Read Zeme Naga 2 PETER 1 Bible Online

2 PETER 1 - Zeme Naga bible

2 PETER 1

¹Simon Peterbe, Isua Krista guâ ka’ngguapeu zai apostol’mpeu dagene, Anui Rapeu benai Tewka’nringpeu Isua Krista kapelingbe ziegene anui gu gum ze keneibe pemîhungbe ngaulume dage:

²Hera benai Isua anui Wangpeu je gechîbe gene peize ka’nggiabe benai desieyibe ningnui dage tewpung gai ze bam lau.

³Pe dage pengêudibe benai keyibe bambe zene anui je kûgaibeipeu je gechîbe gezene keringbe hangge betâu ka’nnangbe benai mâ-keyibe leine ze anui je pei gai bei de lei, pe dage bambe tâtewchibe rezie geneu.

⁴Chigum ze airamme gezene chi pe dage bambe mâ pemîhungbe benai samhatkaibe kedibe leine ze pa ne anui je pei gai bei de lei, chidezai hemeipumsie gesutlakbe kedeirei ge bambe ziegene chuoteu-duaiteube bambe gezene ningnui ’mbiapat le ra, zai herui luilung tak yibe ze nguaheurame chang le ra hangge zeu.

⁵Aipau deu singbe hang ziegene changduibe riâ ningnui laîkai ze tâtew ze ningnui gu keneibe ge keyibe kaisuâ lau; zai keyibe ge mâ-gechîbe kaisuâ lau;

⁶zai mâ-gechîbe ge mi je mi runne reîchibe kaisuâ lau; zai mi runne mi je reîchibe ge helin-linchibe kaisuâ lau; zai helin-linchibe ge Hera lungtak yibe kaisuâ lau;

⁷zai Hera lungtak yibe ge hegupchibe kaisuâ lau; hegupchibe ge kehungbe kaisuâ lau.

⁸Airamme ze ningnui gu chang ze ningnui dage puigit ze bam dizai â anui Wang Isua Krista je gechîbe lam ge ningnui mâ-tewpui lak ze bamdibe benai perachî ’nchi mak ze bamdibe ge ningnui je chi ramme zene tei’nggim ze bam gu daseu.

⁹Mi-mige pe dage airamme gabe kau â hemikchitpeu zai pe mik taige teiwang’nna gai makchai â, ngauchilakbe kau chang zai pe gu tingtie gu hemui ramme gene pechu hui’nchigaibeibe ’ngngaîdaidibe kau chang daseu.

¹⁰Chidaze mi puiname gau, ningnui je kûgaibe benai kelânggaibe ge ’nchâ ze ’nningrehuîbi-bi ze bam lau. Aize ningnui ne tew ze bam dizai â ningnui mâtew-tewsedu kâu ra mak lei;

¹¹chigum ze Ripatpeu Isua Krista zai anui Wangpeu betunmakbe Heguangram ge gut ra ningnui hangge lat’nchichiak kai bei ze bam gu lei.

¹²Chipauziegene airamme ningnui ne chî ze bam leusedu, zai ningnui dage bambe chi samsang ge bam’ntiprip ze bam leusedu, airamme ze ningnui je pehî’nsangne rang’ngkia gai bam ra I heka gai bam lei.

¹³I aipau pum ge bam tânege ningnui je mâ-rang’ngkiagaibe zene ningnui je tew’nrak kai ze bam ra yirabe hang I ne ’nning gai lei,

¹⁴anui Wang Isua Krista ne achu mâ-teiliabe luigum ze mâtiemakse a pum ze (kedei ge) hekâm gai ’ndu de lei be I chi dadegeu.

¹⁵Zai I putkai’ndibe chângge peluâ leine ge airamme leine ze ningnui ne ’nningdau bam le ra hangge I ran ze a laîkai ze tâtew gu lei.

¹⁶Anui ne ningnui dage anui Wangpeu Isua Krista gu tâtewchibe benai pa wangkeurabe rasam chîliagaibe luage ziemmename ne kipatbe mâ-mâ ’nningchanglakbe rasam ge anui ne sui gai sua me lei, kane anui â pa (Isua) tâtewchibe je sakkitewme chang ze bam lei.

¹⁷Hengêutew’ndigaibe benai pengêudibe ze Hera Bepeu dagene pa ngaudibe luage Kaheguangbe Pengeudibe zene hekuâ pe dage pau gai ze, “Aize a Na nekune lei, pe dage I a suiyi-desang lei,” kacheube, chipau luage

¹⁸anui ne ai tinggîm ’mbene patbe kuâ ze seu de lei, ka’nchibe kedeiloa ge pechu anui nguabam dadegeu.

¹⁹Kemeume gu sam tew’ntipkaisuâ’ndibe ze anui dage bam de lei. Kemuibe bâm ge hemibung lerbabeibe je piezua ze bam gum ze ai (kemeume gu sam) geze ningnui ne kuârim ze bam ra de lei, ningnui lung ge tingba’nzangrapat ze hekuâgi chu mak tâne gezeu.

²⁰Railangbe ge ningnui ne aize chî’mmi sing ra lei, rawdiakkaibe ka’nchibe sam ge pau’ntuagaibe (kemeu sam) ze hangkat ne pe sui-sui ne sakelipatkaibe zat mak lei,

²¹Hera gu sam pauka’ntuabe (kemeusam) hang â ziemmena ’nning gene (chuichua gene) wangbe makse, kane Herui ka’nchibe ne tew’nrakkaibeime ziemmename ne Hera dagene mâ-chî lu ranggai’ndibe zat changbe ziegeneu.