Read Zeme Naga JAKOB 5 Bible Online

JAKOB 5 - Zeme Naga bible

JAKOB 5

¹Ningnui keheume gau, ’ngking’mmi lau, ningnui peireige mi duânggabe ramme wangrabe hangge hap ze ’nrung zu lau.

²Ningnui heu ramme tiam’ngga kam da, zai ningnui paîni ramme ’nsungkau ne teu’nsia kam de lei.

³Ningnui gu gechâk benai gepût ze ’nsam ne teu’nsia kam de lei, zai ningnui tâtewmaube la lei be hangge chi ’nsam teuka’nsiabe zene sakki teiliabe hang chang gu lei, zai chize ne ningnui je hemi gum ze rû ze teu kam ’ndu lei. Ningnui heu ramme ze (sia gai ra hang) nâlangbe ting hangge gekua gai de lei.

⁴Pe le lau, ningnui gu helugatme hî hang pei ra ningnui ne kenik ze bamme, chime zene ’nrungchu la de lei, zai chi helugatme ne ka’nrungbe kuâ ze baudime gu Tingwang kun ge seuchang de lei.

⁵Ningnui kedeirei ge ’ntane lungtemichai ze ningnui suiyi ze bam de lei; bichatkairabe mai hangge ningnui lung guîcha ze bam de lei.

⁶Ningnui ne chau’ngkui gai bei de lei, ningnui ne pelingtewme je tewchat kai bei de lei; pa ningnui je tingkang mak lei.

⁷Chidaze mi puiname gau, Heguangpeu wang mak tâne hereulie ze kuâ bam lau, pie gai ni lau, helutewpeu â tingruikeuraibe benai ruikeunâbe ngau mak tâne lie ze kedei rachî hunglangbe ze heguîkua bam lei.

⁸Ningnui du hereuliechi ze bam lau. Ningnui lung tew’ntip lu ze bam lau, Heguangpeu wangkeurabe hî â nadi daseu.

⁹Kat kat je sa’nsia ze bam se lau, mi puiname gau, chidezai ningnui je ki’nsia gai mak ra hangge zeu; pie le lau, samrampeu â kemuiki ge sap la de lei.

¹⁰A puiname gau, Heguangpeu ji gene samsame, kemeume kahereube liebe benai liechibe tak ze heli ze bam lau.

¹¹Pie le lau, ’ntiprip ze bamme ze yi de lei, ze anui kacheu de lei, Jobbe ne pe lung’ntiprip ze bambe rasam ningnui seu de lei, zai Heguangpeu ne mi je ngau’nggiachi ze bambe pa tâtew ra bambe tak ze anui ne ngau lu de lei.

¹²Kane a puiname gau, mâ pelane peireige ze tinggîm ji ne mei, zai kedeirei ji ne mei, zai kêdadabe ji gene samhat ze deseutew ze bam se lau, kane ningnui ne eu lei zai eu lei, acheu be, zai mak lei zai mak lei acheu be lau, chidezai chau’ngkuigaibe ge ningnui keu gai mak ra hangge zeu.

¹³Ningnui ruage mige hereulie ze bambe kau la mei? Pechu peize kellum lau. Mige pe suiyibe kau la mei? Pechu peize getoabe leu tew lau.

¹⁴Ningnui ruage mige teuneu-kahereube kau la mei? Peize pechu herakiangna gechîngme je kû lau, dezai peize penui ne Heguangpeu ji gene pechu taudui ’nnuk ze pe peireige kellum gai lau;

¹⁵dezai keneibe kakellumbe zene teuneu-kahereube kau je tew’mmi gai gu lei, zai Heguangpeu ne pechu kuakchu gai gu lei; zai pa ne hemui tâ tew gai ’ndizai du pechu lun gai bu lei.

¹⁶Chidaze ningnui gu hemui kat-kat dage ralia ze bam lau, zai kat-kat hangge kellum gai ze bam lau, chidezai ningnui je tew’mmi gai bu lei. Kapelingbe kau ziemmena ne kakellumbe ge tewka’mmibe reziechibe bam lei.

¹⁷Elijabe â anui luilung gum pungbe ziemmena lei, kane pa ne tingrui mak ra hang pe lungsing ne kellumbeibe ziegene kum chum ze kêu seruk lungge kedeirei ge tingruikeu mak tai de lei.

¹⁸Chipau chângge pa ne kellum gai dai bei ze tinggîm ’mbene tingruikeu gai dai bei de lei, zai kedeirei ge kedeirachi puakpat ze bam de lei.

¹⁹A puiname nung gau, ningnui ruage mi-mige samsang gene kezittat ti ze mi-mige ne pechu nguawang gai dai dizai â

²⁰hemui kau hangkat je pa ’mpuîki tatmaube gene pechu mi-mige nguawanggaikadaime leine je â kechaibe gene pa keringbe ze tew’nringpat kai gu lei, zai hemui ne pui ze bambe ze ruichim gai gu lei be ze pei ze pechu chi le lau.