Read Zeme Naga 1 PETER 5 Bible Online

1 PETER 5 - Zeme Naga bible

1 PETER 5

¹Chigum ze, I ne gechîngme ruage gechîngme kanghiâ’mpeu, zai Krista hereuliebe ramme je sakkitewpeu, zai chi pengêudibe liârabe bambe ge hedamlupeu chang ze ningnui ruage gechîngme ramme je I ne gecheu’nrak kai de lei.

²Ningnui ne teibe Hera gu melidung je reî’mmi ze bam lau, ’nchi-chine kiambeibe ne makse, kane helung gene ka’nchâbe geneu, mi ka’ngngambe pegiê ngaurabe ne makse, kane tewnei ze tew zeu,

³ningnui ne reî ze bambe meli ramme peireige mi sui-sui tew ze ’nrakteibe ne makse, kane melidung ne keyibe helirabe hangge lungliâ gai zeu.

⁴Zai Melireîpeu kedipeu je liâ dezai, pengêudibe kraun huidaimakbe ze ningnui ngau gu lei.

⁵Chipau luigum ze, ningnui henabime zene gechîngme kuâ kangge bamchi ze bam lau. Kat kat guâ ’nggua ra hangge ningnui ’nteumena ningnui runne ne kecheiluîtewbe puâ kai kam lu ze bam lau, “Gechîrettewme je Hera ne ka’nggi lei, kane kecheiluîtewme je pa ne ka’nggiabe pei ze bam lei,” kacheu daseu.

⁶Chidaze Hera tâtewchibe ba kanggene ningnui runne kecheiluîtew ze bam lau, chidezai pe gu pedâuyibe ting ge pa ne ningnui je toa’ndi gai gu lei.

⁷Ningnui ’nning-kahereube zat leine ze pe peireige tua gai be lau, pa â ningnui je ’nningtinggeu la daseu.

⁸Besingsiak ze bam lau, kuâ’mmi ze bam lau. Ningnui teureipeu diabolbe â heradi kedibe kau gum ze mige je â gesuakteu ’nde ra ningnui hia-hia hûnrua ze peurua bam daseu.

⁹Ningnui gu keneibe ge bam’ntiprip lu ze pechu ’nggi lau, kedeirei leine ge aipau hereuliebe tak ze ningnui puiname (keneime) ne du lie mak daulak bam de lei be chî lu zeu.

¹⁰Zai ningnui ne kecheîne hereuliegailube châng dezai, ka’nggiabe leine peibe Rapeu, chi Krista gene betunmakbe pengêudibe ningnui je peigaipeu sing ne ningnui je tew’nsang gai gu zai tew’ntip kai gu, zai ningnui rantew’nchi gai gu lei.

¹¹Pe dage tâtewchibe rezie ze betingbeta peize bam bam lau. Amen.

¹²A puina’mpeu Silbanasbe, lungsangtewpeu hang I ne chakkaipeu ’ngnga gene I ne sam keduîne ningnui hangge raw gai de lei, ningnui je gecheu’nrak kai ze, zai aize Hera ka’nggiabe gesang de lei be rang’nchichiak kai zeu; aige ’ntiprip ze sap bam lau.

¹³Pa Babilon ge bambepui, pechu du kelânggaibeipui, ne rechâgaibe sam ningnui dage lang gai de lei; zai chigum ze a na Markabe ne du lang gai de lei.

¹⁴Kehungbe kakeputbe ne kat-kat je rechâ ze bam lau, ningnui Krista ge kebamme leine dage desieyibe peize bam lau.