Read Zeme Naga HEBRAIME 2 Bible Online

HEBRAIME 2 - Zeme Naga bible

HEBRAIME 2

¹Chipauziegene anui seulube ge chî ra rankaibi-bi bam sing ra de lei, makchai â, chigene anui je tei’ntîtat kû daseu.

²Angelme ne sam paugaibe ze ranggaibe luigum wangchang zai hedieka’ngkabe zai hekuâpheumakbe zene hingde gene tewsârabe ngau dizai â,

³aigumbe tewka’nringbe kedibe je anui ne ’nningkelam dizai ’ndaigum ze anui ’mbiapatchi le ra lau? Chize â raîlangbe gene Heguangpeu ne rang’nchichiak kai ’ndi de lei, zai chize â, pe sam geseume ne anui je chize gesang lei be ze ranglia’nchi gai de lei,

⁴mâ-ka’nchetbe ramme, zai ningdaulakbe zat ramme, zai tâningdaulakbe tewbe gechâm-châmbe ramme zene zai pa ne pe suî’nning gene Herui Ka’nchibe kela ramme ’nzigai’ndibe chize ne Hera ne du sakkitewgaibe luage zeu.

⁵Kedeirei ting wangrabe chi anui ne sabambe geze samram ze bam ra Hera ne kaibe ze angelme je kai mak lei.

⁶Mâ-kage â acheu ze sakkitewgaibe bam lei, “Ziemmena nung ze ’ndaikau lau, pechu nang ’nninghereu bam ra hangge zeu, makchai ziemmena na ze du ’ndaikau lau, pechu nang ne ’nningtinggeu bam ra hangge zeu?

⁷Pechu â beting keduîne hang nang ne angelme je sua â tew’ncheibi gai lu pengêudibe benai hengêutewbe ne kraun luak kai bei de lei,

⁸mâgetaleine ge pa ne pe suitew ra pe pîkangge chiramme kai kam gai zeu” ze acheu zeu. Chunage pa ne mâgetaleine ge samram ze bam ra pechu peigaibeibe ge pe kangge mâ de kaimakbe ga lei. Acheusedu mâgetaleine pe kangge bam lei be chunage â anui ne ngau mak kerei de lei.

⁹Kane anui ne Isua je ngau de lei, chi beting keduîne hangge angelme suadu pechu â tew’ncheigaibeipeu kechaibe herêu liebe ziegene pengêudibe benai hengêutewbe ne kraun luakkaibeipeu jeu, chidezai pa ne Hera ka’nggiabe gene haimena hangge kechaibe ’ndâu gai ra hangge zeu.

¹⁰Misonggame je pengêudibe ge nguawang gai ra hangge, mâgetaleine pe hanggene bam zai pe ziegene bampeu, pa ne tew ra buibe luigum ze pa (Hera) ne chi penui gu tewka’nringbe hanggene zuapatkairaipeu je kahereube liebe gezene tew’nsang gai ra chang lei.

¹¹Tew’nchi ze bambepeu benai tew’nchigaibeime ramme penui patbe gesangsingbe bâm â kat kam di daseu. Chipauziegene pa ne penui je mi puiname acheu ze kû ra ’ngngam mak ze bam de lei,

¹²acheu sa ze, “A puiname dage I ne ning ji pauliâ gai gu lei, baudime ruage I ne ningchu toa gu lei,” acheu zeu.

¹³Sachu dai ze, “I ne ’nnumtewbe pe dage kai gu lei.” Zai sachu dai ze, “Aige I, a name, Hera ne achu peigaibeime la lei,” acheu zeu.

¹⁴Chidadege hemei benai hejai ge pe name, haimena ne nguaherua ze bam gum ze, pa du chigum ze heluilung ’nzuâkamdibe tak ge bam gai de lei, chidezai chi satan, kechaibe rezieteipeu je pa ne kechaibe gezene pechu tew’ngga gai ra,

¹⁵zai kechaibe je kehingbe gezene keringbe ting kebang ge bam ra changdime leine je lupat kai ra hangge zeu.

¹⁶Pelingsing ze pa â angelme hangge ’nninghereu me lei, kane Abrahambe chaname hangge ’nningkahereu lei.

¹⁷Chipauziegene ziemmename gu hemui ramme hangge desieyibe tew gai ra, pechu â mâ-leine ge pe puiname gum bam ra tew gai ra chang di de lei, chidezai Hera guâ ka’ngguabe ge pa ze ngauka’nggiabe benai lungsangtewbe gu tingku dilangbe chang le ra hangge zeu.

¹⁸Pa ne kahereube lietâu gai zai keduaibe lietâu gai ze bambe ziegene duaikaugaibeime miramme je pa ’ngngâchi ra chang lei.