Read Zeme Naga 1JOHAN 3 Bible Online

1JOHAN 3 - Zeme Naga bible

1JOHAN 3

¹Bepeu ne anui je hung-kadesangbe tak ze pie gai ni lau, chi anui je Hera name ze kûgaiberabe zeu; zai chigum ze anui â bam de lei. Kedeirei ne anui je chî mak ze bambe ze â chize (kedeirei) ne pechu chimakbe ziegene de lei.

²Kehungme gau, chuna â anui Hera name chang de lei; anui ’ndaigum ze bam gu mei be hang â chize liâ gai me rei lei, kane pa liâ gai dezai â, anui ze pa gum bam du de lei be anui â chî lei, anui â pechu pe luîrun ze ngau gu dadegeu.

³Zai mi-mige Pa ge heguî ze bambe kau â, pa (Krista) ne ’nchi ze bambe luigum ze pe runne pechu tew’nchi ze bam lei.

⁴Mi-mige hemui tâ tewbe kau leine â, hingde suimau lei; hemui ze â hingde teimakbe ze de lei.

⁵Hemui lutua ra hang pa (pe runne pechu) liâ gai lei be benai pa ge hemui ga lei be ze ningnui ne chî lei.

⁶Pa ge bam-bambe kau â mî de hemui tâ tew ze bam bam me lei; hemui tâ tewbambe kau â, pa ne pechu (Krista je) ngau de ngau mak zai chî de chî mak lei.

⁷Hename napoine ramme gau, peize mî ne ningnui je duai ze bam se lau. Mâ-ka’nzeibe tewbe kau â kan’nzeibe kau lei. Pa (Krista) â ka’nzeibe kau dadegeu.

⁸Hemui tâ tewbe kau â, diabolbe gu chang lei; satan â bepîbang gene hemui gai ’ndi daseu. Hera Na liabe deu ze â diabolbe gu tatew ramme ze tew’nsiarabe ze lei.

⁹Hera dagene lungkeube kau â, hemui tâ tew me lei; Hera luilungtak yibe pa ge bam bam dadegeu, zai pa â Hera dagene lungkeube ziegene hemui tâ tewchi lak lei.

¹⁰Aigezene châume ze Hera name mei, zai châume ze diabolbe name mei be ngaupatchi duî de lei: mi-mige pelingtewmakbe kau, zai pe sikina je hungmakbe kau â Hera na mak lei.

¹¹Aize bepîbang gene ningnui ne seudibe sam de lei, chi anui kat-kat je hungchi ra,

¹²zai mi hangkat kesiabe kau Kainbe, pe kinapeu je gîchat’ndipeu gum bam mak ra rangbe sam zeu. Zai ’ndaitew pa ne pe kinapeu je gîchat ’ndi lau? Pe gu tatew tak â sia zai pe kinapeu â pelingtewbeibe ziegene de lei.

¹³Mi puiname gau, kedeirei ne ningnui je ngaugailak bei ze ningnui ’nningdaulak bam mei?

¹⁴Anui ne mi puiname je hungbeibe ziegene kechaibe gene keringbe ge anui â zuapat ti de lei be anui chî lei. Hungchi mak ze bambe kau â, kechaibe ge pa bam bam lei.

¹⁵Mi-mige pe sikina je ngaugailakbe kau â kegîbe kau lei, zai kegîbe kau â, pa ge keringbe betunmakbe bam bam mak lei be ningnui ne chî lei.

¹⁶Pa ne pa keringbe anui hangge peipatkaibe, kehungbe ze aigezene anui chî de lei; zai anui keringbe ze anui puiname hangge peipat kai ra yi lei.

¹⁷Kane mige ne pe dage kedeirei gu heurâ ramme bam lu ze pe sikina daulak ze bambe ngau lu sede ngau mak gum ze bam dizai â ’ndaigum ze pa ge Hera kehungbe bam ra lau?

¹⁸Hename napoine ramme nung gau, sam gene benai samsabe gene anui hung ze bam mak kei lei, kane tâtewbe benai samsang gene anui hung ze bam kei lei.

¹⁹Aige zene anui ze â samsang gume chang lei be chi de lei, zai pe masuage anui lung tew’ntip dai ze bam bam de lei,

²⁰anui lung zene anui je chau’ngkui gai ze bambe lua’nsangne ge zeu; Hera â anui suadu dika’nteu dadege, zai pa â getaleine chî dadegeu.

²¹Kehungme gau, anui lung ne anui je chau’ngkui gai mak bei dege â, Hera masuage anui lung lumbup ze bam lei;

²²zai anui ne gekie-kiebe ze pe dagene anui ngau ze bam lei, anui ne pe hangge pa keneibe tew ze pe gu hingde ramme rei’mmi ze bambe ziegeneu.

²³Zai aize pe gu hingde ramme lei, chi pa ne anui je diegaibeibe luigum ze anui ne pe Na Isua ji ge ’nnum’mmi ze kat-kat je hung ze bamrabe zeu.

²⁴Pe gu hingde ramme tei’mmi ze bamme leine ze pa ge bam bam lei, zai pa ze penui ge bam bam lei. Zai aigezene pa ze anui ge bam bam lei be pa ne anui je peigaibeibe Herui gene anui chî de lei.