Read Zeme Naga JAKOB 3 Bible Online

JAKOB 3 - Zeme Naga bible

JAKOB 3

¹A puiname nung gau, ningnui ruage misonggame ne peize geteiliame chang ze bam se lau, mâ-geteiliame je â chukka’nteube gene samram gai bu lei be ningnui ne chî la daseu.

²Anui ’nteumena ne mâ-tewmau ’nsui ze bam lei, zai mige ne pa mâ-sabe ge mau gai mak tizai â, pa ze â ziemmena yika’nsangbe kau de lei, pe pum pelane je du reîchi lu daseu.

³Hekun ramme ne peize anui kuâpheu ra hangge penui mui ge anui ne hegeîdângpoine ramme chap kai lu dege â, penui pum pelane anui ne zu’nrei lu lei.

⁴Hedui’nnei ramme je du pie gai ni lau; chiramme di-desang bam leusedu zai tingkaichibe ne gui’nrui ze teitat ze bam sedu, chiramme ze â, kereitatpeu ne tauripoine teilube zene pa ne nei-nei ’mbe kereitat kai ze bam lei.

⁵Chigum ze heleiria du hepumtaura kecheibe kau de lei, zai mâ-mâ-kedibe ge kedikuâ-kua ze bam lei. Hênam kedibe ze hemirâpoine zene taubenbamdibe nung ze hêu!

⁶Zai mi leiria ze â hemi de lei, anui pum taura ramme ruage mi leiria â kesiabe gu kedeirei ze de lei, chize ne mi pum pelane ze tewhebâ ze mi kebambe tak ze rûka’nsia de lei, zai gehenna gu hemi ne ru de lei.

⁷Mâ-rekaune benai ’nruine zat leine, kedei ge liaruabe benai sungkling ge keringbe ’ndamgaibe zat leine je chinhegui dui lei, zai ziemmena ne chinkau lu ze bam lei,

⁸kane ziemmena ne heleiria je chinchi lak ze bam lei—reîgimlakbe kesiabe, chairabe heu ne puigit ze bambe kau dadegeu.

⁹Chi (heleiria) zene Heguangpeu benai Bepeu je anui toa ze bam lei, zai chi (heleiria) zene Hera luigum ze ’ndamgaibeime, ziemmename je anui deset kai ze bam lei.

¹⁰Chi hemuiki (mi-muiki) kat sing gene getoabe benai desetkaibe ze pat ze bam lei. A puiname gau, chize â acheu mak ra lei.

¹¹Depin kat gene hedui yibe benai kumtenittitbe luapat bei bei mei?

¹²A puiname nung gau, ’mbeuchîbang ne Olib chî ’nchipat dui semei zai grepchîria gene ’mbeuchî ’nchipat dui semei? ’Nchaîdui gene hedui yibe â patchi dai lak te lei.

¹³Ningnui ruage châu ningching zai herasie chî lau? Pa ne peize pe telungtak keyibe zene pe tatew keyibe tak ze chi kaningchingbe bambe kecheiluîtewbe gene teilia ze bam lau.

¹⁴Kane ningnui dage hemimeube kesiabe, zai ningnui lung ge mi gu siabe tak bam dizai â kedikuâ-kua ze samsang je duîzuttew ze bam se lau.

¹⁵Ai pau kaningchingbe tak ze â, tinggîm ’mbene wangkeube gumbe zat mak lei, kane kedeirei lam gu, herui lam gu â makbe, satan gu zat lei.

¹⁶Hemimeube benai mi gu siabe tak ge mâ-tâtewkagechutbe benai mi ngausiabe tâ tewbe zat leine bam gu daseu.

¹⁷Kane kaningchingbe kehu ’mbene wangkeube ze â raîlangbe ge ka’nchibe, chipau chângge desieyibe, karenuabe, nguayibe, ka’nggiabe zai keyitewchibe, airamme ze lei, chiramme ge mâ-gesang benai lungsang bambe zeu.

¹⁸Kapelingbe rachî gatbe ze â desieyibe tâ tewme ne desieyibe ge ling gai lei.