Read Zeme Naga 1 PETER 1 Bible Online

1 PETER 1 - Zeme Naga bible

1 PETER 1

¹Peterbe Isua Krista gu apostol’mpeu dagene, Asia dei Pontas ge Galatia ge, Kappadosia ge benai Bithinia ge tewtimra’ndibe ziegene lungrariptattime,

²Hera Bepeu ne kelâng’ntua gai ze hatkai’ndime zai Isua Krista kuâpheurabe benai pe jai ne kezin-gairabe hangge Herui ne tew’nchigaibeime dage: Peize Hera ka’nggiabe benai desieyibe tewpung gai ze ningnui dage bam lau.

³Hera zai anui Wang Isua Krista Peu je peize toa ze bam bam lau! Chaidibe gene Isua Krista ringchukadaibe gezene pa (Hera) ’nggia kedibe gene anui kaheguîbe keringbe ge lung ze bam ra,

⁴zai ’nggadailakbe, deîhebâgaimakbe zai huikeumakbe, chi ningnui hang tinggîm ge kaikuabe,

⁵beting nâlangbe liâpat kai be ra tewka’nringbe hangge keneibe gezene pa ne Hera gu rezie gene reî’mmi ze bambe chi ’nnamgaibe ge anui je â lungkeurechi gai bei de lei.

⁶Chunage beting keduîne hangge kakedakbe zat gechâm-châmbe ramme ningnui hereulie ra chang ze bam leusedu, aige ningnui suiyi’nta ze bam ra de lei,

⁷chidezai ningnui gu keneibe gesang, gechâk suadu pemîhungbe, chi gadaiduibe hemi gene kedak kai bei leusedu, Isua Krista je liâgaibe mai ge chi (keneibe gesang) zene getoabe pengêudibe zai hengêutewbe ngau ra tew gai be ra hangge zeu.

⁸Pechu ningnui ngau mak bam sedu, pechu hung ze bam ra de lei; chunage ningnui ne pechu ngau mak ze bam sede pa ge ningnui pechu ’nnum’mmi ze hesuiyibe sachilakbe gene ningnui suiyi’nta ze bam zu lau.

⁹Ningnui keneibe gu ngamki, chi ningnui gu keringbe tew’nringpatkaibe, ningnui ne ngau ze bambe luigum zeu.

¹⁰Ka’nggiabe chi ningnui hang changrabe rasam paume, kemeume zene ai tewka’nringbe rasam ze peu ze ’mmêt ze bam de lei;

¹¹Krista ne hereulierabe rasam benai pe hangge pengêudibe wangchangrabe rasam deu ge penui ne pau’ntua ze bambe ting ge penui (kemeume) ne ’ndaigumbe ting ge wangchang ra mei zai ’ndaigumbe tak gene chize wangchang ra mei be hang Krista gu Herui ne penui dage mâ-teiliabe ze ’mmêt ze bam de lei.

¹²Aize penui je teilia bei de lei, penui ne tâ’nggua ze bambe ze penui hang mak ze ningnui hang lei be zeu, tinggîm ’mbene langgaibe Herui Ka’nchibe gezene ningnui dage sam paugaime ne, chi angelme ne ngau nei-desang ze bambe, ningnui dage mâ-mâ rang gai ze bambe tâ ramme zeu.

¹³Chidaze ningnui lung kedâkua le lau, ’nchinghîng ze bam lau, Isua Krista gu mâ-keliâbe ningnui dage wangbe, chi ka’nggiabe geze heguî sing lu ze bam lau.

¹⁴Hekuapheuchibe name gum chang ze, ningnui â tingtie mâ de chimakbe gene ka’nchiebe kesiabe zat ramme bambe ge hezuâgit ze bam se lau,

¹⁵kane ningnui je kûgaipeu ’nchi ze bam gum ze ningnui luilung kebambe tak leine ge ningnui runne ’nchi ze bam lau;

¹⁶“I ka’nchi daze ningnui ’nchi ra lei,” acheu ze raw gai ’ndi daseu.

¹⁷Zai mi-mige ’nteumena je kehung-ka’nrietew mak ze penui tatew luigumbe gene samram ze bambepeu je ningnui ne kellum ze a Peu acheu ze kû dizai â, ningnui hesangme chang ze bambe ting tâluî ge hengêutew ze kehingbe gene ningnui luilung pungchi ze bam lau.

¹⁸Pemîgabe luilungtak ningnui kihik ge bamdibe chi gene ningnui je, gadaiduibe zat gepût mei nune gechâk mei ne mak ze,

¹⁹kane Krista jai pemîhungbe, melipoine jai heziâkgabe ka’nchibe zene ningnui je ’nri gai bei de lei be ningnui gechîme kam de lei.

²⁰Pechu â kedeirei bam mak ’ngka gene hatkai’ntua ’ndi de lei, kane pechu â ningnui hang ziegene beting nâlangbe ting gene liâ gai bei de lei.

²¹Chi chaidibe gene kuachu gai lu, pechu pengêudibe peigaibeipeu, Hera peireige ningnui pa (Isua) gezene ’nnum’mmi ze bam lei, chidezai ningnui gu keneibe benai kaheguîbe ze Hera ge bam le ra hangge zeu.

²²Mi puiname je hungchirabe hangge samsang kuâ ningnui pheube gene ningnui keringbe ze tew’nchi lu ze ningnui lung sing ne ningnui kat-kat je hungchi ze bam zu lau.

²³Ningnui je â Hera gu keringbe sam zai mi je ngua bam-bambe sam, chi gadaiduibe helei gezene mak ze, kane chi gadailakbe helei gezene lungkeurechi gai bei ze bam de lei;

²⁴“Hemeipum leine ze hereubuâ gum lei, zai hemeipum ngeudibe ramme leine ze chi hereubuâ ramme gu bepâ ramme gum lei. Hereubuâ ze heguikeu lei, zai bepâ ze ’ngkeîtat lei,

²⁵kane Tingwang gu sam â betingbeta bam bam lei,” kacheu daseu. Chi sam ningnui dage paugaibe ze â, misuiyibe sam karchibe lei.