Read Zeme Naga 2 PETER 2 Bible Online

2 PETER 2 - Zeme Naga bible

2 PETER 2

¹Kane kemeu karasame ramme ziemmename ruage (tingtie) ge pat ze bam de lei, geteiliame karasame, chi penui runne penui peireige luakatne tew’ngga-gaikeluarabe teiwang gai ze, penui je nguawanggaibeipeu Geteiliapeu je ’nsangdu ’ngkim ze reine ze mâ-geteika’nsiabe zat ramme teiwang gai ra ningnui ruage patrame bambe gum zeu.

²Zai misonggame ne penui gu hangleutewbe bamdaulakbe tak ge sui gai kam du lei, zai penui ziegene samsang gu ’mpuî ze sa’nsia gai ze bam gu lei.

³Zai penui (rangkâng) katekumbe gene penui ne ningnui je karasa ’nnia ne choa’nrui ze bam gu lei; tingtie gene du penui je tew’ngkuigairabe ze penui pereige bam di de lei, zai penui je tew’nggagairabe ge jeikeulak bam di de lei.

⁴Angelme hemuigai’ndime je Hera ne gesut kai me lei, kane kemuîbe ge penui je tuâ gai bei de lei, chi kemuîbe bâm ge Samramrabe Mai hangge kuâ ze penui je pi lu ze bambe bâm gezeu.

⁵Hera ne tingtie ge kedeireime je gesut kai me lei, kane Hera je neimakbe kedeirei ge heduinaîwang ra pei gai bei de lei; chi pa ne tew’nringpatkaibeime bau ze â Noabe, chi kapelingbe rasam paupeu, zai kêdame hanggesame bau runne lei.

⁶Hera ne Sodom benai Gomorra namdi kena je chau’ngkui gai ze penui je hemi ne rû’nsia kam gai lu, Hera je neimakme peireige mâ-wangchang ra teiliabe zat hang penai je â tew gai bei de lei.

⁷Lotbe, chi ziemmena keyipeu, hingde teimakme gu heluilungtak kesiabe ne pe lung tewhereu gai bei ze bambepeu je pa ne meupat kai bei de lei.

⁸Chi ziemmena keyipeu ze penui ruage bam ze patingnaigepat penui tatew kesiabe ramme ngaulube gene pe duângga-desang ze bam de lei.

⁹Zai chigum ze Hera je keneime je penui je kakedakbe ramme gene ’ndaigum meupat ra mei zai Samramrabe Mai hangge tewsâkuâ ze bamme chi helungriaksiame je ’nzuanerabe tak hang du Tingwang chî ze bam lei,

¹⁰’ngkeune ze mi pumsie ka’nchiebe kahebâbe ge suime benai Hera gu rezie tâtewchibe je ngauka’nname peireige zeu. Aime karasa ne mâ-geteiliachime â kehingbe ga zai kechî-keditew lei, zai kehu ’mbe pengêudibe bambe zat ramme je hengêutewbe teiliachi mak lei, makte chiramme je saka’nsia lei.

¹¹Angelme bau, chi aime suadu heranchi-ka’nteume zai di-ka’nteume ’nsangnedu Tingwang mikngau ge penui je sa’nsia gai mak lei.

¹²Kane hekaubena zat ramme ne mâ-tew’nsia ze bam ra penui runne penui telungtak gene changdibe ramme gum ze ziemmename du chigum tew ze bam ra penui telungtak hang chang gai di ze bam lei; penui mâ-chituimakbe leine ge penui ’nggi ze sa’nsia ze bam lei. Penui je â hekaubena ramme je gum ze tew’nsia gai bu lei,

¹³zai penui ne tewhereugaibeibe ze penui je tewhereu gai dai bu lei. Penui ne tewneibe ze â kebabe ge ngau’nchiepuangbe gene penui pumsie keneibe tâ tewrabe ze lei; ningnui mâ-teuherua ze bambe ge penui zene ningnui je tewka’ngngambe benai tewhelêugaibe chang ze bam lei, pelua’nsangne ge penui â keduaibe ’mpuî ge tat ze bam lei!

¹⁴Penui â mâ ge de piegailak, kane ’mpuimi lungkahailame je runne pienei ze bam lei, penui ne kesiabe tew ra ’njei-kaherei gum bambe ze â mâdau de ka’nggeube chimakbe gum bam lei. Heran-game ramme je ’mpia ge ngua gai ze bam lei. Penui lung ramme ge dekum ze bamrabe tak ze getei gai bei ze bam lei. Penui â Hera ne desetkaibeibe kangge la de lei!

¹⁵Penui â ’mpuika’nzeibe sâu gai ’ndi de lei, zai penui gu ’mpuî ramme tew’ngga ’ndi de lei; penui â Beorbe na Balaambe tatbe ’mpuî geze suitat kai di de lei, tâ-kesiabe tewbe gene rangkâng ngau ra ka’nchâbepeu,

¹⁶zai chi pe gu hemui kesiabe ziegene pechu ’ngngiambeipeu zeu. Pe gu hekunmerângne ne ziemmena kuâ ne pechu ’mpaubeibe zene kemeu’mpeu (Balaambe) gu kemiebe tatew ze tew’nsau gai bei de lei.

¹⁷Aime ziemmename ramme â ’nggeuki depin changkeudibe ramme, zai tingkaichibe ne kemâu ramme guirua ze bambe helî gum bam lei; Hera ne penui bâm hangge gechukbe kemuîbe ge kaikua ’nde lei.

¹⁸Penui ne kechî-keditew ze kemiebe sam ramme sa ze bam lei, zai kelungbesie tâumakbe ge kelungme dagene ’mbiapat le ra ’nning ze bamme je penui ne hemeipumsie ka’nchiebe luilung kesiabe zene penui je tewkau ra tew ze bam lei.

¹⁹Penui ne kesiabe penîmtewbe gu kebang ramme chang lu ze miramme je lungzeunetew ra (kebang ’mpat ra) hangge samhat ze bam lei—ziemmena mâ-mâ ne pechu ruichim’ndibe kau â, kebang chang daseu.

²⁰Anui Wangpeu benai tewka’nringpeu Isua Krista gechîbe ziegene kedeirei hui’nggagaiderabe gene ziemmena ’mbia lu ze, chipau ’mpia ge mi gai dai dizai â chime hang â, penui kebambe tak ze keraîbe luâ suadu sia’nteu ra chang de lei.

²¹Penui hang â hingde ka’nchibe penui dage peigaibeibe chî lu ze chigene ’ngngîntat dai ra sua â, kapelingbe ’mpuî ze mâdau de chî mak ze bamdibe ze yibi gu de lei.

²²Penui dage mâ-wangchangbe ramme zene samrekum ramme ze â gesang lei be teilia de lei: “Hetei ne pa ’nruîgailube bâm ge tat kadai lei,” kacheube benai “Huilube kau kebak ne tingniâ ge ’nnia ra tat kadai lei,” kacheube zeu.