Read Zeme Naga 1 PETER 4 Bible Online

1 PETER 4 - Zeme Naga bible

1 PETER 4

¹Chidaze hemeipum ge Krista ne hereulie gai ’ndi daze chipau lungningtak ze hereikerua chang ze ningnui dage kai le lau, hemeipum ge hereuliegai’ndibe kau â, hemui gene sau gai di daseu,

²chidezai ningnui hemeipum ge ring ze bambe ting ge ziemmena ne ka’nchiebe sie gene lung ta di ze kane Hera ne keneibe gene lung ra hangge zeu.

³Tattibe ting ge Jentailme ka’nchâbe tâ ramme, lungkahailabe, hemeipumsie ka’nchiebe ramme, kameneube, lungka’ntabe, teu-sak ze kakebiengbe, zai besiemakbe heraluîtewbe je kakellumbe, airamme tew ze bambe zene kebuibe riâ hang peize chang gai de zu lau.

⁴Penui (Jentailme) kebambe luilungtak kesiabe ge chuna ningnui ne ngua’nzuâ mak bambeibe geze ningnui je penui ne ’nningdaulak ze bam de lei, zai ningnui je sa’nsia ze bam de lei;

⁵kane kechaime benai keringme je samram ra bamkuapeu (Krista) dage penui tâtewbe tak rasam ze pei gai gu lei.

⁶Aipau hang ziegene kechaime dage ’nsangdu gospel rasam â pauchang gai de lei, dezai ziemmename je gum ze hemeipum ge samram gai bei sede Hera gum ze herui gene penui ring ze bam ra hangge zeu.

⁷Mâgetaleine kamgairabe hî ze na de lei; chidaze kakellumbe lam ge helungka’nningbe ’nchichiak ze mi runne mi je reîchi ze bam lau.

⁸Mâkedabe suadu, ningnui kat-kat hangge kehungbe ze sau mak ze tei bam lau, kehungbe â hemui misongga bambe ze ruichim daseu.

⁹Tingchiam mak ze hesangkeichi ze bam lau.

¹⁰’Nteumena ne kela ngaube luigum ze Hera ka’nggiabe gechâm-châmbe zat teichime chang ze chize kat-kat dage ’ngguachi ze bam lau:

¹¹Mi-mige ne sam sa dizai â mige ne Hera gu sam sapatkaibe luî pa sa ra lei; mi-mige ne tâ’nggua dizai â mige ne Hera ne peigaibeibe ranchi gene ka’ngguabe luî pa ’nggua ra lei; chidezai mâ-leine Isua Krista gezene Hera ngeu-tew’ndi gai be ra hangge zeu. Pe dage pengêudibe benai tâtewchibe reziechibe peize betingbeta bam bam lau. Amen.

¹²Kehungme gau, ningnui je kedak ra hangge, mâdau de ningnui dage wangchanggaimakbe gumbe zat, chi hemited geteube gum ze kakedakbe peranchibe ningnui dage wangbe ge ’nningdaulak ze bam se lau.

¹³Kane Krista hereuliebe ge nguahereuliebe hang chize ne chang ze ningnui suiyi’nta ze bam lau, dezai pe dage pengêudibe liâ gai dezai hesuiyi’nta ze bam de ra hangge zeu.

¹⁴Krista ji ziegene ningnui je ’nrû ze bam dizai â ningnui je ’nnam gai de lei, ningnui peireige pengêudibe herui benai Hera gu herui bambeibe ziegeneu.

¹⁵Kane ningnui ruage mi-mige ne hereuliebe ge kegîbepeu ne, zai kahegapeu, zai ka’ngkuibe tâ tewpeu ne, zai tewkeleurua ze bambepeu ne hereuliebe gumbe gene peize hereulie ze bam se lau.

¹⁶Acheuleusede mige Kristian changlube ziegene hereulie dizai â peize pechu ’ngngam ze bam se lau, kane chipau ji gene peize pechu Hera ngeu-tew’ndi ze bam lau.

¹⁷Samramrabe ze Hera kibaume dagene putchurairabe beting-pehî wangchang di daseu; zai chize anui dagene putchurai dizai â Hera gu gospel kuâpheumakme hangge nâlangbe ge ’ndaikau wangchang gu lau?

¹⁸Zai “Katelingme je tew’nring gai ra hung dizai â kahebame benai hemuime ’ndaikau ge liâ gai ra lau?” kacheu de lei.

¹⁹Chidaze Hera keneibe tak luî gene hereulie ze bamdime je peize ka’nzeibe tew ze chi Ka’ndampeu lungsangtewpeu dage penui keringbe peipat kai ze bam lau.