Read Zeme Naga 1JOHAN 2 Bible Online

1JOHAN 2 - Zeme Naga bible

1JOHAN 2

¹A name hename ramme gau, ningnui hemui gai mak ra hangge aize I ne ningnui hangge raw gai lei; kane mige ne hemui gai dizai â anui hangge â Bepeu dage sagaihârapeu, Isua Krista kapelingpeu la lei;

²pa ze anui gu hemui sa’nzeigairapeu lei, zai anui gu hemui hang runne makse, kedeireime leine gu hemui hang du sa’nzeigairapeu lei.

³Anui ne pe gu samde ramme tei’mmi dizai â aige zene anui ne pechu chîbe ze gesang run lei be chipat dui lei.

⁴Mige pa ne, “I ne pechu chî lei,” acheu lu kane pe gu samde ramme je pheu mak tizai â, pa ze karasa-sapeu chang lei zai pe dage samsang ga lei;

⁵kane mi-mige ne pe sam tei’mmi ze, pa gene pelingsing gene Hera je hung dizai â pechu â tew’nsang gai bei de lei. Aige zene anui pe dage bam lei be gesang run lei be ze chîpat dui lei:

⁶mige Hera gene pa bam bam lei, kacheube kau â Hera tatbe ’mpuî luî gene pa tatsingrabe lei.

⁷Kehungme gau, hingde karchibe I ne ningnui hangge rawgaibe mak lei, kane chi Bepeu gene ningnui dage bamdibe ze zangneu; chi hingde karchibe ze â, ningnui ne seudibe sam ze de lei.

⁸Acheuleusedu I ne ningnui dage hingde karchibe raw gai lei, chi pa ge benai ningnui ge gesang-peling chang ze bambe zeu, kemuîbe ze â gasui-sui ze tattibe ge kebabe zene lerbakuadibe ziegeneu.

⁹Mige pa â kebabe ge bam lei, acheu lu ze pe sikina je ngaugailakbe kau â, kemuîbe ge bam rei de lei.

¹⁰Mige pe sikina je hungbe kau â, kebabe ge bam bam lei, zai chige mâ de tewkaurabe zat hang ga de lei.

¹¹Kane mige pe sikina je ngaugailakbe kau â, kemuîbe ge bam ze kemuîbe ge tat lei, zai pa ’ndaige tat mei be chî mak lei, kemuîbe zene pe mik ze tewchit’ndibe ziegeneu.

¹²I ne ningnui hangge sam raw gai lei, a name hename ramme gau, pe ji ziegene ningnui gu hemui ramme lun-gai’ndibe ziegeneu.

¹³I ne ningnui hangge sam raw gai lei, hêpeume ramme gau, bepîbang gene bamkuâdipeu je ningnui ne chî ze bambe ziegeneu. I ne ningnui hangge sam raw gai lei, hename (rehangme) ramme gau, ningnui ne kesiabe je duî lu bamdibe ziegeneu. Ningnui dage I sam raw gai lei, napoine ramme gau, ningnui ne Bepeu (Hera) je chî ze bambe ziegeneu.

¹⁴I ne ningnui dage sam raw gai lei, hêpeume ramme gau, bepîbang gene bamkuâdipeu je ningnui ne chî ze bambe ziegeneu. I ne ningnui dage sam raw gai lei, hename (rehangme) ramme gau, ningnui ne ningnui ranchi zai Hera gu sam ze ningnui dage bam-bambeibe ziegeneu, zai ningnui ne kesiabe je duî lu bambe ziegeneu.

¹⁵Kedeirei je hung se lau zai kedeirei ge kebambe zat ramme je du hung se lau. Mige ne kedeirei je hung dizai â pa ge Bepeu (Hera) je kehungbe ga lei.

¹⁶Kedeirei ge kebambe zat leine, chi hemeipumsie je ka’nchiebe zai mi gu kebambe peireige kahegiêbe ze â Bepeu gu makse, kane kedeirei gu chang daseu.

¹⁷Zai kedeirei benai kedeirei gu ka’nchiebe ze â gasui-sui ze bam lei; kane mige Hera ’nningtewbe kau â betingbeta bam bam lei.

¹⁸Hename ramme nung gau, aize nâlangbe hî de lei, zai Krista karasabe kau wang gu de lei be ningnui seulube luigum ze, chunage Krista karasa ramme misongga wang mui de lei, chipauziegene aize nâlangbe hî de lei be anui chi de lei.

¹⁹Penui ze anui dagene zuapat lei, kane penui â anui baume mak lei; penui ze anui baume chang dizai â penui ze anui dage bam bam gu de lei; kane penui zuapat ti de lei, chidezai penui ze anui baume mak lei be chî’nchichiak bam de ra hangge zeu.

²⁰Kane ningnui â, Ka’nchibe Hangkat zene Hera-taudui ’nnukkai’ndime bau de lei, chize ningnui haimena ne chî kam la de lei.

²¹Ningnui ne samsang ze chimakbe ziegene I ningnui dage sam rawgaibe mak lei, kane chize ningnui ne chî lu ze bambeibe ziegene, zai chi karasa changbe ze â Samsang gu mak lei be chî ze bambeibe ziegene raw gai lei.

²²Isua â Krista lei be ka’ngkimbe kau ze karasasabe kau zangno châu ze karasasabe kau ra lau? Krista karasabe kau ze aize de lei, Bepeu benai chi pe Na je ka’ngkimbe kau zeu.

²³Mige pe Na je ka’ngkimbe kau dage ze Bepeu bam mak lei. Pe Na je chîka’mmibe kau dage ze Bepeu du bam lei.

²⁴Bepîbang gene chi ningnui seulube ze peize ningnui ge bam bam lau. Bepîbang gene chi ningnui seulube ze ningnui ge bam bam dizai â, pe Na ge benai Bepeu ge ningnui bam bam gu lei.

²⁵Zai aize pa ne anui dage samhatkaibe de lei, betunmakbe keringbe zeu.

²⁶Ningnui je choarame patrabe deu hangge aize I ningnui dage I raw gai lei;

²⁷kane Hera-taudui ’nnukkaibe pe dagene ningnui ngaube ze â, ningnui ge bam bam la lei, zai mi-mige ne ningnui je mâ-geteilia ze bam ra ningnui hangge ’nnang me lei; mâ-leine deu ge pe gu Hera-taudui ’nnukkaibe zene ningnui je geteigaibe karasa chang mak ze gesangsingbe hang chang ze bam daze chize ningnui je geteigaibeibe luigum ze pa ge bam bam zu lau.

²⁸Zai chunage, hename napoine ramme gau, pa ge bam bam lau, chidezai pa liâ dezai anui lungdi ze bam le ra, zai pa wangbe ge anui pe dagene ’ngngam ze ’ngngîntat dai mak ra hangge zeu.

²⁹Pa â peling-gesangtewpeu lei be ningnui ne chî ze bam dizai â, mi-mige mâ-ka’nzeibe tewbe kau leine â, pa gene lungkeube kau lei be ningnui chî sing gu lei.