Read Zeme Naga HEBRAIME 6 Bible Online

HEBRAIME 6 - Zeme Naga bible

HEBRAIME 6

¹Chidaze Krista gu keneibe-sie geteiliabe gu bepîbang rasam geteiliabe zat ramme ze sâu nan ze, hesuitingdibe lam anui tatzua zu kei lei, kechaibe tatew ramme gene heliwangbe benai Hera lam ge keneibe rasam gene putchu bam dai ta di zeu.

²Chi huika’nchibe (baptisma) rasam, heba getuapat ze tâtewgaibe rasam, kechaibe gene chukadaibe, zai betun mak ze samramrabe rasam geteiliabe tei lu zeu.

³Zai Hera ne lun bei zai â, airamme anui tew gu lei.

⁴Zai tingkat helungsui ’ngnguplai ze bamme tinggîm gu kela ’ndautâulume, zai Herui Ka’nchibe lutaulume,

⁵zai Hera gu samkeyibe gu pegut tak benai rehei wangrabe ge tâtewchibe rezie ramme bambe chîlume hangge â heliwang dai ra teleu dai dau lak lei,

⁶penui ne penui kesiabe ziegene Hera na je gia gai ze pechu ngau’nna ze bam ra tew gai ze, herasie sâurabe tâ penui ne tew ze bam dizai aî.

⁷Pelua’nsangne ge tingruikeu-bambe dui ze saklube heram, zai chize châume hangge helu tâ tew gai mei chime hangge hegineu puakpat ra peibe heram zene Hera dagene ’nnamgaibe ngau ze bam daseu.

⁸Kane chize ne hetu ramme benai heturie ramme ’nchipat tizai â, chize â matâu hang ga de lei, zai mâtiemak ze deset kai be ra runne de lei, pahekapbe ge â rûgai’nderabe ze de lei.

⁹Anui ne aigum sa ze bam sede, kehungme gau, ningnui deu ge â tewka’nringbe ngaurabe deu ge mâ-mâ yi-ka’nteube zat ramme ningnui dage kaisuâ ze la lei be anui ne chî’mmi ze la lei.

¹⁰Chuna riâ du ningnui tewbambe gum ze keneime ka’nchime je ningnui ka’ngguabe ge ningnui tâtewbe benai pe ji hang ziegene kehungbe ningnui ne teilia ze bambe ge Hera ne ’nningkelam ze bam ra pa ze pelingtewmakbe kau mak lei.

¹¹Zai ningnui kaheguîbe wangchangsing le ra ningnui laîkai ze bambe tak ze hetûn changsinggaibe riâ teilia ze bam ra ningnui ’nteumena je anui ne ka’nchâ de lei,

¹²chidezai ningnui jiesia ze bam mak ze, kane keneibe benai liechibe gene samhatkaibe ramme nguaheume helî kahelime ningnui chang le ra hangge zeu.

¹³Hera ne Abrahambe dage deseutewbe luage Hera pa ne deseutew gai ra mi de pa suadu kedibe kau gadibe ziegene pe runne pe dage deseutew gai ze,

¹⁴acheu sa ze, “Gesang sing ze I ne ningchu ’nnam gai ze ningchu tewpung gai gu lei,” ze kacheu daseu.

¹⁵Zai chigum ze Abrahambe ne hereu ze liekua lu samhatkaibe ngau di de lei.

¹⁶Ziemmename ne penui suadu dibime dagene sam deseutew run de lei, zai penui gu hetû-deu leine tew’ntiagairabe hangge sam deseutewbe bam de lei.

¹⁷Chigum ze pe gu pa tâtew ra ka’nnangbe bambe helidailakbe tak ze samhatkaibe nguaheurame dage teilia’mmi’nteu gai nei dege, chize pa ne deseutew ze tew’ntip kai bei de lei,

¹⁸chidezai chi helidailakbe zat na, chi Hera karasa tewchilakbe teiliabe ge bambe gezene ’nseubâm hang ngaulume anui zene chi anui suage kaheguîbe kaikua ze bambe lutâu sing le ra helungtewka’ndibe anui hang ngau le ra hangge zeu.

¹⁹Mi keringbe hangge aize ’ngngaidaimakbe benai ka’ntipbe ’nneiguak gum ze anui dage bam de lei, chi kaheguîbe, paîlîmsungbe seu ge helungbe bâm Hera bambe bâm,

²⁰chi Isua ne Melkizedekbe tâtewbe gum ze tingkudilangpeu chang lu anui deu hanggene pauka’ntuapeu chang ze tatkai’ndibe bâm, chige gutchangbe zeu.