne helungdi ze sa dui lei, “Tingwang â achu ka’ngngâpeu lei, I hingsua ra mak lei; ziemmena ne achu ’ndaikau tewduibe la lau?” ze acheu zeu.

⁷Ningnui dage Hera gu sam saliame, ningnui gu besuitewme je chibam lau; penui ring ze bambe tak benai chaibe tak ze ’nning ze bam lau, zai penui keneibe tak ze heli lau.

⁸Isua Krista â, ’nzimai du, nemai du, zai betingbeta peluî bam lei.

⁹Mâ-geteiliabe zat châmperiube benai châmcheîbe zat ramme ne peize ningnui je ngualietat se lau; (Hera) ka’nggiabe zene mi lungran-tew’nchi lu bam ra yi lei, chi teu lu sedu kegiebe hang ngaumakbe hingde lam gu kahengîbe kuaktak zene mak zeu.

¹⁰Anui gu herâtewbe-bâmra kat lamui lei, chigene â kakellumbe-paîki ge tâka’ngguame (tingkume) ne mâ-teu ra buimakbe bâm zeu.

¹¹Hemui deu hangge herâtew ra tingkudilangpeu ne kakellumbe bâm ka’nchibe ge hejai teigutkai’ndibe gu chi kaurui gu kechaipum ramme ze â sieki hela ’mbene rû nan tai dadegeu.

¹²Chigum ze Isua du pe jai singbe gezene baudime je tew’nchi gai ra hangge namdi hela ’mbene hereulie gai de lei.

¹³Chidaze pechu ngauka’nnabe nguapung-gaihâ ze namdi hela ’mbe pe tailam anui zuapat zu kei lei.

¹⁴Aige anui hang namdi bam-bamrabe ga lei, kane namdi wangrabe deze anui a peu daseu.

¹⁵Chidadege pa (Krista) gezene Hera dage getoabe gu herâtewbe peipat kai ze bam kei lei, chize pe ji pauliabe mi mui gene patbe rachî de lei.

¹⁶Mâ-keyitewbe benai ningnui dage mâ-mâ-bambe miramme dage nguaziteu ze bambe tak ze ’nningkelam gai ze bam se lau; aigumbe mâ-peipatbe (herâtewbe) ramme ze Hera ne pe suiyi daseu.

¹⁷Ningnui gu besuitewme kuâpheu ze penui kuâ kangge bam lau; penui â ziemmena mâ-keyitewme chang ze ningnui keringbe deu hangge pie ze reî bam lei. Aipau tâ penui ne peize penui suiyi’nta ze tew bam lau, penui lungsui tew’nsia gai mak zeu, penui suisia dizai â chize ne ningnui hang sia ra chang daseu.

¹⁸Anui hangge kellumgaihâ lau, mâ-leine ge ’nning’ndi ze tâtew nei ze, anui dage mâ-chilube ’nchichiak ze la daseu.

¹⁹Zai kelua ze ningnui dage achu lang gai dai be ra hangge ningnui kellumgaihâ ra ningnui je I kiâm-desang la lei.

²⁰Chunage peize chi desieyibe Rapeu, anui Wang Isua, meli ramme je kereîbepeu dilangpeu, chaidime ruagene nguachugaidaibeipeu ne betunmakbe samhatkaibe hejai zene,

²¹mâ-keyibe leine ne ningnui je peize tew’nsang gai be lau, Isua Krista gezene pa ne pe mikngau ge keyibe ningnui ge nguatatew ze peize bam lau; pe dage pengêudibe ze betingbeta peize bam bam lau. Amen.

²²I ne ningnui je kiam lei, mi puiname gau, I ne gecheugaibe sam ze tei ze bam lau, I ne ningnui dage sam keduîne raw gai lei.

²³Anui puina’mpeu Timothibe je ’mpat kai bei ze la de lei be ningnui chî lei, pa ne wangkelua bei zai â, I ne ningnui je ngau gai ra pechu I ne ngua lu wangkeurapeu zeu.

²⁴Ningnui ge besuitewme benai keneibe lam ge ka’nchime je rechâgaibe sam pei gai lau. Itali gene wangme zene ningnui je rechâ gai de lei.

²⁵Ningnui ’nteumena dage (Hera) ka’nggiabe peize bam bam lau. Amen.