Read Zeme Naga HEBRAIME 5 Bible Online

HEBRAIME 5 - Zeme Naga bible

HEBRAIME 5

¹Ziemmena ruagene tingkudilangbe hang kelânggaibe leine ze â Hera lam gu tâ hangge ziemmename kelei ge tâtew ze, hemui zat ramme benai herâtewbe ramme peipat ze bam ra sum gai daseu.

²Pa du heran-game chang ze heran-game dage nguabambe kau dadege mâ-hie chimakme benai hekunrachime dage renua ze nguabamchi duî lei.

³Aipau ziegene miramme hang hemui-râtewbe peipat ra chang gum ze, pe runne pe gu hemui hang du hemui-râtewbe peipat himchang ra chang di de lei.

⁴Mî de pe runne pechu suang gai mak lei, kane pechu â Hera ne kû gai bei lei, Aaronbe je gum zeu.

⁵Chigum ze Krista du tingkudilangpeu chang ra pe runne pechu suang gai me lei, kane “Nang ze a Na lei, nemai ge I ne ningchu piakeu gai de lei,” ze pechu kacheupeu zene pechu â sum gai bei de lei,

⁶kêdabe bâm ge du pa ne ranggaibe ze, “Nang ze, Melkizedekbe tâtewbe tak gene, betingbeta tingku de lei,” kacheu gum zeu.

⁷Pe gu hemeipum ringbe ting ge pechu kechaibe gene tew’nringpatkaiduipeu dagene ka’nrungbe hekuâ gechibe benai hemikdui ne gekiambe sam ramme peipat kai de lei. Pe dage Hera je hingchibe lungtak bambeibe ziegene pechu pe kuâ ’ngking bei de lei.

⁸Pa Hera Na chang ze bam leusedu, pa kahereube liebe gene hekuâpheube tak ze getei lu de lei;

⁹zai pechu tew’nsang kam lu dege, pe kuâpheume leine hangge pa zene betunmakbe tewka’nringbe bangpui chang di de lei,

¹⁰Melkizedekbe tewbe tak gene Hera ne tingkudilangpeu hang sum gai bei zeu.

¹¹Aipau deu ge saliahungbe ramme misongga anui dage la lei, ningnui kun ramme ’ndakamdibe nêu.

¹²Chuna ting ge ningnui ze geteiliame chang de ra yi di ze bam sedu, Hera gu Sam ge raîlangbe samsang betâudibe ningnui je geteilia gai dai ra mige hangkat je ningnui ’nnang di de lei. Hetak gechibe makse kane tungdui ningnui ’nnang di de lei.

¹³Mi-mige tungdui ne ring ze bamme leine â, kapelingbe gu sam deu ge mâ-tewchi mak ze bam lei, pa napoine changdibe ziegeneu.

¹⁴Hetak kechibe â hesuitingdime hang lei, chi kesiabe gene keyibe ’nningchi ra penui sing ne mâ-tewhedagailube gene mâ-gechîbe bamdibe zeu.