Read Zeme Naga 1 PETER 2 Bible Online

1 PETER 2 - Zeme Naga bible

1 PETER 2

¹Chidaze katîmphibe luilungtak leine zai helungriaksiabe leine zai mi lung mâ-gesanggabe tak leine, zai hemimeube zai miramme ’nsâ tew’nsiachibe tak leine sâu kam ne lau.

²’Ngngiêne lungkeu karchibe poine ramme gum ze Herui lam gu tungdui ’nchichiakbe je huî ze bam lau, chidezai chi gezene tewka’nringbe lam ge ningnui chîngchu ze bam le ra hangge zeu;

³ningnui Heguangpeu ka’nggiabe yibe gu pegut tak ze ’ndâutau gai lu daseu.

⁴Pe dage zuawang lau, chi ziemmename ne tuâpatkaibeibe, keringbe tingchukâng kane Hera mikngau ge â kelânglube benai pemîhungbe hang changbe gezeu;

⁵zai herui lam gu herâtewbe ramme Hera dage yilangbe chang ze Isua Krista gezene peipat kai ze bam ra hangge ka’nchibe tingku tâ tewbe bâm hang chang ra ningnui runne ne keringbe tingchukâng ramme hang chang lu herui lam gu heki tew le ra hangge zeu.

⁶Rawdiakkaibe sam ge, “Pie le lau, Zaion ge tingchukâng kat I ne kai lei, kelânggai’ndibe zai pemîhungbe pemikchukâng kat zeu, zai pa ge ’nnumka’mmibe kau je â, tew’ngngam gai ra mak lei,” ze acheu ze rang la daseu.

⁷Chidaze ningnui ’nnumka’mmime hangge â, pa ze pemîhungbe kau de lei, kane ’nnum’mmimakme hang â, “Chi tingchukâng hekitewme ne tuâpatkaibeibe zene pemikchukâng betâudilangbe hang chang gai di de lei,”

⁸zai “Chi ziemmename je tew’nrapkâurabe tingchukâng, chi penui je tewkaurabe tingchu zeu;” penui ne sampheumakbe ziegene ’nrap lu ze kâu lei, penui hangge â aigum tew ra hatkai’ntua’ndibe luigum zeu.

⁹Kane ningnui â kelânggai’ndibe zat, heguang tingku kiria, ka’nchibe heramzatme, Hera gu ziemmena singme bau lei, chidezai ningnui je kemuîbe bâm gene pe gu mi ningdaulakbe kebabe ge kûgaipeu gu ningdaulakbe rasam ramme ningnui ne pauliâ le ra hangge zeu.

¹⁰Tingkat â ningnui Hera gu ziemmename chang mak ze bam da kane chuna â chang ze la de lei; tingkat â ningnui ka’nggiabe ngau mak ze bam da kane chuna â ningnui ngau lu ze la de lei.

¹¹Kehungme gau, hesangme heluîchimakme benai hesangme ram ge kebang chang ze bamme je gum ze I ne ningnui je kiam lei, ningnui keringbe je herei ra tewgaibe chi hemeipumsie ka’nchiebe ramme gene ’mbia ra hangge zeu.

¹²Jentailme ruage ningnui luilung pungchi ze bam lau, chidezai penui ne ningnui je tâ-kesiabe tewme hang chak kai ze saka’nsia mei be ge penui ne ningnui tâ-keyibe tewbe ramme ngau lu ze Hera ’ngkiâwangbe mai ge pe ngêutew’ndichi le ra hangge zeu.

¹³Rezietei ze tâtewme ze pebaume kuâ kangge Heguangpeu hang ziegene keikeu ze bam ra lei, heguang (emperor) dilangpeu dage lêuzai,

¹⁴tâ-kesiabe tewme je tewsâ ze mâ-ka’nzeibe tewme je toa ze bam ra pa ne sumgaibeime laksaibe ramme dage lêuzai penui kuâ kangge bam ra lei.

¹⁵Mâ-ka’nzeibe tewbe gene ningnui ne kemieme mâ-chî mak kakebiengbe tewrimgairabe ze Hera ne keneibe daseu.

¹⁶Lungzeunetewme gum ze ningnui bam lau, sede ningnui lungzeunetewbe ze mâ-kesiabe tâ tewrabe zeu hangge tei gai mak zeu; kane Hera gu tâka’ngguame gum ze bam lau.

¹⁷Haimena dage hengêutewchi ze bam lau. Mi sikina changme je hungchi ze bam lau. Hera je hingchi ze bam lau. Heguangpeu (emperor) ngeutewchi ze bam lau.

¹⁸Tâka’ngguame gau, mâ-leine ge ningnui paume kuâ kangge bam lau, ’nggiachime benai renuachime dage runne makse kane tâtew ra gechungchime dage du chigum ze bam lau.

¹⁹Mi hangkat ne Hera je gechîbe gene hereukezei mak ze hereulie bam dizai â pechu â ka’nzeibe hangge lu gai bei de lei.

²⁰Ningnui ne kemakbe tâ tew bei ze, ningnui ne hereulie ze bam dizai â ningnui ji yirabe hangge ’ndaikau la lau? Kane ningnui ne ka’nzeibe tew gai bei ze, ningnui hereulie ze bam dizai â, ningnui je Hera ne ka’nzeibe hangge lu gai bei de lei.

²¹Aipau deu hanggene ningnui je kû gai de lei, Krista ne ningnui pe pîpa ge sui ze bam ra, mâ-teiliabe ningnui dage sâudiak kai ze ningnui hangge pa ne du hereulie gai ’ndi daseu.

²²Pa â hemui tâ tew gai me lei; pe mui ge kechoabe sapatkaibe sam ngau mak lei.

²³Pechu ’nrûbeibe luage pa ne ’nrûkak dai mak lei; pa hereuliebe luage kedunglia mak lei; kane pa â pechu ka’nzeibe gene samramgaipeu dage ’nnumtew ze bam lei.

²⁴Pa sing ne hingbang gene anui gu hemui ramme ze pe pum gene pung bei de lei, chidezai hemui hangge â anui chai gai ze ka’nzeibe hangge anui ring le ra hangge zeu. Pe jam zene ningnui je tew’mmi gai bei de lei.

²⁵Ningnui ze meli ramme gum tatlietat ti de lei, kane chuna â Melireîpeu zai ningnui gu keringbe Kereîpeu dage ningnui ne helatwang dai bei dadegeu.