Read Zeme Naga HEBRAIME 7 Bible Online

HEBRAIME 7 - Zeme Naga bible

HEBRAIME 7

¹Ai Melkizedekbe, Salem heguangpeu, Hera Hulangpeu gu tingkupeu, Abrahambe ne heguangme je gîchat lu wangbe luage suidau ze pechu ’nnam gai de lei.

²Zai Abrahambe ne mâ-leine ge kereu ge kat pe hangge lupat kai ze bam de lei. Railangbe ge pe ji rimba ze, “Kapelingbe heguang” ze kacheu de lei; chipau peireige du pa ze â Salem gu heguangpeu du chang lei, chize â desieyibe heguang kacheube lei.

³Pa â pe peu du zai pe pui du ga zai pe kiria ka’ntibe du ga lei, zai pe hangge â pa kedeirei ge zuakeuraibe ting hang du ga zai ringbetun-gaibe ting du ga lei, kane Hera Na je ngau’nzuâ gai ze betingbeta tingku chang ze bam lei.

⁴Pa di-kadesangbe tak ze pie gai ni lau! Reheime peu Abrahambe ne hereichâ ramme ngaube gene pechu kereu ge kat pei lei.

⁵Lebibe chaname tingku tâ-ngeu pung ze bamme zene penui puiname baudime, chi aime bau ze Abrahambe dagene piakeume kam ze bam sede, penui dagene kereu ge kat lurabe hangge penui hang hingde bam de lei.

⁶Kane penui kiria makbepeu, aipaupeu ne chi Abrahambe, samhatkaibe ramme ngaupeu je ’nnam gai bei de lei.

⁷Chîngpeu ne kahenapeu je ’nnamgaibe ze mâ de ’nning’nsia dai ra ga de lei.

⁸Zai aige â, ziemmena chaidaiderame ne kereu ge kat lu de lei, kane chige â pe rasam sakki tewgai’ndibe luigum ze ringbambepeu ne lu de lei.

⁹Kereu ge kat luka’nduipeu, Lebibe sing ne du Abrahambe dagezene kereu ge kat pei ze bam lei,

¹⁰chi Abrahambe je Melkizedekbe ne kahedaube ting ge, Lebibe â Abrahambe pum ge bam di rei dadegeu, ze mige ne acheu sa ra du la de lei.

¹¹Chunage Lebibe gu tingku tâ pungbe zat (chigene baudime hingde ngaube) chigene tewka’nsangbe ngau lu lei dizai â, chi Abrahambe gu gum makbe Melkizedekbe tewbe gum tew ra hangge kêdabe tingkupeu pat dai ra ’ndaikau ’nnang dai ra lau?

¹²Tingku tâ pungbe tak ge tewkakelibe bambe luage hingde ge du tewkakelibe bam ra ’nnang sing di de lei.

¹³Airamme chi pe peireige sa gai ze bampeu (Krista) â, hezat kêdabe kau lei, ai hezat kêdabe ki-kelak ge mâdau de mî de herâtewbe-kaira ge tâ’nggua gai mak lei.

¹⁴Anui gu Heguangpeu â Judabe kiria gene pat lei be ze ngau’nchichiak ze bam lei, zai chipau kiria ramme rasam sabe ge Mosabe ne tingkume rasam â mâ de sa mak lei.

¹⁵Melkizedekbe luigumbe gene kêdabe tingkupeu zuachu ze bambe ge zene aipau sam ze ’nchichiak ze wangchang de lei,

¹⁶hemeipumsie gu hekiria ’ntikeube ge hingde ne ka’nnangbe lam gene makse kane tew’nsiadaichilakbe keringbe gu rezie gene chi tingku hang changdipeu zeu.

¹⁷“Nang â Melkizedekbe tâtewbe tak gene betingbeta hangge tingkupeu de lei,” ze pechu sakkitew gai ’ndi daseu.

¹⁸Katlam ge, tingtie gu hingde ze â peran-ga zai betâugabe ziegene tei’mbiatua ’ndi lei,

¹⁹(hingde ze â mâ de tew’nsang lak dadegeu); kêdabe lam ge, Hera dage anui je nguawang’nnagaibe chi heguî ra bambe yi-ka’nteube ze teiwang gai bei de lei.

²⁰Kadeseube ga ze â chize acheu tew mak lei.

²¹Tingtie ge tingkume changme â mâ-kadeseube ga ze penui gu tâ tew lu lei, kane aipaupeu je â, kadeseube gene ranggai ze, “Tingwang ne deseu gai ’nde lei, pe lung ze keli dai ra mak lei, ‘Nang â betingbeta hangge tingkupeu de lei,’ ze acheu ze,” sa gai ’ndi de lei.

²²Aize ne Isua je samhatkaibe yi-ka’nteube hang tewgaibe chang lei.

²³Tingku tâ tewraime misongga bam de lei, tingku tâ sau mak tewtat bam ra hangge â kechaibe zene penui je nam’ndibe ziegeneu;

²⁴kane pa â (Isua) pe gu tingku tâ tewbe ze tingkat hang runne makze betingbeta tew bam de lei, pa â betingbeta bam-bambe ziegeneu.

²⁵Chigum dadege pa â tew’nring gai ra pa gezene Hera dage wangka’nname leine je pehî leine ge tew’nringchi lu lei, penui hangge kiegaihâ bam ra pehî’nsangne ge pa â bam bam dadegeu.

²⁶Chigumbe anui hangge â, tingkudilangpeu, ka’nchipeu, hetiâkgapeu, heziâkgapeu, hemuime dagene bamchâm ze bambepeu, tingkehube peirei ’mbe suangchu’ngngu gai ze bambe aigumbe kau bam ra ’nnang sing di daseu.

²⁷Pa â kêdame tingkudilangme gum ze nai’nsangne ge herâtewbe peipat ze, raîlangbe ge pe runne pe gu hemui hang, zai bechâng ge pe gu ziemmename hangge herâtewbe peipat ze bam ra ’nnang me lei; luakatne pe pum sing ne haimena hangge peipatkai’ndibe ziegeneu.

²⁸Pelingsing ze, ziemmename je â penui ran-gabe luî gene penui je hingde ne tingkudilangbe hangge sum gai bei de lei, kane betingbeta hang tew’nsanggaibeipeu, chi pe Na je â hingde suadu wangnâbe hatkai’ndibe gu sam ne tingkudilangpeu hangge sum gai bei de lei.