Read Zeme Naga HEBRAIME 9 Bible Online

HEBRAIME 9 - Zeme Naga bible

HEBRAIME 9

¹Chunage Hera je kakellumbe benai kedeireime gu kakellumbe bâm ge tâtewrabe hingde ramme hang du keraîbe samhatkaibe ge bam lei.

²Hetiampaiki tew’nsap kai de lei, helabe sîam ge hemibung-kaira, zai mâ-kaira zai pualiabe tingku bam lei; chi deze Pebâm Ka’nchibe ze ku lei.

³Pakenabe paî lîmsungbe seu ge kakellumbe-paîki chi Ka’nchibe ruage ’Nchilangbe acheu kubeki sap ze bambe ge,

⁴gechâk ne tewbe mâ-perîmyibe rube-kaira, zai chi manna kaibe gechâkpiak zai Aaronbe tui, chi pebuâbuabe tui, zai samhatkaibe tingchudepei, airamme kaibe, gechâk ne kûmtuipiklube samhatkaibe hingdebung ze kai lei;

⁵chipau peireige pengêudibe kerubme ka’nggiabe bâmrak lîamsung ze bambe kai lei. Chuna ne â chiramme ze anui ne pelane ranglia kam lak lei.

⁶Airamme reheîwangkamlube chângge helabe kisîam lungge tingkume ne nai’nsangne gut lu, penui gu tingku tâ ’nggua ka’nsui lei;

⁷kane chi pakenabe bâm geze â, tingkum ge luakat tingkudilangpeu runne gut lei, pe hang benai baudime gu mâ-tewmaube hanggene pa ne peipatkairabe hejai ze tei sing lu zeu.

⁸Aige zene, helabe kakellumbe-paîki tei’nsap ze bam tâne â, chi ka’nchibe kakellumbe bâm ge gut ra ’mpuî lat kai mak kerei lei be ze Herui Ka’nchibe ne teilia ze bam lei.

⁹(Chize chuna rehei hangge mâ-geteiliabe hang changbe zeu). Kela ramme benai herâtewbe ramme peipatkairabe zene kakellumpeu hangge pe lungsui tewrebagaichi lak ze bambe tak zeu.

¹⁰Chiramme ze â, keteu-kesak zai huika’nchibe tâ tewbe ramme ge—besie karchibe ting wangchangmakbe lungge hela kengaube ge tâtewbe sie ramme hang runne chang lei.

¹¹Kane chunage mâ-wangchang ze bambe chi Krista ne mâ-keyibe ramme gu tingkudilangpeu chang ze liabe luage, chi hetiampaîki dika’nteube benai yi-ka’nteube (mi ba ne tewmakbe chi ’ndamgaibe zat makbe) gezene tatpela ze

¹²kemei ramme jai benai getumpoine ramme jai tei makse, kane pe jai singbe tei lu ze luakatne pelane hangge pa ne Ka’nchibe Bâm ge zuagut kai ’ndi de lei, chigumbe gene betunmakbe ripatbe pei gai zeu.

¹³Hebâdime ramme je tew’nchirabe hangge kemei ramme benai getumsei ramme jai zene kezin zai getummeleupui rube gu merui zene tew’nchi ze bam dizai â

¹⁴Krista mâ de pe dage heziâkga ze betunmmakbe Herui gezene pe runne pechu Hera dage peipatkaipeu jai gene â kechaibe tatew ramme gene ’ndaizeuge ningnui lungsui ze tew’nchi ’nteu gai be ra lau, keringbe Rapeu guâ ’nggua ra hangge zeu.

¹⁵Chipauziegene pa â samhatkai-karchibe gu desieyibetewpeu chang ze bam lei, chidezai mi-mige kûgaibeime ne betunmakbe hatkai’ndibe heurâ ze ngau le ra hangge zeu, keraîbe samhatkaibe kang gene hedieka’ngkabe ramme gene penui je ripatkaibe chi (Isua) kechaibe wangchangbeibe ziegeneu.

¹⁶Samhatkaibe rawgaibe deu ge chi samhatkaibeipeu chaibe ze chî sing ra ’nnang di de lei.

¹⁷Samhatkaibe rawgaibe ze â chaigaibe gene runne betâuchangbe chîpat ra chang lei, chi samhatkaibe rawgaipeu ze ring ze bam tâne â, chize chî sing ra ’nchi-chine lang mak daseu.

¹⁸Chigum dadege keraîbe samhatkaibe ’nsangdu hejai ga ze â (samhatkaibe ze) tew’ntip mak lei.

¹⁹Hingde gu samde leine ze Mosabe ne baudime dage rang’nchigaibe luage pa ne getumpoine ramme benai kemei ramme jai kebutlube ze mâ-gêugiebe ge benai hissop ge kai lu chi leisikuak singbe ge benai baudime ’nteumena je chize kezin gai ze,

²⁰acheu sa ze, “Aize Hera ne ningnui je diegaibe samhatkaibe hejai lei,” ze kacheu daseu.

²¹Chipau luigumbe gene kakellumbe-paîki benai kakellumbe ge teibe helikerua pelane ge pa ne hejai ze kezin gai bei de lei.

²²Gesangsing de lei, hingde kang gezene mâgetaleine hangge hejai ne tew’nchigaibeibe riâ gum ze bam de lei, zai hejai tewpatkaibe bam makchai â, hemui kelunbe ngau mak lei.

²³Tinggîm gu mâ-mâ helîtak gene teibe zat ramme hangge aigum herâtewbe sie gene tew’nchi ra chang lei, kane tinggîm gu mâ-mâ zat ramme hang â, ai suadu yi-ka’nteube herâtewbe zat ramme ze ka’nnang lei.

²⁴Mi ba ne tewbe kakellumbe bâm ge â, chi peluîtak singbe hang teiliabe, Krista ne gut kai makse, kane tinggîm singbe ge gut kai di de lei, chunage Hera masuage anui kelei hangge saplia gai ra hangge zeu.

²⁵Tingkudilangpeu ne tingkum ’nsangne ge pe jai singbe makbe, chi hejai ze tei lu Ka’nchibe Bâm ge gut-gut gum ze â, pa â pe runne pechu peipat dai peipat dai ze bam me lei;

²⁶chigum dizaine â kedei ’ndamchube gene pa hereulie dai lie dai ra chang gu daseu, kane pechu herâtewbe zene hemui lutua ra hangge rehei kamgaibe ge luakatne pelane hang pa ne lie gai bei de lei.

²⁷Zai ziemmena hangge luakat chai ra, zai chipau chângge samrambe wang ra hatkai’ndibe ziegene,

²⁸chigum ze Krista, misonggame gu hemui pung ra hangge luakat (chai gai ra) peipat kai lu ze pakenabe ge (pe runne pechu) lia gu lei, hemui deu hanggene ta di ze, kane pechu nei ze kuâbamme je tew’nring gai ra hangge zeu.