Read Zeme Naga HEBRAIME 8 Bible Online

HEBRAIME 8 - Zeme Naga bible

HEBRAIME 8

¹Chunage anui sabe leine ge betâudilangbe samkie ze â aize de lei: anui hang â tinggîm ge Reziechilangpeu gu heguang-bamrak hezat’mbia ge ka’ntaupeu tingkudilangpeu lamui lei,

²chi ziemmena ne tew’nsap makze kane Tingwang ne tew’nsapkaibe kakellumbe bâm zai kakellumbe-paîki gesang ge besuitewpeu tâka’ngguapeu zeu.

³Tingkudilangme changme leine je â mâ-kela ramme benai herâtewbe ramme peipat kai ze bam ra sum gai de lei; chigum ze ai tingkupeu zene du mâ-mâ-kela peipat ze bam ra chang di de lei.

⁴Chunage pa ze kedeirei ge bambe kau nung laîzai â, pa ze tingkupeu hang â chang ra mak ku de lei, hingde ne ranggaibeibe luigum ze herâtewbe ge kela ramme peipat ze bam ra tingkume ramme la daseu.

⁵Tinggîm ge ka’nchime kakellumbe bâm helî gene penui ne tâ’nggua ze bam lei; chigum ze Mosabe ne kakellumbe-paîki tew’nsap kai ra tewbe luage, Hera ne pechu mâ-getei gai ze acheu sa ze, “Tâtewrabe tak hang ningchu peloa gene teiliabeibe luî ze nang tew ra lei be chî le lau,” ze kacheu de lei.

⁶Kane chunage Krista â tingtie gu suadu yi-ka’nteube tâka’ngguabe ka’nchibe ze ngau lu de lei, samhatkaibe yi-ka’nteube gene pa â tatew dadegeu.

⁷Chi samhatkaibe keraîbe ge tewmaugaibe ga laîzai â, pa-kenabe hangge betâuyibe hang ngau ra mak daseu.

⁸Pa ne, “Beting ze wang gu lei, ze Tingwang ne rang lei, Israel kibau benai Juda kibau ruage I ne samhatkai-karchibe peigairabe ting zeu;

⁹penui pau-paime je Ijip ram gene nguapat kai ra I ne penui ba gene zupatkaibe mai ge samhatkaibe I penui je peibe gumbe mak zeu; a gu samhatkaibe ge penui tat bam mak lei, dadege I ne penui je liângri mak lei, ze Tingwang ne kacheu de lei.

¹⁰Chipau tingnaimikpui ramme chângge aize Israel kibaume dage samhatkaibe I ne peigairabe ze de lei, ze Tingwang ne kacheu de lei: I ne a gu hingde ramme penui lung ka’nningbe ge kai gu lei, zai penui lung ge chiramme raw gai gu lei, zai I ne penui Rapeu chang ze bam gu lei, zai penui ze a gume chang gu lei.

¹¹Zai penui ne penui kanghiâme leine je mâ-geteilia ze bam ra mak, zai ’nteumena ne achu chî ze bambe ziegene mi-mige ne pe sikina je, ‘Tingwang je chî le lau,’ ze acheu ra mak lei, penui cheilangbe gene dilangbe riâ chang zeu.

¹²Penui gu hemui-helut ramme ge I ne penui je ngau’nggia, zai I ne penui gu hemui ramme ze chî bam ta du daseu,” ze acheu sabe luage penui dage tâtewmaube bambe pa ne ngau dadegeu.

¹³Samhatkai-karchibe rasam sabe gezene chi keraîbe gu ze â pa ne periedibe (chîngdibe) hang tew gai de lei. Zai chi periekeudibe benai bamtiedibe ze â ga gai de ra chang di de lei.