Read Zeme Naga HEBRAIME 3 Bible Online

HEBRAIME 3 - Zeme Naga bible

HEBRAIME 3

¹Chipauziegene a puina ka’nchime, tinggîmme ne kûgaibe ge bamdime gau, anui ne paube Isua, chi apostol zai tingkudilangbe changbepeu je ’nning gai ni lau.

²Mosabe ne du Hera ki hangge lungsangsing ze bam gum ze pa â pechu sumgaipeu hangge lungsangsing ze bam lei.

³Heki kateleupeu ne heki sua â pengêudi ze bam gum ze, Isua ne Mosabe sua â pengêudi-bi ze bam ra bui sing lei.

⁴(Heki leine ze mige ne tew kam lei, kane (heki leine) mâgetaleine tewpeu ze â Hera lei.)

⁵Chunage Mosabe â tâka’ngguapeu gum ze Hera ki ge ’nninghekuî ze bam lei, bechâng dezai sapat kai be ra bambe ramme je sakkitew ra hangge zeu,

⁶kane Krista â pe Na chang ze Hera ki peireige ’nninghekuî ze bam lei. Zai anui ne ’nnumtew sing lu ze anui kaheguîbe ge mi ’nrîmyi ze bam dizai â anui ze pe ki de lei.

⁷Chipauziegene, Herui Ka’nchibe ne rangbe gum ze, “Nemai ge ningnui ne pe kuâ seu dezai,

⁸hênamkang ge kedak ze bambe mai ge, ningnui ne ’nggi ze bambe ting ge gum ze ningnui lung ramme tew’nchi lu ze bam se lau,

⁹ningnui peume ne achu kedak ze bambe bâm, zai tingkum hedai a tatew ramme penui ne ngau ze bambe bâm chi hênamkang ge gum zeu.

¹⁰Chipauziegene chipau reheime dage I ne a râta ze bam de lei, dadege I ne, ‘Penui â penui lung gene lietat’nsui ze bam lei; a gu ’mpuî ramme chî mak lei,’ ze I kacheu de lei.

¹¹Chigum ze a râtabe gene deset kai ze, ‘A gu gesaube bâm ge penui mâtew-tewsede gut ra mak lei,’ ze I ne kacheu de lei,” ze kacheu de lei.

¹²A puiname gau ’ntîng le lau, makchai â ningnui ruage mi-mige â siapat ze helung ge ’nnumka’mmibe ga di ze keringbe Rapeu dagene ningnui je ngua’ngga gu lei.

¹³Kane “nemai” acheu ze kû bam tânege patingnai’nsangne kat-kat je gecheu’nrak ze bam lau, chidezai hemui keduaibe zene ningnui lung tew’nchi nan ze bam mak ra hangge zeu.

¹⁴Keraîbe ge ’nnumka’mmibe bambe ze anui ne ’ntiprip ze nâlangbe riâ teikua dizai â, anui ze Krista meri ramme chang di daze

¹⁵“Nemai ningnui ne pe kuâ seu dezai ’nggi ze bambe ting ge gum ze ningnui lung tewranchi lu bam se lau,” ze sagaibe gum zeu.

¹⁶Seutâu lu sedu tingkang ze bamme ze chaume lau? Mosabe ne Ijip gene nguapatkaibeime bau ze mak ti lau?

¹⁷Chaume dage pa ne tingkum hedai pe râta gai ze bam lau? Chize â hemui tâ tewgai’ndime, chi hênamkang ge penui pum kâudime dage mak mei?

¹⁸Zai pe gu gesaube bâm ge mâtew-tewsedu penui gut ra mak lei, kacheube ze hekuâlumakme dage desetkaibe zangno, chaume dage pa deset kai lau?

¹⁹Chigum ze penui ne ’nnum’mmimakbeibe ziegene penui ne gutchi lak ti bambe ze anui ne ngau ze bam de lei.