Read Zeme Naga JAKOB 1 Bible Online

JAKOB 1 - Zeme Naga bible

JAKOB 1

¹Jakobbe, Hera benai Heguang Isua Krista gua ka’ngguapeu ne, Mâ-mâ ge zat kereu-ze-kename bamrarip ze bamdime dage rechâgaibe.

²A puiname gau, ningnui je kakedakbe ramme hedau dezai, misuiyibe hangge riam gai le lau,

³ningnui aize chî lei, ningnui keneibe je kakedakbe gene liechibe pat lei.

⁴Zai ningnui liechibe ze peize besingsiak ze bam lau, chidezai ningnui mâge de ’nsangmakbetew mak ze puigit ze bam le ra hangge zeu.

⁵Ningnui ruage mige ne kaningchingbe cham ze bam lêuzai â, ziemmename leine je ’nggia-desang ze mâ de kiâ mak ze pei’nzie ze bambepeu, Hera dage pechu peize kie lau, chidezai chize pechu pei gai bu de lei.

⁶Kane ’nnumteguak mak ze keneibe gene peize pechu kie lau, mâ ngau ra ’nnumteguak ze bambe kau â sungkling ge tingkai ne hedui ze guigesuâk bei ze hedui ka’ngngaibe gum chang daseu.

⁷Chi ziemmena pe lungsui kena pungbe kau, pa mâ-tewbe leine ge besingsiakbammakbe kau â Heguangpeu dagene mâ-ngau ra mâtew-tewsede mâ de heguî ra ga daseu.

⁹Mâ-luîlak ze bampeu mi puina’mpeu je peize pechu suanggaibeibe ge pa ’nrîmyi ze bam lau,

¹⁰zai keheupeu je peize pechu tewhelêugaibeibe ge helêuku ze bam lau, hereuzeu ge bambe mâpâ gum ze pa â ga gai gu daseu.

¹¹Tingnaimik chu ze tingnaichiê hialumbup kai bei ze hereubuâ ramme heguinui gai di lei; chi mâpâ ze â ’ngkeîkeu di, zai chige ngauringbe bambe ze â ga gai di tai daseu. Chigum ze keheupeu â ’ncheu’nrui ze tâtewbe gene huikeu gu lei.

¹²Kakedakbe ge liechi ze bambe kau ze yi de lei, pa duîpat lu dezai Hera ne pechu kehungme je pei ra hatkaibe keringbe kraun ze pa ngau gu daseu.

¹³Peize mi-mige pechu duai bei dezai, “Achu Hera ne duai lei,” ze acheu se lau; Hera je â kesiabe ne duaikauchi lak zai pa ne du mî je de duai mak daseu;

¹⁴kane ’nteumena mi-mige pa ne mâ-ka’nchâbe gezene pechu tewkemeî ze tewkemak ze bamdibe luage pechu duaikau ze bam lei.

¹⁵Dadege helung ge ’nchiegai’ndibe gene hemui zuagut lei; zai hemui bamchîng di dege chai ra chang lei.

¹⁶A puiname nung gau, ningnui je peize choa ze bam se lau.

¹⁷Mâ-mâ-yibe peipatbe leine benai kela yika’nsangbe ze â kehu ’mbe Bepeu kebabepeu, chi pe dage kakelibe zai kezui kaukelitatbe gum ze â pe dage tewkeli ra gabepeu dagene wangkeu lei.

¹⁸Pa ne pe gu mâ-keringbe zat ’ndamgaibe ramme ruage anui ne raîlangbe rachî zat chang ze bam ra pe runne pe suî’nning gene anui je samsang sam ne nguapat kai bei de lei.

¹⁹A puina I hunglangme bau gau, aize chî bam lau. Peize ziemmena ’nteumena ne sam ’ngkingchi ze, samzeuchi ze, heraitie ze bam kam lau,

²⁰ziemmename helumpumbe zene Hera hangge kapelingbe tâ tew gai mak lei.

²¹Chidaze mâ-kahebâbe zat leine zai helungriaksiabe ne ’nniâmba bambe lutua nan ze linggai’ndibe sam ze helung karenuabe ne lutâu le lau, chi ningnui keringbe je tew’nringgaiduibe zeu.

²²Kane sam gu tâtewme chang lau, zai ningnui runne ningnui je duai ze ka’ngkingme changbe runne mak zeu.

²³Mige sam geseube kau chang lu tâtewpeu changmakbe kau â ziemmena mige judageî gene pe juluî singbe tak ’ntingpiepeu gum chang lei,

²⁴pa pe runne pechu ’ntingpie gai lu tat ti ze luakatne pe luî singbe tak ’ndaigumbe kau mei be ze pa chî ta di dadegeu.

²⁵Kane hingde yika’nsangbe, chi lungzeunetew ra peibe ge pie’mmi ze pa ne seulube ramme ’ngngaî mak kane chiramme (sâu mak) tewbambe kau â pa tâtewbe ge pechu ’nnam gai bu lei.

²⁶Mige ne pa ne herasie ge ’nningkahekuîbe kau lei acheu lu ze pe leiria ze reîchi mak kane pe lung ze duai ze bam dizai â, aipau ziemmena gu herasie ze â peruânggabe chang lei.

²⁷Hera benai chi Bepeu masuage ’nchichiakbe benai tewhebâgaimakbe herasie ze â aize lei: ’Nggiâ’nggêune benai kemîpuime ramme penui kahereube liebe ge ’ngkiâmierabe, zai kedeirei gene mi runne mi je tewheziâk kai mak bamrabe zeu.