Read Zeme Naga HEBRAIME 4 Bible Online

HEBRAIME 4 - Zeme Naga bible

HEBRAIME 4

¹Chidaze pe gu gesaube katemibe ge gut ra samhat kai ze bambe luage, anui ’ntîngchi ze bam zu kei lei, makchai â, ningnui ruage mi-mige ne chige gutlak te ra samram gai bei ze bam gu lei.

²Mi suiyibe sam karchibe ze penui dage wangchangbe gum ze anui dage wangchang gai lei; kane penui seulube sam ze penui hang â gierabe ngau mak tai de lei, keseume dage chize keneibe ge hedaulaktibe ziegeneu.

³Kedeirei putchube gene pe tatew ramme ze tew kam gai lu ze pa ne, “‘A gu gesaube bâm ge penui mâtew-tewsedu gut ra mak lei,’ ze I ne a lumpumbe gene deseu gai de lei,” ze pa acheu ze sa gai ze bam sedu, anui neilume â chige gut la daseu.

⁴Acheu ze mâ-kage â pasenabe mai rasam sagaibe bam lei, “Zai pasenabe mai ge â Hera ne pe tâ ramme tew kam lu ze ’ntak bam lei,” acheu zeu.

⁵Zai aipau ’nchui ge pa ne, “A gu gesaube ge â mâtew-tewsedu penui gut ra mak lei,” acheu kadai lei.

⁶Chipauziegene hangesame hang â chige gut ra chuna du lat ze bam lu, zai hanggesame hang â besua’ngka gene samyibe misuiyibe sam lutau lu, hekuâpheu mak bei dege, gutlaktime bamdibe ziegene,

⁷pa ne naimikpui kat, “Nemai” kacheube kai kadai de lei, tingtie ’ngka ge raw’ntuagai’ndibe sam, “Nemai ge ningnui ne pe kuâ seube luage, ningnui lungchi ze bam se lau,” kacheube sam ze, Dabidbe dagezene sa gai zeu.

⁸Joshuabe ne penui je sau’ntakkaibe pei bei laîzai â, Hera ne penui je kêdabe mai rasam â sa ra mak ku de lei.

⁹Chigum di dege Hera gu ziemmename hangge ’ntakbambe mai reibambe ze bam di de lei;

¹⁰mi-mige Hera sauka’ntakbe ge gutbe kau ze, Hera ne pe tâ tewbe gene sau’ntak kai gum ze pa du pe tâ tewbe gene sau ze bam de lei.

¹¹Chidaze chi sauka’ntakbe ge gut le ra rankai kei lei, chidezai chigumbe hekuâpheumakbe zat ge mî de keu gai mak ra hangge zeu.

¹²Hera gu sam â ring ze tâtewchibe kau, hiazutkie mui na lam liabe suadu liâ ze, zai mi keringbe benai mi herui kaheraibe riâ zai mi riâ ramme benai mi ’ngking bambe riâ gechigutchang ze, zai helung ge ka’nningbe benai tew ra ka’nningbe tak ramme ze yi ra nguateleu ze bam lei.

¹³Zai ’ndamgaibe zat mâ de pe masuage kebai me lei, kane anui kebambe tak rasam saliarapeu mikngau ge mâ-leine latlia ze teilia’nchiepuang gai ze bam lei.

¹⁴Tinggîm gene tatpelakeube, Hera na Isua, chi Tingkudilangpeu anui hangge bam di daze anui ne anui keneibe hatkaibe sam chize tei’ntiprip ze tei zu kei lei.

¹⁵Mi ran-gabe ge anui je ngau’nggiachilakbe tingkupeu zat â anui hangge â bam mak ze, kane mâ-leine ge anui je gum duai ze bam bei sedu hemui ge gutkaimakpeu anui hang â bam di daseu.

¹⁶Chidaze ’nnumtew sing lu ze ka’nggiabe heguang-bamrak taige anui wang’nna zu kei lei, dezai ngauka’nggiabe anui ngau ze kahereube hî ge ’ngngâ gai ra ka’nggiabe anui ngau le ra hangge zeu.