Read Zeme Naga 2 PETER 3 Bible Online

2 PETER 3 - Zeme Naga bible

2 PETER 3

¹Kehungme gau, chuna aize I ne ningnui dage samkela rawgaibe pakenabe de lei, zai chi kena rawgaibe ge ningnui lung ’ntiprip ze bam ra rang’ngkia gai ze gecheu’nrak kai de lei;

²chidezai ningnui gu apostolme dagezene ka’nchime kemeume ramme ne mâ-rangka’ntuabe benai Heguangpeu zai Ripatpeu gu samde ze ningnui ’nningdau bam ra hangge zeu.

³Railangbe ge aize ningnui chî’mmi sing ra lei, chi nâlangbe ting dezai penui gu hemeipumsie ka’nchiebe tew ze kehichime ramme ne wang ze kehi ze

⁴acheu sa ze, “Pa wang ra samhatkaibe ze ’ndaige larei se lau? Reheime peu ramme chaidibe chângge du chuna riâ lei ze ting-kedei ’ndamchuraibe ting gum ze lungtat larei de zeî lau,” ze acheurabe zeu.

⁵’Ndâ gene Hera gu sam gene tinggîm piehang-ngaube ramme bam di de lei be, zai kedei ze hedui gene ’ndetpat zai hedui gene patbe

⁶chi kedei ’ndetpatbe (bâm) hedui zene kedei je â nup bei ze gagaidibe tak ramme ze chikâ lu ze penui ne mâ-hang du chak kai mak lei.

⁷Kane chi chuna bambe tinggîm piehang-ngaube benai kedei ze â aipau sam singbe zene hemi hangge kaikua ’ndi de lei, Hera je neimakme je tew’nsiarabe benai samramrabe mai riâ hangge reîkua gai zeu.

⁸Kane mi puiname gau, aize ’nningkelam gai se lau, chi Heguangpeu hangge â mai kat ze tingkum chang riâ lei, zai tingkum chang ze du mai kat riâ lei kacheube peling sam ze mâ-hang du chak kai mak ze bam se lau.

⁹Hanggesame ne Tingwang je kateziebe hang ’nninggaibe gum ze â, pa â pa samhatkaibe ge tezie ze bam me lei, kane pa â ningnui deu hangge â tezie ze bam lei, mige de ’ngga de ra hang â nei mak zeu, kane haimena ne helungkahelibe lutâu kam le ra hangge zeu.

¹⁰Kane Heguangpeu gu naimikpui â, mâ-kahegapeu gum ze wang gu lei, zai chige (tinggîm piehang ngaube ge) kebambe zat ramme hemi ne rûmut ’ndu lei, zai kedei benai chi bepeirei ge (kedei ge) tâtewgaibe ramme ze rû’ngga kam ’ndu lei.

¹¹Aigumbe tak gene mâgetaleine ’ngga kam gai gu daze, ningnui ’ndaigumbe ziemmena zat chang ze bam ra lau? ’Nchi ze Hera je ningnui nei ze bam ra yi lei,

¹²Hera gu naimikpui hangge benai chize luakatne wangrabe deze ningnui heguî ze piekua bam daseu. Chipau mai ge tinggîm piehang ngaube je hemi ne rû’ngga ’ndu lei, zai chi bepeirei ge (kedei ge) kebambe ramme ze rû’ngga kam ’ndu lei.

¹³Kane ningnui â pa samhatkaibe tei ze, chi peling gesangtewbe bâm, tinggîm karchibe benai kedei karchibe deze heguî ze piekua bam lau.

¹⁴Chidaze mi puiname gau, ningnui ne airamme je kuâ bam daze pa ne ningnui dage peize bekiê-pungbe mei zai heziâk mei chigumbe ga ze yi ze hedau le ra lungsang kai ze tew ze bam lau.

¹⁵Zai anui Wangpeu gesutchibe ze tewka’nringbe hangge riam gai le lau. Chigum ze anui puina kehungpeu Paulbe du pe dage kaningchingbe peigai’ndibe luigum ze, ningnui dage raw gai de lei,

¹⁶pa ne pe gu samkela leisi leine ge salia gum ze aize salia de lei. Pe gu samkela leisi ramme ge mi ’nningchîhungbe zat ramme bam de lei, mâ-chimakme benai helungkahelame chigene tat’nsia ze penui je tew’nggagairabe hangge changbe zeu, Hera sam kêdabe ramme ge du penui tat’nsia gai bam ra changdibe gum zeu.

¹⁷Chidaze ningnui â a puiname nung gau, aize chî’ntua lu ze ningnui je reîchi ze bam lau, chidezai hingde tei mak ze tâtewme bau zene ningnui je nguakezittat mak ra, zai ningnui sap’mmi ze sapbe gene kau mak ra hangge zeu.

¹⁸Kane anui Wangpeu Ripatpeu Isua Krista ka’nggiabe benai pa ne gechîbe gene ningnui chîngchu bam lau. Pe dage pengêudibe chuna benai betingbeta peize bam bam lau! Amen.