Read Zeme Naga JAKOB 2 Bible Online

JAKOB 2 - Zeme Naga bible

JAKOB 2

¹A puiname gau, anui Wang Isua Krista, pengêudibe Wangpeu je ningnui nei ze bambe luigum ze kehung-ka’nrietewbe tâ tewlia ze bam se lau.

²Mige hangkat ne ningnui gu ka’nduibeki ge gechâk baruaine kap kai lu paîni yibe kai lu gut, zai kelaksiapeu hangkat ne du paî chak-chakrinbe kai lu gutbe ge,

³ningnui ne paîni yibe kai lu gutpeu hangge ’nning’nchuak ze acheu sa ze, “Ning suiyi ze aige ’ntau gai zu lau,” acheu lu, kane kelaksiapeu je â “Chilia sap lau,” ze mei nune “A pîkang ge ’ntau lau,” ze acheu dizai â,

⁴ningnui ne ningnui ruage ningnui tak siabe tewliabe mak mei, helungriaksiabe gene tâtewgai’ndibe zeu?

⁵A puina kehungme gau, ’ngking le lau. Kedeirei ge kelaksiame je keneibe ge lungyi ze bam ra, zai pechu (Hera je) kehungme hangge hatkai’ndibe heguangram ze nguaheurame chang ra Hera ne kelânggai’ndibe mak mei?

⁶Kane ningnui ne kelaksiame je tewhelêu gai bei de lei. Ningnui je kagetedme ze lungyime ne mak mei, ningnui je hetûki ge chakgutkaime ze penui ne mak semei?

⁷Ningnui ne pengêudibe ji pungbe ze saka’nsiabe penui zene mak semei?

⁸Rawdiakkaibe sam ka’nchibe ge, “Ning runne ningchu hung gum ze nang ning kiningme je hung ra lei,” kacheube luigum ze ningnui ne Hera heguangram gu hingde ze tewpui run lei dizai â ningnui mâ-tewchi de lei.

⁹Kane ningnui ne kehung-ka’nrietewbe tâ tewlia ze bam dizai â ningnui hemui tâ tew gai de lei, zai ningnui je hingde ne hedeka’ngkame hang riam gai ’ndi de lei.

¹⁰Mi-mige de hingde tei kam lu sedu, chui kat ge pa tew mak tizai â, pelane gu ge ka’ngkuibe chang de lei.

¹¹“Hema se lau,” kacheupeu ne, “Tewchat se lau,” ze du kacheu daseu. Nang ne hema mak sede tewchat tizai â, nang ze hedieka’ngkabe kau chang di de lei.

¹²Chidaze lungzeunetewbe hingde kang gene samramgaiberabe kau ramme gum ze ningnui sam sa zai tâtew ze bam lau.

¹³Ngauka’nggiabe gabe kau je samrambe ge â ngauka’nggiabe ga gu lei, acheusedu ngauka’nggiabe bambe kau â samrambe je hing ra ga daseu.

¹⁴A puiname gau, mi-mige ne, I keneibe la lei, ze acheu lu sedu pa tâtewbe ga dizai â pe hang kegiebe ’ndaikau la lau? Pe dage bambe keneibe zene pechu tew’nring dui semei?

¹⁵Mi sikina ’mpuimi mei ’mpeumi mei mige pe paîni kai’nchui gai ra ga zai mâ-teu’nchui gai ra ga acheu ze bambe ge,

¹⁶zai ningnui ruage hangkat ne penai je penai tâudeu hanggene mâ-ka’nnangbe zat ramme pei gai mak ze penai je, “Yize tat chu lau, lumbup zai ’nggeugit ze bam lau,” ze acheubeibe zene ’ndaikau kegiebe bam ra lau?

¹⁷Chigum ze keneibe â tâtewbe ga ze pe runne bam dizai â kechaibe lei.

¹⁸Kane mige ne, “Ning dage keneibe lamui zai a dage tâtewlube ramme lamui lei,” ze acheu gu lei. Nang tâtewbe ramme je rang mak ze ning dage keneibe bambe achu teilia lau, dezai a tatew ramme zene a dage keneibe bambe ze ningchu teilia gu lei.

¹⁹Hera â kat lei be ze nang ’nnum’mmi lei; nang mâ-tewchi de lei. Satan ramme ne ’nsangdu ’nnumka’mmi lei—zai hing ze kakedunbe zeu.

²⁰Nang kemiebe kau gau, keneibe ge tâtewbe gabe â perua lei be ningchu teilia gai be ra nang nei mei?

²¹Tâtewbe zene anui peu Abrahambe je tew’nzeigaibe mak ti lau, pe na Isaakbe je herâtewbe-kaira ge peipatkaibeibe luage zeu?

²²Abrahambe tatew ge keneibe tâtewchibe tak, zai keneibe je â tâtewbe zene tew’nsanggaibe tak,

²³zai rawdiakkaibe sam ka’nchibe ge, “Abrahambe ne Hera je ’nnumka’mmi lei, zai pechu kapelingpeu hang riam gai bei de lei,” kacheube ze nang chî de lei; zai pechu â Hera kangpeu ze kû bei de lei.

²⁴Ziemmena je â keneibe runne mak ze tâtewbe ne tew’nzei gai bei de lei be ningnui ngau le lau.

²⁵Chipau luigum ze Rahable, pe pum zuateupui du hepâupaume (heram ’ngkimpieme) je ’nggum gai lu kêdabe ’mpuî ’mbe penui je langgaibeibe luage chî tâtewbe zene pechu tew’nzeigaibeibe mak ti lau?

²⁶Mi pum ge herui gabe â kechaibe chang gum ze keneibe ge tâtewbe gabe â kechaibe chang daseu.