Read Zeme Naga 1 PETER 3 Bible Online

1 PETER 3 - Zeme Naga bible

1 PETER 3

¹Chigum ze henâu changme ramme gau, ningnui napeume kuâ kangge bam lau, chidezai mi-mige hanggesame (penui napeume ne Hera hangge) hekuâpheu mak ze bam sede penui nâu ramme kebambe luilungtak gene mâ de sam ne rang mak sede, penui je duîwang le ra hangge zeu,

²ningnui ne hengêutewchi ze ’ntiaria ’nchichiak ze bambe luilungtak penui ne ngau lu dezai neu.

³Ningnui gu (kakerube lam ge) hetamkitbe, gechâkteuria ka’nteube zai paîni teibe ramme ge hela kengaube ramme hangge kakerube peize chang se lau,

⁴kane chize ngaumakbe helung gene helungsui ka’nchibe benai karenuabe gu gepût gadailakbe, chi Hera mikngau ge pemîhung-kadesangbe zene kakerube peize chang lau.

⁵Chigum ze tingtie ge keneibe lam ge ’mpuimi ka’nchime ramme, Hera ge heguî ze bamme zene penui runne penui je keru ze penui napeu kuâ kangge bam de lei,

⁶Sarale ne Abrahambe kuâpheu ze pechu a pau (a wangpeu) acheu ze kû bam gum zeu.

⁷Chigum ze ningnui ’mpeumi ramme gau, ’mpeumi benai ’mpuimi kakge ’mpuimi â heran-gabibe zat lei be chî lu ze ningnui nâu ramme dage mâ-’nningchi ze lung lau, ningnui ’nteumena ze keringbe hangge ka’nggiabe peibe ze nguaheukaheruame kam daseu, peize ningnui kakellumbe ramme tewnam gai mak ra hangge zeu.

⁸Nâlangbe ge ningnui ’nteumena ne lungkat-suikattew ze kat-kat je ngau’nggiachi ze, mi puiname je hung ze, karenuabe lungtak pung ze, zai kecheiluilung pung ze bam lau.

⁹Kesiabe je kesiabe ne, zai ka’nrûbe je ka’nrûbe ne peiruî dai se lau; makte ’nnam gai be lau, ningnui ’nnamgaibe ngau le ra aipau hangge ningnui je â kû gai bei daseu.

¹⁰“Mige keringbe je hung ze betingyibe ngau nei ze bambe kau â peize pa ne pe leiria ze reîchi lu ze bam lau, zai pe mui ze miramme je sa’nsiachibe gene peize reîchi le lau;

¹¹kesiabe gene peize pechu ’mbia lu ze ka’nzeibe tew ze bam lau, peize desieyibe peu ze chize gua’nsa ze bam lau.

¹²Tingwang mik â, pelingtewme peireige bam, zai pe kun â, penui kakellumbe kuâ hangge lat bam daseu. Kane Tingwang ju â, kesiabe tâ tewme pereige bam lei,” kacheu daseu.

¹³Chunage ningnui ne mâ-ka’nzeibe tew ra lungsangsing dizaine ningnui je tewhereurabe kau châu la lau?

¹⁴Kane ningnui ne ka’nzeibe tâ tewbe hang ziegene hereulie ze bam zai du ningnui je ’nnam gai bu lei. Penui je hing ze bam se lau, ningnui lung du tewhereu ze bam se lau;

¹⁵kane ningnui lungge â Krista je Tingwang hang suang gai ze bam lau. Ningnui dage kaheguîbe bambe deu tak ze penui dage salia ra kûme leine dage samkakrabe hang pehî’nsangne ge kedâkua ze bam lau, acheusede chize karenuabe benai hengêutewchibe gene tew lau;

¹⁶zai ningnui lungsui ze ’nchichiak ze bam lau, chidezai, ningnui dage ka’ngkuibe tâ tew gai dezai, Krista gene ningnui heluilungyibe pung ze bamme je saka’nsiame je tew’ngngam gai be ra hangge zeu.

¹⁷Ka’ngkuibe tewbe gene kahereube liebe sua â, chize Hera ne keneibe dizai â ka’nzeibe tewbe gene hereuliebe â yi daseu.

¹⁸Krista ne du luakatne pelane hangge, kapelingme benai pelingmakme hangge chai gai bei daseu, dezai pechu hemeipum ge tewchatkaibeibe (kane) herui gene pechu tew’nringgaibeibe gene anui je Hera dage nguawang gai be ra hangge zeu;

¹⁹chige zene kebangki ge herui ramme bamme dage tat ze pa ne samyibe pau gai de lei,

²⁰chi dui’nneiki Noabe ne tewbe ting ge Hera ne gesut ze kuâbeibe luage hekuâpheumakme dage zeu, chige hangdesatme bau pebau gechâmne runne hedui gene ringpat lei.

²¹Chipau (hedui) hangge ka’nzuâbe baptisma zene chunage ningnui je tew’nring gai ze bam lei, hepum gene kahebâbe lutuabe zat hangge makse, kane

²²chi tinggîm ’mbe tat ti ze Hera hezat’mbia ge angelme, rezieteime je ngua’ntau ze pe kangge reziechibe ramme bambepeu, chi pa Isua Krista ringchukadaibe gezene ziemmena lungsui ge keyi-kesia chî’nchichiakbe bamrabe hangge Hera dage kiambe changrabe hang gezeu.