Read Zeme Naga JAKOB 4 Bible Online

JAKOB 4 - Zeme Naga bible

JAKOB 4

¹’Ndaikau ne herei hangge tewpat lau, zai ’ndaikau ne ningnui ruage ’nggî-kahegeibe tewpat lau? Ningnui pumtaura ramme ge kakeleube patbe ze ningnui ne neigai’ndibe gene patbe mak ti lau?

²Ningnui lunei da kane ningnui ngau mak lei; chidadege ningnui ne tewchat ze bam lei. Zai ningnui ka’nchie da zai ningnui hangge ngau mak lei; chidadege ningnui hereigiê ze herei ze bam lei; ningnui ne kiemakbe ziegene ningnui ngau mak lei.

³Ningnui kie da, zai ningnui hang dau mak lei, ningnui kenei-neibe tew ra hanggene ningnui ne tâumakbe gene mâkiebeibe ziegeneu.

⁴Lungsanggabe kau ramme run de lei! Kedeirei je ngua-mi-kangtewbe ze Hera ne ngaugailak lei be ze ningnui â chî mak mei? Chipauziegene mi-mige kedeirei kang changneibe kau â, pe runne pechu Hera teurei kau hang tewgaibe chang lei.

⁵Makchai rawdiakkaibe leisi sam ka’nchibe ge, “Chi Herui anui dage bam ra pa ne tewgai’ndibe gezene (anui je pe hang) ngauka’nchiebe chang lei,” kacheube ze betâugabe hang ningnui ne ’nnum gai mei?

⁶Kane pa ne anui je ka’nggiabe pei gai sua lei; chipauziegene, “Hera ne gechî-keditewme je ka’nggi lei, kane kecheiluilungpungme je ka’nggiabe pei lei,” ze acheu sa gai de lei.

⁷Chidaze Hera kuâ kangge ningnui gut kai zu lau. Satan je ningnui ’nggi lau, dezai pa ningnui dagene paktat tu lei.

⁸Hera dage wang’nna lau, dezai pa ningnui dage wang’nna gu lei. Zai ningnui helunglimpungme gau, ningnui lung tew’nchi le zu lau, zai ningnui helungsui kena pungme gau.

⁹Ningnui duângga zai desui ze hap ze bam zu lau. Ningnui ka’nnuibe ze peize kadesuibe chang de zu lau, zai ningnui suiyika’ntabe ze peize helungmuibe chang de zu lau.

¹⁰Heguangpeu masuage ningnui kecheiluîtewkeu ze bam zu lau, dezai pa ne ningnui je toa’ndi gai gu lei.

¹¹Mi puiname gau, kat-kat peireige sa’nsia ze bam se lau. Mi sikina je saka’nsiabe kau, zai kibe kau â, hingde peireige sa’nsia ze hingde je kibe chang lei. Kane nang ne hingde je ki dizai â nang ze hingde suibe kau mak ze kane samrampeu chang lei.

¹²Hingde peipeu zai samrampeu hangkat la lei, tew’nringduipeu zai tew’nsiaduipeu zeu. Kane nang ze châu lau, ning kining’mpeu je samram ra hangge zeu?

¹³Chuna ’ngking le lau, ningnui, “Nemai mei, ’nchuamai mei ge aigumbe namdi kedi-dibe ge anui tat ze chige kum kat ’nnai lu helîhedet ze pegiê ngau ze bam gu lei,” kacheume gau;

¹⁴’nchuamai ge ’ndaikau dau gu mei be ningnui chî mak zeu. Ningnui keringbe nung ze ’ndaikau lau? Ningnui â kemuangrâ luakat bamnak kai lu gagaidaidibe riâ daseu.

¹⁵Chisuarane â, ningnui ne, “Heguangpeu ne nei bei zai â, anui ne ring ze bam lu aize mei, chize mei be ramme tew ze bam gu lei,” ze acheu ra yi sing lei.

¹⁶Acheu ze ningnui â gechîrettew ze kedikuâ-kua ze bam di lei. Aigum ze kedikuâ-kuabe zat leine â kesiabe chang lei.

¹⁷Mi-mige mâ-ka’nzeibe tew ra chî lu tew mak saudaidibe kau ze pe hangge chize hemui chang lei.